Мыекъопэ къэралыгъо технологическэ университетым шIухьафтынэу осэшхо зиIэ тхылъипшI къыратыгъ, ахэр къыфэзгъэшъошагъэхэр Дунэе экологическэ форумэу «Экологием епхыгъэ гумэкIыгъохэр дэгъэзыжьыгъэнхэмкIэ непэрэ екIолIакIэхэр» зыфиIорэм хэлажьэгъэ тиIофшIэгъухэр ары.

Авторскэ ыкIи купэу зэхэт научнэ IофшIагъэхэр, монографиехэри ахэтэу, каталогхэр ыкIи очеркхэр, а зэпстэумэ МКъТУ-м и Научнэ тхылъеджапIэ ифонд къагъэбаигъ, экологическэ гумэкIыгъохэр нахь куоу зэгъэшIэгъэнхэмкIэ IэпыIэгъушIу хъущтых.

Торжественнэ зэхахьэу тхылъхэр къызщаратыжьыгъэхэм, МКъТУ-м и Научнэ тхылъеджапIэ ипащэу Пщыжъ Саидэ рэзэныгъэ гущыIэхэр афигъэхьыгъэх экологическэ факультетым идеканэу Галина Коноваловам ыкIи егъэджапIэм ащ фэдэ тхылъ шIагъохэр къызэраратыгъэм фэшI. Университетым щылэжьэрэ кIэлэегъаджэхэмкIэ а IофшIагъэхэр IэубытыпIэ дэгъу зэрэхъущтхэр ыкIи егъэджэн процессым хэхъоныгъэхэр щышIыгъэнхэмкIэ лъэшэу къазэрэшъхьэпэщтхэр ащ къыхигъэщыгъэх.

Шъугу къэдгъэкIыжьын, МКъТУ-м иэкологическэ факультет шIэныгъэм идунае Iофтхьабзэшхоу щырекIокIыгъэм изэхэщэкIуагъ — Дунэе экологическэ форумэу «Экологием епхыгъэ гумэкIыгъохэр дэгъэзыжьыгъэнхэмкIэ непэрэ екIолIакIэхэр» зыфиIорэм. Форумым хэлэжьагъэх шIэныгъэлэжьхэу Германием, Австрием, Беларусым, Абхъазым ыкIи Урысыем ишъолъыр зэфэшъхьафхэм къарыкIыгъэхэр.

Экологическэ факультетым иIофышIэхэр афэразэх осэшхо зиIэ тхылъхэр къязытыгъэхэм: Ставропольскэ ботаническэ садым — къутамэу ФГБНУ «Темыр-Кавказскэ ФНАЦ» зыфиIорэм ипащэу Владимир Кожевниковым ыкIи шIэныгъэ IофшIэнымкIэ пащэм игуадзэу Василий Храпачым; Кавказскэ къэралыгъо чIыопс биосфернэ заповедникэу Х.Г. Шапошниковым ыцIэ зыхьырэм ипащэу Сергей Шевелевым ыкIи шIэныгъэ IофшIэнымкIэ пащэм игуадзэу Николай Ескиным; ФГБУ «Къэралыгъо заповедникэу «Утриш» зыфиIорэм ипащэу Ольга Шваб ыкIи экологическэ гъэсэныгъэмкIэ отделым иметодистэу Никита Савченкэм.