Форумым ипрограммэ къыдыхэлъытагъэу генетическэ зэмылIэужыгъом нэIуасэ фэхъугъэхэ къодыеп, практикэмкIэ ащ Iоф зэришIэрэр  зэрагъэшIагъ. Мыекъопэ опытнэ станцием щыIагъэх — ВИР-м, Федеральнэ ушэтын гупчэу  Н.И. Вавиловым ыцIэ зыхьырэ Урысые ушэтын институтым икъутамэ, Гъозэрыплъэ дэт Кавказскэ къэралыгъо чIыопс биосфернэ заповедникэу  Х.Г. Шапошниковым ыцIэ зыхьырэм.

Апшъэрэ еджапIэм игъусэгъухэу форумыр адызэхэзыщагъэхэр акIыгъухэу Адыгеим ишIэныгъэлэжь учреждениехэм яIофшIэн хилъэсагъэх. Ахэмэ зэрагъэшIагъ методикэу ДНК-м ианализ зэрагъэунэфырэр, ащ пае непэрэ Iэмэпсымэхэр агъэфедэхэзэ. Джащ фэдэу нэIуасэ зэфашIыгъ къэкIыхэрэм ягенетическэ коллекцие, чылапхъэхэр аухъумэнхэу зэрагъэтIылъыщтыгъэр, ахэр зэрагъэкIэжьыхэрэр.

ШIэныгъэ къызхахыгъэ экскурсие афызэхищагъ станцием ипащэ игуадзэу Евгения Добренковам.

Мафэм иятIонэрэ кIэлъэныкъо Кавказым ибиозэмылIэужыныгъэ фэгъэхьыгъагъ. ШIэныгъэлэжь IофшIэкIо шъхьаIэу, биологие шIэныгъэхэмкIэ кандидатэу Юлия Акатовам игъэкIотыгъэу эндемичнэ къэкIырэ лъэпкъ зэфэшъхьафхэу макIэ хъухэрэмэ къатегущыIагъ, ахэмэ тиэкосистемэкIэ мэхьанэу яIэр къыхигъэщыгъ.

Экскурсиеу вольернэ комплексым щыкIуагъэри гъэшIэгъоныгъ. Кавказ псэушъхьэу хэсхэм хьакIэхэр нэIуасэ фэхъугъэх, мэзчэтыум илъэсгъогу рыкIуагъэх. Эко гъэсэныгъэмкIэ методистэу Валентина Куцаям къыхигъэщыгъ, ныбжьыкIэхэр тыкъэзыуцухьэрэ дунаим нахь ыгъэгумэкIыхэу, яэкологическэ гъэсэныгъэ хагъахъоу аужырэ уахътэм хъугъэ.

Форумым хэлэжьагъэмэ осэшхо зиIэ шIэныгъэхэр агъотыгъэх, ащ дакIоу тичIыопс идэхагъэ щыгъозагъэх. Ахэр лъэшэу афэразэх зэхэщакIохэм, ахэм яшIуагъэкIэ Адыгеим икъушъхьэхэр, ахэм ашъхьапэхэу гъэшIэрэ ос-мыл зэхэлъхэр зытелъхэр алъэгъугъэх.