Мыекъопэ къэралыгъо технологическэ университетым хэхьэрэ Дзэ егъэджэн гупчэм къеблэгъагъ УФ-м и Правительствэ и Тхьаматэ игуадзэу Денис Мантуровыр, ащ игъусагъ Адыгэ Республикэм и ЛIышъхьэу КъумпIыл Мурат.

ХьакIэмэ Дзэ егъэджэн гупчэм иматериальнэ-техническэ базэ ыкIи гъэсэныгъэ программэхэу пилот зэрымыс авиационнэ системэхэм афэгъэхьыгъэхэм нэIуасэ зафашIыгъ.

Апэ МКъТУ-м иректорэу Къуижъ Саидэ официальнэ зэIукIэгъу дыряIагъ, ащ Дзэ егъэджэн гупчэм Iофэу ыгъэцакIэрэр къафиIотагъ, IэпэIэсэныгъэ зыхэлъ кадрэу агъэхьазырхэрэм ягугъу къафишIыгъ. МКъТУ-м хэхьэрэ Дзэ егъэджэн гупчэм студентхэр Урысые Федерацием и УIэшыгъэ КIуачIэхэм фегъэхьазырых.

Лъэпкъ проектэу «Беспилотные авиационные системы» зыфиIорэм игъэцэкIэн къыдыхэлъытагъэу Мыекъопэ къэралыгъо технологическэ университетым пилот зэрымыс авиационнэ системэхэм афэгъэзэгъэщт кадрэхэм ягъэхьазырын Iофыр егъэцакIэ, лъэпкъ проектым игупчэу щыт. Апшъэрэ еджапIэм зэпыугъо имыIэу студентхэм ягъэхьазырын щэкIо, компаниехэр ыкIи къэралыгъо учреждениехэр псынкIэу хъэхъоныгъэ зышIырэ авиационнэ системэхэм адиштэщт специалистхэм ащымыкIэнхэм афэшI.

Егъэджэн-ушэтын лабораториеу «Проектирование, эксплуатация и ремонт БПЛА» зыфиIорэр анахь мэхьанэ зиIэ объектхэм ащыщ, курсантхэм ыкIи студентхэм пилот зэрымыс быбырэ аппаратхэм ядвигательхэр зыфэдэхэр щызэрагъашIэ, непэрэ проектированиер агъэцакIэ. Къыхагъэщыгъэр 3D-хэутыныр ары, ащ ишIуагъэкIэ пкъыгъохэу аппаратмэ ящыкIагъэхэр агъэхьазырых, корпусри гъэIорышIэнри игъусэхэу. Джащ фэдэу студентмэ зэрагъашIэ технологие кIэ дэдэу щыт радиоэлектроннэ бэнэныр ыкIи разведкэр.

Студенческэ конструкторскэ бюром (СКБ) студентхэр зэрепхых, ахэмэ конструкциякIэхэр пилот зэрымысхэм апае агъэпсых, ягъэIорышIэн идэгъугъэ хагъахъо. Мыщ инженер ныбжьыкIэхэм практическэ амалыкIэхэр щагъоты, программированиер, конструированиер ыкIи тестированиер. ГугъапIэ къэзытрэ проектхэм ащыщыр — «Динамика Полета» зыцIэр, дронхэу 3D-хэутыныр агъэфедэзэ агъэIорышIэхэрэм ягъэпсын дэлажьэ. Студенческэ акселераторэу «ИнноВектор» зыфиIорэм проектыр щыхахыгъ.

ХьакIэмэ егъэджэн аудиториехэр къаплъыхьагъэх — классэу дзэ-политическэ ухьазырныгъэр зыщакIурэр, еджэным фытегъэпсыхьэгъэ Iашэр зыщаIыгъ унэр, пилот зэрымыс быбырэ аппаратхэр зыщагъэцэкIэжьыхэрэр, компьютернэ классэу симуляционнэ оборудование зычIэтыр, джащ фэдэу классэу тактикэ-хэушъхьафыкIыгъэ ухьазырныгъэр зыщакIурэр, ащ комплексэу БПЛА-м епхыгъэ «Тахион» зыцIэр къыщагъэлъэгъуагъ. Непэрэ егъэджэкIэ амалэу агъэфедэхэрэми защагъэгъозагъ, тапэкIэ гупчэм хэхъоныгъэу ышIын ылъэкIыщтхэм атегущыIагъэх

ЗэIукIэгъум къыдыхэлъытагъэу Саидэ Казбек ыпхъум хьакIэхэр къэгъэлъэгъопIэ экспозицием нэIуасэ фишIыгъэх, Мыекъопэ къэралыгъо технологическэ университетым ыгъэхъагъэхэмрэ иинновационнэ IэшIагъэхэмрэ, джащ фэдэу студенческэ проектнэ командэхэу аэротехнологием ылъэныкъокIэ зэхащагъэхэр ащ хэтых. Экспозицием а симуляционнэ манекенхэр ыкIи роботхэр къыделъытэх, ахэр Дзэ егъэджэн гупчэм икурсантхэм яегъэджэн пае агъэфедэх.

Денис Мантуровым студентмэ ядзэ ухьазырныгъэ зэрэлъэшыр къыхигъэщыгъ, Мыекъопэ къэралыгъо технологическэ университетым научнэ амалэу иIэхэм осэшхо къафишIыгъ, научнэ ушэтынхэм ыкIи промышленнэ зэдэлэжьэныгъэхэм адэIэпыIэнэу гугъапIэ къытыгъ. Адыгэ Республикэм и ЛIышъхьэу КъумпIыл Муратэ гъэсэныгъэ программэхэр армием ыкIи ухъумэным ихъызмэтшIапIэхэм апышIагъэу зэрагъэпсыгъэхэм имэхьанэ къыкIигъэтхъыгъ, хэгъэгум итехнологическэ хэхъоныгъэкIэ амалышIоу ылъытагъ.