Непэ Мыекъопэ къэралыгъо технологическэ университетым и «Точка кипение» ныбжьыкIэ проектхэм я Урысые зэнэкъокъу игъэсэныгъэ программэу «Уигухэлъ факIу!» — «Гъэхъагъэхэм ямастерской. Проектхэу апшъэкIэ кIуагъэхэм яшъэфхэр» зыфиIорэр щыкIуагъ.

Iофтхьабзэм хэлэжьагъэх Адыгэ Республикэм щыщ кIэлэеджакIохэр, студентхэр, кIэлэегъаджэхэр, джащ фэдэу Урысыем ичIыпIэ зэфэшъхьафхэм къарыкIыгъэхэр, ахэм ахэхьэх Белгородскэ хэкур, Краснодар краир, Донецкэ Народнэ Республикэр ыкIи Хабаровскэ краир. Зэнэкъокъум 2025-рэ илъэсым командэ 265-рэ хэлажьэ, ахэр Урысые Федерацием исубъект 29-мэ ялIыкIох.

ШIуфэс псалъэ зэхахьэм къыщишIыгъ экономикэ шIэныгъэхэмкIэ кандидатэу, маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу, зэнэкъокъум изэхэщакIоу Светлана Новиковам. Зэнэкъокъум хэлажьэ зышIоигъохэм зэрахахъорэр, заявкэ 187-рэ гъэсэныгъэ организацие 119-мэ къызэратыгъэр къыхигъэщыгъэх. Светлана Константин ыпхъум мастерскоим хэлэжьэрэмэ зэрафэразэр, зэнэкъокъум ишIуагъэкIэ ныбжьыкIэхэм джыри лъэныкъуакIэхэмкIэ зыкъызэрэзэIуахыщтыр къыIуагъэх.

Ащ къыкIэлъыкIоу Светлана Новиковам мастерскоим иэкспертхэр къыгъэнэфагъэх: АНО «Платформа НТИ» зыфиIорэм и «Точка кипение» иотдел ипащэ игуадзэу, общественнэ лIыкIоу АНО «Агентство стратегических инициатив по продвижению новых проектов» зыфиIорэм иIэу Антон Артамкиныр;  ООО «АльбоТравел» зыфиIорэр зиеу ыкIи зипащэу, туристическэ комплексэу «Терем у реки» зыцIэм иIэшъхьэтетэу, туризмэм фэгъэзэгъэ сатыушIэу Александр Бородиныр; РОО «Туристическая Адыгея» зыфиIорэм и Совет хэтэу Ольга Ивановар.  Iофтхьабзэм Александр Бородинымрэ Ольга Ивановамрэ къыщаIопщыгъ хэушъхьафыкIыгъэ шIухьафтын зэрагъэхьазырыгъэр, ар лъэныкъоу «Зэтегъэпсыхьан» зыфиIорэм пае атыщт, компаниеу «АльбоТравел» ар къегъэлъагъо.

Командэмэ ахэтэу зэнэкъокъум хэлажьэрэмэ технологиеу НТИ-р агъэфедагъ, ащкIэ проектэу ашIыщтхэр пэшIорыгъэшъэу зэрагъэшIэшъу. Ахэмэ пшъэрылъэу афагъэуцугъагъэр ягукъэкIхэм 2030-рэ, 2040-рэ ыкIи 2050-рэ илъэсхэм анэсэу хэхъоныгъэхэр зэрарагъэшIышъущтхэр ары. Ащ дэжьым  технологическэ IофыгъуакIэу къэхъун ылъэкIыщтхэр къыдалъытэнхэ фэягъэ. СыхьатитIо зызэдэлажьэхэ нэужым, кIэлэеджакIохэми Мыекъопэ къэралыгъо технологическэ университетым истудентхэми зэпхыныгъэхэр ашIыгъэх, тапэкIэ ягукъэкIхэр зэрэлъагъэкIотэщтхэм зэдегупшысагъэх.

Iофтхьабзэм икIэухым Светлана Новиковам агу къыгъэкIыжьыгъ япроектхэм ялъэтегъэуцохэр гъэцэкIэкIо комитетым мэлылъфэгъум и 1-м нэс афагъэхьынэу зэрэщытыр. Финалым ихьагъэхэм ацIэхэр мэлылъфэгъум ыкIэхэм къаIопщыжьыщт. Лъэныкъохэу «Добровольчество», «Предпринимательство», «IT и цифровые технологии», «Здоровье», «Благоустройство» зыфиIохэрэм ащытекIощтхэм дипломхэмрэ балл тедзэхэмрэ къагъэхъэщтых, МКъТУ-м чIахьэхэ хъумэ ахэр афыхагъэхъожьыщтых. Ащ фэшъхьафэу, ахэмэ ацIэхэр Урысые Федерацием и Фонд и Къэралыгъо информационнэ ресурсэу «Сэнаущыгъэр ыкIи гъэхъагъэр» зыфиIорэм хатхэщтых.

НыбжьыкIэ проектхэм я Урысые зэнэкъокъу игъэсэныгъэ программэу «Уигухэлъ факIу!» зыфиIорэр Мыекъопэ къэралыгъо технологическэ университетым зэхищагъ, IэпыIэгъу къыфэхъух: Урысые Федерацием гъэсэныгъэмкIэ и Министерствэ, «Точка кипениер». Зэнэкъкоъум иоператорыр — МКъТУ-м и «Точка кипение», программнэ пащэр Светлана Новиковар, администраторыр Мария Тамахинар ары.