Мыекъопэ къэралыгъо технологическэ университетым проектэу «Мэкъу-мэщ классхэр» зыфиIорэм къыдыхэлъытагъэу кIэлэеджакIохэм егъэджэн дэкIыгъо афызэхищагъ, Адыгэ Республикэм и Автономнэ учреждениеу «Республикэ бизнес-инкубаторыр» зыфиIорэр арагъэлъэгъугъ. Мы проектыр зыфытегъэпсыхьагъэр къуаджэмэ ащеджэхэрэр мэкъу-мэщ сэнэхьатхэр къыхахынхэм фэщэгъэнхэр ары.

ДэкIыгъо экскурсиер зыфэгъэхьыгъагъэр темэу «Органическэ чIыгулэжьыныр ыкIи ащ Адыгэ Республикэм хэхъоныгъэхэр щегъэшIыгъэнхэр», ар зэрищагъ мэкъу-мэщ продукцием ипроизводствэ итехнологиехэм якафедрэ ипащэу, мэкъу-мэщ шIэныгъэхэмкIэ докторэу Мамсыр Нурбый.

«Республиканскэ бизнес-инкубаторым» ипащэ ипшъэрылъхэр зыгъэцакIэрэ Хьасанэ Махьмудэ учреждением мэхьанэу иIэр зыфэдэр кIэлэеджакIохэм къафиIотагъ, гурыт ыкIи бизнес цIыкIум зэрэдэIэпыIэхэрэр, мэкъу-мэщ проектыкIэхэр зэрэзэхагъэуцохэрэр, инновационнэ производствэм зэрэхагъахъорэр. Мэкъу-мэщ классхэм ащеджэрэмэ, МКъТУ-м мэкъу-мэщ технологиехэмкIэ ифакультет истудентхэм производствэ чIыпIэ зэфэшъхьафэу мыщ иIэхэр къаплъыхьагъэх.

Экскурсием хэлэжьагъэ кIэлэеджакIохэр практическэ лъэныкъом хилъэсэгъагъэх, агротехнологическэ процессхэр зэрагъэшIагъэх. ФэбапIэмэ къащагъэкIырэ хэтэрыкIхэм хэушъхьафыкIыгъэу зэрапылъхэм защагъэгъозагъ, пхъэшъхьэ-мышъхьэхэм якъэгъэкIын зэрэдэлажьэхэрэр, псыр гъоткIо-гъуаткIоу ахэм зэраIэкIэгъахьэрэр зэрагъэлъэгъугъ. Джащ фэдэу былымхэр гъэщ фермэхэм зэращаIыгъхэр, зэрадэзекIохэрэр ашIагъэх.

Мэкъу-мэщ классхэм ащеджэхэрэр производственнэ хъызмэтшIапIэмэ ахэщэгъэнхэр — ар мэкъу-мэщым изытет шъыпкъэ нэIуасэ фэшIыгъэнхэмкIэ амал дэгъу дэд, непэрэ уахътэм технологиехэу мэкъу-мэщым щагъэфедэхэрэр, анахьэу къыхагъэщырэ лъэныкъохэр зэрагъашIэх.

Мыщ фэдэ Iофтхьабзэмэ яшIуагъэкIэ кIэлакIэмэ ашIэу мэхъу гъомлапхъэм гъогоу къыкIурэр, «шъофым къыщегъэжьагъэу тучан мэкIаем нэс», мэкъу-мэщ секторым къыхиубытэрэ сэнэхьатмэ нахь благъэу нэIуасэ афэхъух, мэкъу-мэщ хъызмэтым обществэмкIэ мэхьанэу иIэр зэхашIэ.