Гъэтхэ гъэсэныгъэ Iофтхьабзэхэм къадыхэлъытагъэу химиемкIэ Мыекъуапэ и Православнэ гимназие икIэлэеджакIохэм апае Мыекъопэ къэралыгъо технологическэ университетым лабораторнэ десэхэр щыкIуагъэх.

Химием ыкIи физикэ-химическэ методхэм яушэтынкIэ кафедрэм идоцентхэу Марина Стальная ыкIи Наталья Сичко Iофтхьабзэм изэхэщэкIуагъэх.

Курсэу кIэлэеджакIомэ апашъхьэ ралъхьэрэм еджапIэм ащырагъашIэрэмрэ апшъэрэ еджапIэм щакIурэмрэ зэпэблагъэ шIыгъэнхэр ипшъэрылъых. Ащ амал еджэрэмэ къареты IофыгъуакIэу къафыкъокIыхэрэм тIэкIу-тэкIоу щыгъозэнхэр, кIэлэегъаджэми есэнхэр. Десэмэ анахьыбэрэр еджапIэм щагъэцакIэ, ежьхэмкIэ Iэрыфэгъоу ар зэрэщытыр къыдалъытэзэ. Курсым иятIонэрэ Iахь университетым ибазэ щырагъэкIокIы, апшъэрэ еджапIэм ищыIакIэ хэгъозэнхэмкIэ ишIуагъэ ащ къэкIо.

Программэр апшъэрэ классхэм арысхэу чIэтIупщыгъом нэсыгъэхэм ателъытагъ, анахьэу химиер зышIогъэшIэгъонхэм, апшъэрэ еджапIэм химикэ-технологическэ, фармацевтическэ, биологическэ ыкIи медицинскэ сэнэхьатхэр къыхэзыхыщтхэм.

Эксперимент шIыкIэм тетэу кIэлэеджакIохэр зэрэрагъэджагъэхэм, химическэ лабораторием зэрэщагъэгъозагъэхэм неущрэ мафэм къыхахыщт сэнэхьатым Iо хэмылъэу нахь пэблагъэ ахэр ышIыгъэх.

Iофтхьабзэм икIэухым кIэлэеджакIохэр нэIуасэ афашIыгъэх «Химиер» ыкIи «Химическэ технологиер» зыфиIохэрэ лъэныкъохэм, къыхагъэщыгъ, ахэм ащеджагъэхэр нэужым дэгъу дэдэу химическэ лабораториехэу зэфэшъхьаф производствэхэм ыкIи фармацевтическэ промышленностым Iоф зэращашIэрэр.