Непэ Мыекъопэ къэралыгъо технологическэ университетым еджапIэхэм ыкIи колледжхэм къычIатIупщыщт нэбгырэ 300-м ехъумэ япчъэхэр къафызэIуихыгъэх.

Iофтхьабзэм къыдыхэлъытагъэу МКъТУ-м учIэхьаным ыпэкIэ сэнэхьатым икъыхэхын епхыгъэ гъэсэныгъэ зыщызэрагъэгъотырэ Гупчэм ипащэу Олег Франко университетым амалэу иIэхэр зыфэдэхэр къыIотагъэх.

— Студентмэ яIэпэIэсэныгъэ ыкIи ежьхэм ашъхьэкIэ хэхъоныгъэ ягъэшIыгъэным университетым мэхьанэшхо щыраты. МКъТУ-р федеральнэ проектхэм ахэлажьэ, инновационнэ стратегиеу хэхъоныгъэмкIэ иIэм сэнэхьатхэу непэрэ мафэм ящыкIагъэхэм анэIу афегъазэ. Гъэсэныгъэ процессым  иIофыгъо шъхьаIэхэм ащыщэу къэнэжьы академическэ ухьазырныгъэр ыкIи инновациехэм афытегъэпсыхьэгъэнхэр, джащ фэдэу зэхъокIныгъэу хъухэрэм псынкIэу университетым адыригъэштэныр,— къыIотагъ Олег Франко.

Университетым ипроект шъхьаIэхэм лъэтегъэуцохэр афашIыгъэх. Ахэмэ ащыщых — проектнэ практикумыр, ащ ишIуагъэкIэ студентмэ социальнэ гумэкIыгъохэр зэшIуахын алъэкIы, яIэпэIэсэныгъэ рахьылIэ, джащ фэдэу акселераторыр, ащ студентмэ ушэтынэу ашIыгъэхэр экономикэм исектор щагъэфедэх. Федеральнэ проектэу «Платформа университетского технологического предпринимательства» зыфиIорэм къыдыхэлъытагъэу студентмэ амал яIэ мэхъу яунэе бизнес рагъэжьэнымкIэ сомэ миллион къаратынэу.

Приемнэ комиссием пшъэдэкIыжь зыхьырэ исекретарэу Бэрзэдж Розэ къыIотагъ университетым сэнэхьатэу зыфеджэнхэу къапигъохыхэрэр зыфэдэхэр, ухьазырныгъэр зэракIущт шIыкIэр, бюджетнэ чIыпIэу 2025-рэ илъэсым МКъТУ-м къытырэр зыфэдизыр, джащ фэдэу документхэр зэрэптыщтхэм шапхъэу пылъхэр ыкIи стипендиехэм ятыкIэ изытет.

Мэкъуогъум и 20-м къыщегъэжьагъэу абитуриентхэм заявлениехэр зэратыщт онлайн-тыным Iоф ышIэу ригъэжьэщт, ар университетым иофициальнэ сайт е унэе кабинетым щыптын плъэкIыщт, джащ фэдэу порталэу Госуслуги зыфиIорэмкIэ Суперсервисэу «Поступление в вуз онлайн» зыфиIорэр бгъэфедэзэ.

— МКъТУ-м ипчъэ зэIухыгъэхэм ямафэ — ар сэнэхьатхэм ядунай ухэхьанымкIэ экскурсие шIагъу. НыбжьыкIэмэ сэнэхьатэу къыхахын алъэкIыщтмэ зэкIэмэ нэIуасэ зэрафэтшIыщтхэм тыпылъ, гукъэкIхэмкIэ гукъыдэчъ яIэным тыщэгугъу, — къыхигъэщыгъ МКъТУ-м учIэхьаным ыпэкIэ сэнэхьатым икъыхэхын епхыгъэ гъэсэныгъэ зыщызэрагъэгъотырэ Гупчэм ипащэу Олег Франко. 

Iофтхьабзэм ыуж абитуриентхэр факультетхэм яблэгъагъэх, егъэджэн процессым нахь благъэу ахэм нэIуасэ ащыфэхъугъэх, янеущрэ сэнэхьатхэр зыфэдэщтхэр нахь куоу ащызэрагъэшIагъ.