Мыекъопэ къэралыгъо технологическэ университетым проектышхоу «Программэу «Къулыкъу ахьызэ егъэджэгъэнхэм» студентхэр хэгъэлэжьэгъэнхэр» зыфиIорэр щагъэцэкIагъ.

«Къэралыгъо ыкIи муниципальнэ гъэIорышIэным» ылъэныкъокIэ экономикэм ыкIи гъэIорышIэным ифакультет щеджэрэ студентмэ проектыр агъэхьазырыгъагъ. Ащ хэлэжьагъэ командэмэ проектыр агъэцакIэзэ профессиональнэ опытышхо зэрэзэрагъэгъотыгъэр къыхагъэщыгъ, социальнэ пшъэрылъыбэ зэшIуахыгъ. Проектым ипшъэрылъыр — гухэлъэу ыкIи пшъэрылъэу программэу «Къулыкъу ахьызэ егъэджэгъэнхэм» иIэхэр ягъэшIэгъэнхэр,  студентхэр МКъТУ-м ипроектнэ IофшIэным хэщэгъэнхэр, егъэджэным ыкIи социальнэ практикэм хэшIыкI фыряIэу шIыгъэнхэр.

ГъэсакIоу командэмэ проектнэ офисэу «Къулыкъу ахьызэ егъэджэгъэнхэмкIэ» ашъхьарытыгъэр специалистэу КIыржын Светлан, ащ къыкIигъэтхъыгъ нэбгырэ пэпчъ исоциальнэ пшъэдэкIыжь зэрэхигъэхъуагъэр. Пэрытныгъэ шэнхэм, псынкIэу унашъохэр шIыгъэнхэм, зэдэлэжьэныгъэм алъэныкъокIэ хэхъоныгъэхэр ашIынхэм IофшIэныр зэрэфытегъэпсыхьэгъагъэр, проектым ишIуагъэ къызэрэкIуагъэр ащ къыIуагъэх. Неущрэ мафэм къэралыгъо ыкIи муниципальнэ къулыкъушIэхэр зэрэхэлэжьэщтхэм проектым фещэх.

Проектым игъэцэкIэн тIоу гощыгъагъэ:

— апэрэ едзыгъор шэкIогъу мазэм 2024-рэ илъэсым рагъэжьагъ, апэрэ курсым щеджэхэу МКъТУ-м исыд фэдэрэ сэнэхьатхэм афэгъэзагъэхэм афэгъэхьыгъагъ (нэбгырэ 800 хэлэжьагъ).

— ЯтIонэрэ едзыгъоу 2025-рэ илъэсым игъэтхэпэ мазэ рагъэжьагъэм ятIонэрэ ыкIи ящэнэрэ курсхэм ащеджэрэ студентхэр зэлъиубытыгъэх ( нэбгырэ 1200-рэ хэлэжьагъ).

Къулыкъу ахьызэ егъэджэгъэнхэр» МКъТУ-м — ар щысэ афэхъу теоретическэ шIэныгъэхэр практическэхэмкIэ зэблэзыхъужьхэрэ студентхэм, социальнэ пшъэрылъхэр зэшIохыгъэнхэмкIэ опыт щагъоты.