Непэ Мыекъопэ къэралыгъо технологическэ университетым научнэ-практическэ конференциеу «Хабзэу лIэшIэгъухэм къахэкIыгъэр — Адыгэ ИлъэсыкIэр» зыфиIорэр щырагъэкIокIыгъ.

Мэкъумэщ продукцием икъыдэгъэкIын технологиехэм якафедрэ ипащэу Мамсыр Нурбыйрэ доцентэу  Мария Галичевамрэ Iофтхьабзэм изещэкIуагъэх.

Iофтхьабзэм ипэублэм конференцием хэлажьэрэмэ шIуфэс къарихыгъ мэкъу-мэщ технологиехэм яфакультет идеканэу Шъхьапэцэ Аслъанэ. Адыгэ ИлъэсыкIэу къихьэрэмкIэ ар зэкIэмэ къафэгушIуагъ, ащ тарихъ кIуачIэу иIэр, лIэшIэгъухэм зэряпхыгъэр, лъэпкъым ихабзэхэм зэращыщыр къыIуагъ.

Конференцием джащ фэдэу хэлэжьагъэх Адыгэ Республикэм и Лъэпкъ музеим иэтнографхэр, МКъТУ-м истуденческэ сообществэ ыкIи Политехническэ колледжым ялIыкIохэр.

Научнэ программэм адыгэмэ якультурэ ыкIи ятарихъ къизыIотыкIырэ докладищ къыщашIыгъ:

— Мэкъумэщ продукцием икъыдэгъэкIын технологиехэм якафедрэ ипащэу Мамсыр Нурбый докладэу «Адыгэмэ ямэкъу-мэщ культурэ хэт тарихъ лъэпкъхэр: хабзэ хъугъэ чIыгулэжьыным имэхьанэрэ икъэухъумэнрэ» зыфиIорэр къышIыгъ;

— Тарихъ шIэныгъэхэмкIэ кандидатэу, тарихъым ыкIи правэм икафедрэ идоцентэу Цунтыжъ Римэ докладэу къышIыгъэм ыцIагъэр «Адыгэ ИлъэсыкIэм ихэгъэунэфыкIын пылъ хабзэ-нэшанэхэр» зыфиIорэр;

— Адыгэ Республикэм и Лъэпкъ музей ипащэ игуадзэу Шэуджэн Нальмэс докладэу «Адыгэ Республикэм и Лъэпкъ музей ичъыгхатэ» зыфиIорэр къышIыгъ.

Конференцием ихьакIэхэр нэужым мастер-классхэу адыгэ IэпэIасэхэм яIэшIагъэхэр къизыIотыкIыхэрэм ыкIи мэкъу-мэщ технологиехэр зыфэдэхэр языгъашIэхэрэм ахэлэжьагъэх. Пхъэшъхьэ-мышъхьэ чъыгхэм комакIэхэу нэмыкI чъыг лъэпкъхэм ащыщыхэр къазэрэгуагъакIэхэрэр, ар зэрашIырэ шIыкIэр арагъэлъэгъугъ, джащ фэдэу дышъэидэным фагъэсагъэх. Ижъырэ хабзэхэм алъыIэсыгъэхэ къодыеп, ахэм практикэмкIэ защагъэгъозагъ, къыкIэлъыкIорэ лъэужхэм апае къэгъэнэжьыгъэным ыкIи лъыгъэкIотэгъэным иIоф джащ тетэу хэлэжьагъэх

Гимназиеу №22-м икIэлэеджакIохэр документальнэ роликэу «Возрождение аутентичных сортов сельскохозяйственных культур адыгов» зыфиIорэм рагъэплъыгъэх, ар ныбжьыкIэхэм япроектхэм я Урысые зэнэкъокъоу «Гухэлъым факIу» зыфиIорэм хэлажьэ.

Ащ фэшъхьафэу, конференцием хэлэжьагъэхэр адыгэ шхыныгъохэм ахэIагъэх. ЗэлъашIэрэ Адыгэ шъоур — ар дышъэпс, иIэшIугъэкIэ ыкIи федэу иIэмкIэ зэлъашIагъ. Гъэщымрэ лымрэ ахэшIыкIыгъэ гъомлапхъэхэри Iанэмэ къатыралъхьагъэх, хьакIэмэ апагъохыгъэх. Iофтхьабзэм тематическэ къэгъэлъэгъонэу «Адыгэмэ ямэкъу-мэщ хъызмэтэу хабзэ хъугъэр» зыфиIорэр хэтыгъ.

Iофтхьабзэр адыгэ ИлъэсыкIэм игъэмэфэкIын епхыгъэ хабзэ зекIуакIэхэмкIэ зэфашIыжьыгъ.  ХьамщунтIэ чъыгыр конференцием хэлажьэрэмэ агъэкIэрэкIагъ, къуаехэр, шэф остыгъэхэр пашIагъэх, илъэс гъэбэжъур, нэфыр ыкIи кIэм икъэкIон ахэм къарэкIы.