Мыекъопэ къэралыгъо технологическэ университетым къеблэгъагъ гъэсэныгъэ организациехэм яIофшIэн гъэзекIогъэнымкIэ Департаментым ипащэу Виталий Гришкиныр.

Ректорэу Къуижъ Саидэ ыкIи проректорхэм ягъусэу ащ апшъэрэ еджапIэм иматериальнэ-техническэ базэ ыкIи игъэсэныгъэ проеткхэм защигъэгъозагъ. 

Анахьэу ынаIэ зытыридзагъэр МКъТУ-м и «Точка кипение» — платформэу, студентмэ непэрэ цифрэ Iофтхьабзэхэр зыщызэрагъашIэхэрэр, Лъэпкъ технологическэ гукъэкIхэм ятехнологиехэу зэхагъэуцохэрэр зыщаушэтыхэрэр, гъэсэныгъэ программэхэм защыхэлажьэхэрэм, стартапхэр ыкIи проектхэм яушэтын зыщагъэцакIэхэрэр.

ХьакIэм студенческэ хъоур зэригъэлъэгъугъ — хэушъхьафыкIыгъэ чIыпIэу студентхэм апае агъэпсыгъэр, ащ щеджэх ыкIи языгъэпсэфыгъо уахътэ щагъакIо, Iофтхьабзэ зэфэшъхьафхэр рагъэкIокIых. Непэрэ уахътэм диштэрэ площадкэу ныбжьыкIэ чанхэр зэзыщалIэу, университетым истуденческэ сообществэ зыщагъэпсырэу ар щыт.

Экскурсием щыщ Iахь шъхьаIэу хъугъэ Аккредитационнэ-симуляционнэ гупчэр, ащ медицинскэ факультетхэм ащеджэрэ студентмэ зыщагъасэ, яIэпэIэсэныгъэ щаушэты, реаниматологием, терапием, хирургием, акушерствэм ыкIи гинекологием, педиатрием, стоматологием, неврологием, фармацием алъэныкъокIэ яшIэныгъэхэр щагъэпытэжьых. Гупчэм зэрэщырэгъаджэхэрэм мыщ фэдэхэр хэхьэх: сестринскэ лъыплъэным къыщегъэжьагъэу врачебнэ фэIо-фашIэ хьылъэхэм анэсыжьэу. ЦIыфхэм якъэгъэнэжьынкIэ амалыкIэхэр зыщызэрагъашIэхэрэр технологичнэ ин зыхэлъ муляжхэр, фантомхэр ыкIи медицинскэ роботхэр ары, специалистыр ашъхьагъ итэу а IофыгъошIухэр зэшIуахых. 2018-рэ илъэсым къыщыублагъэу мы гупчэм студентхэм афэшъхьафэу, врачхэми, нэмыкI специалистхэми зыщагъасэ.

Ащ ыуж Виталий Виктор ыкъом МКъТУ-м и Научнэ-гъэсэныгъэ гупчэ илабораториехэу робототехникэм, биотехнологиехэм ыкIи мэкъу-мэщ технологиехэм афытегъэпсыхьагъэхэм, джырэ уахътэм ехъулIэу патент зыпылъхэр зыщызэхагъэуцогъахэхэм нэIуасэ афэхъугъ. Джащ фэдэу еджэпIэ гупчэу «Процессхэм яфабрикэ» ыкIи проектнэ офисэу «МКъТУ-р сакъыныгъэ зиIэ апшъэрэ еджапI» зыфиIохэрэр, технологиехэм ясакъыныгъэ системэхэр ащ зэригъэлъэгъугъэх, ахэр сакъыныгъэ производствэм ылъэныкъокIэ университетым щагъэцэкIагъэх. Виталий Виктор ыкъом а Iофыгъохэм осэшхо къафишIыгъ, университетым илIыкIохэр ригъэблэгъагъэх наукэмрэ апшъэрэ гъэсэныгъэмрэкIэ УФ-м и Министерствэ ирабочэ купэу практикэ анахь дэгъухэр къыхэхыгъэнхэм адэлажьэхэрэм язэIукIэ хигъэлэжьэнхэу.

Гъэсэныгъэ ыкIи индустриальнэ гъусэгъухэм тапэкIэ зарадэлэжьэщтхэмкIэ зэзэгъыныгъэхэр ашIыгъэх, Iофэу ашIэрэр лъагъэкIотэщт.