Мыекъопэ къэралыгъо технологическэ университетым шIэныгъэлэжьхэм ясовет изэхэсыгъо щыкIуагъ, ар зэрищагъ ректорэу Къуижъ Саидэ. Зэхэсыгъом джащ фэдэу хэлэжьагъ МКъТУ-м ипрезидентэу, профессорэу ТхьакIущынэ Аслъан. Университетым иIофыгъо шъхьаIэхэм, ащ хэхъоныгъэ егъэшIыгъэнымкIэ ипшъэрылъхэм атегущыIагъэх.

Повесткэм итхэм афемыжьэхэзэ, ректорэу Къуижъ Саидэ рэзэныгъэ тхылъхэр аритыжьыгъэх программэу «Къулыкъу ахьызэ егъэджэгъэнхэр» зыфиIорэм къыдыхлъытагъэу Урысые Федерацием ипрактикэ-тегъэпсыхьагъэм игъэсэныгъэ зиIахь хэзылъхьагъэхэм. Рэзэныгъэ тхылъхэр къэзгъэхьыгъэр апшъэрэ гъэсэныгъэмкIэ ыкIи наукэмкIэ УФ-м и Министрэ игуадзэу О.В. Петровар ары, зэратыгъэхэр автомобильнэ транспортым икафедрэ  идоцентэу Наталия Машининар, стандартизацием, метрологием ыкIи товарнэ экспертизэм якафедрэ идоцентэу КIэдэкIое Нафсэт, псэолъэшIыным ыкIи IэпэIэсэныгъэ къэзытрэ дисциплинэхэмкIэ кафедрэм идоцентэу Щыщэ Рит. Хабзэ зэрэхъугъэу зимэфэкI мафэ хэзгъэунэфыкIыхэрэми ректорыр афэгушIуагъ.

ШIэныгъэлэжьхэм ясовет джащ фэдэу къащыхагъэщыгъэх студентхэу Урысые зэнэкъокъухэм ыкIи проектхэм текIоныгъэ къащыдэзыхыгъэхэр, чанэу ахэлэжьагъэхэр:

—стоматологическэ факультетым истудент зэнэкъокъоу «Национальное достояние России» зыфиIорэм (номинациер «Медицина, здоровый образ жизни») щытекIуагъ, ар бзэр жэпкъ зэхэтым игъэпсын зэрэхэлажьэрэм иушэтын фэгъэхьыгъагъ. Научнэ пащэр — стоматологием икафедрэ икIэлэегъэджэ шъхьаIэу Былымгъот Фатим.

— лечебнэ факультетым истуденткэу Лаура Манукян дипломхэу а I-рэ я VI-рэ ыкIи я VII-рэ шъуашэ зиIэхэр Дунэе научнэ-практическэ конференциехэм къащыфагъэшъошагъ, иIофшIагъэ анестезием ыкIи непэрэ антидепрессантхэм афэгъэхьыгъагъ. Научнэ пащэр — физиологием ыкIи общэ патологием икафедрэ икIэлэегъаджэу Даурэ Ларис. 

— МКъТУ-м и Политехническэ колледж истуденткэу Ева Козыревам я III-рэ чIыпIэр къыщыдихыгъ Дунэе зэнэкъокъоу «PRO-туризм» зыфиIорэм, IофшIагъэу иIагъэр хьэлэл-зекIоныр Адыгеим зэрэщыгъэпсыгъэм фэгъэхьыгъагъ. Пащэр — кIэлэегъаджэу Валерия Доронинар ары.

— экономикэмрэ гъэIорышIэнымрэ яфакультет истуденткэу Киятэ Данэ Урысые зэнэкъокъоу «Инносоциум» зыфиIорэм ифинал ихьагъ (номинацир «Урысыем ыпсэ»), проектэу ыгъэхьазырыгъэр «Видеоигра Нартский эпос». Научнэ пащэр — экономикэ шIэныгъэхэмкIэ докторэу, профессорэу, финансхэмрэ  кредитымрэ якафедрэ ипащэу Iэшъынэ Марин.

Повесткэм иупчIэ шъхьаIэ къыдыхэлъытагъэу кIымэфэ зачетнэ-ушэтын сессием фэгъэхьыгъэ доклад къышIыгъ егъэджэн-методическэ гъэIорышIапIэм ипащэу  Наталья Чудесовам. Ащ къыIотагъ сессиер дэгъоу зэрэрекIокIыгъэр, студентмэ янахьыбэрэмэ ар дэгъоу зэратыгъэр. Ар къэзгъэлъэгъорэ лъэныкъоу заулэ къыхигъэщыгъ, кIэлэегъаджэмэ яIофшIэни къытегущыIагъ.

Ащ ыуж, Научнэ тхылъеджапIэм ипащэу Пщыжъ Саидэрэ тхылъеджапIэм ипащэ игуадзэу Ирина Берберьянрэ докладхэр къашIыгъэх, ахэмэ къыхагъэщыгъ университетым шIэныгъэ статьяу къыхиутыхэрэмкIэ тхылъеджапIэр зэрагъэфедэрэр, ащ чIыпIэу университетым щиубытырэр. ЗэхэгущыIэжьым къыдыхэлъытагъэу научнэ-хэутын IофшIэнымкIэ тхылъеджапIэм опытэу IэкIэлъыр зэфахьысыжьыгъ, джащ фэдэу егъэджэн ыкIи егъэджэн электроннэ ресурсхэм екIолIакIэу къафагъотыхэрэр зэхафыгъэх.

Доклад къэзышIыгъэмэ къыхагъэщыгъ университетым иIофышIэхэм къыхаутырэ статьяхэмкIэ информацие икъу зэраIэкIэлъыр, тедзапIэу агъэфедэхэрэри къызэрэдалъытэхэрэр, IофшIэнымкIэ наукометрическэ базэм ишIуагъэ къызэрэкIорэр.

НыбжьыкIэ политикэмкIэ проректорэу БрантIэ Мурат гъэсэныгъэ IофшIэнэу ныбжьыкIэхэм апае рагъэкIокIыхэрэм къатегущыIагъ. Ащ къыкIигъэтхъыгъ патриотизмагъэ ахэлъэу, яхэгъэгу шIу алъэгъоу, къулыкъу фахьыным фэхьазырхэу непэрэ ныбжьыкIэхэр зэрэщытхэр, ащ пае пшъэрылъэу яIэр зэрагъэцакIэрэр. Студентхэмрэ кIэлэегъаджэхэмрэ гъэ къэс хэлажьэх рагъэкIокIырэ акциехэу «Георгиевская лента», «Бессмертный полк», «Огненные картины войны» зыфиIохэрэм, ащ ишIуагъэкIэ лIыхъужъыгъэ блэкIыгъэр ныбжьыкIэхэм зэхашIэ. А IофшIэныр лъагъэкIуатэ мыгъэ ТекIоныгъэм ия 80-рэ илъэс зыщыхагъэунэфыкIырэм, ащ пае щыIэ планыр агъэцэкIэщт, Iофтхьабзэмэ ахэлэжьэщтых.

МКъТУ-м иприемнэ комиссие пшъэдэкIыжь зыхьырэ исекретарэу Бэрзэдж Розэ апшъэрэ гъэсэныгъэм ипрограммэу 2025/2026-рэ илъэсхэм ателъытагъэм зэхъокIныгъэу фэхъугъэхэм ащигъэгъозагъэх. Мыщ фэдэ упчIэхэу: «Мыекъопэ къэралыгъо технологическэ университетым учIэхьаным пылъ Шапхъэхэр, гъэсэныгъэ программэхэу апшъэрэ гъэсэныгъэ къэзытыхэрэм уазэрэфеджэщтыр — программхэу ординатурэр» ыкIи «О внесении дополнений в перечень индивидуальных достижений, учитываемых при приеме обучение на программы бакалавриата и программы специалитета» зыфиIохэрэр аштагъэх.

Университетым илъэсым къыкIоцI Iофэу ышIагъэм изэфэхьысыжьхэр къышIыгъэх егъэджэн IофшIэнымкIэ проректорэу Людмила Задорожнаям. Ащ хэтыгъэх егъэджэн процессым изытет, научнэ-ушэтын IофшIэныр, нэмыкI лъэныкъохэу университетым иIофшIэн къыхиубытэхэрэр.

ШIэныгъэлэжьхэм ясовет адыригъэштагъ Медицинскэ институтым къытхыгъэ лъэIу тхылъым ыкIи зэкIэ хэтхэм зэдырагъаштэу амакъэ фатыгъ шIэныгъэлэжьыцIэ-профессорыр къыфагъэшъошэнымкIэ Малышев Алексей Владислав ыкъор къэгъэлъэгъогъэным, ар офтальмологием икафедрэ ипащ, медицинэ шIэныгъэхэмкIэ доктор, доцент. Къызэрагъэлъэгъогъэ лъэныкъор .1.5. — Офтальмологиер.

МКъТУ-м ишIэныгъэлэжьхэм ясовет изэхэсыгъо икIэухым университетым истудентмэ яеджапкIэ къегъэIыхыгъэным фэгъэхьыгъэ упчIэр БрантIэ Мурат къыIэтыгъ.

ШIэныгъэлэжьхэм ясовет изэхэсыгъо зэфэпхьысыжьмэ, Мыекъопэ къэралыгъо технологическэ университетым фэгъэхьыгъэ упчIэу къаIэтыгъэхэмкIэ шIуагъэ къэзытыщт унашъохэр ашIыгъэх.