Мыекъопэ къэралыгъо технологическэ университетым имагистратурэ ия 2-рэ курс щеджэрэ Фарида Мстоевар амбассадори 100-у Урысые проектэу «Профразвитие» зыфиIорэм хэлажьэхэрэм ащыщ хъугъэ, ар президентскэ платформэу «Урысыер— амалыбэхэм яхэгъэгу» зыфиIорэм къыдыхэлъытагъэу зэхащэ.

Заявкэ 1000-м ехъу Урысыем ишъолъыр 43-мэ ялIыкIо анахь студент дэгъухэм атыгъ, ахэм япроектхэм уасэу яIэхэр къаушыхьатыжьзэ лъагъэкIотэнхэ фае, IэпэIэсэныгъэ Iофтхьабзэхэр зэхащэщтых, ныбжьыкIэхэр сэнэхьатхэм афэщэгъэнхэмкIэ гукъэкIхэр афашIыщтых. Адыгэ Республикэр мэхьанэшхо зэратырэ сообществэм Фарида Мстоевам къыщигъэлъэгъощт.

Зэпыугъо имыIэу Фарида ныбжьыкIэ Iофтхьабзэмэ ахэлажьэ, дунэе методическэ зэнэкъокъоу «Новая наука» зыфиIорэм щытекIуагъ, фестивалэу «Дни Архитектуры» зыфиIорэм апэрэ чIыпIищхэм ащыщыр къыщихьыгъ ыкIи чемпионатыр шапхъэу WorldSkills зыцIэм тетэу зэхищагъ.

— Проектэу «Профразвитие» зыфиIорэм амалыкIэхэр студентхэм къафызэIуехы. Ар зы лъэубэкъушIу профессиональнэ хэхъоныгъэ шIыгъэнымкIэ, IофыгъуакIэхэм алъыIэсынхэмкIэ. Джащ фэдэу зэпхыныгъэхэр гъэпытэгъэнхэмкIэ, трендыкIэхэм нэIуасэ афэхъунхэмкIэ федэу щыт. Сэ сызещакIошъ, опытэу ыкIи шIэныгъэу сиIэмкIэ нэмыкIхэм садэгощэщт,  студентхэм сэнэхьатыкIэхэр къагъотынхэмкIэ садэIэпыIэщт, ащ дакIоу сэри хэхъоныгъэхэр сшIыщтых,  — къыхегъэщы Фаридэ. 

Проектым иамбассадорхэм «Профразвитие» зыфиIорэр шъолъырым ыкIи федеральнэ лъэгапIэхэм защаушэтыщт, шIуагъэ къэзытыщт гукъэкIхэр щыIэныгъэм щыпхыращыщытых, ныбжьыкIэмэ адеIэщтых. IофшIэныр рамыгъажьэзэ, ахэм гъэсэныгъэ программэр акIущт. Илъэсым къыкIоцI ашIагъэ Iофыр бонусхэмкIэ ыкIи гъусэгъумэ япроектхэмкIэ къахагъэщыщтых.

—  «Профразвитие» зыфиIорэм хэлэжьэщтхэ амбассадорхэм якъыхэхын — ар ныбжьыкIэ сообществэмкIэ мэхьанэшхо зиIэ лъэубэкъу, хэгъэгум инеущрэ мафэ зэрахъокIыщт. Заявкэ 1000-м зэкIэмкIи 100 къыхэтхыгъэр. Ахэр зизаявкэхэр ыпэкIэ плъэхэу, гухэлъмэ афэкIорэ студентых, ялэгъухэр IофыгъошIухэм къафагъэущыщтых. ТапэкIэ Iофыбэ джыри щыI, ау тшIошъ мэхъу гъэхъагъэхэр зэрашIыщтхэр! — къыкIигъэтхъыгъ платформэу «Урысыер — амалыбэхэм яхэгъэгу» зыфиIорэм игенеральнэ пащэ игуадзэу Геннадий Гурьяновым.

Фарида Мстоевам амбассадор Iофыр къызэрэхихыгъэм къегъэлъагъо МКъТУ-м истудентхэм ухьызырыныгъэ ин зэряIэр.