Мыекъопэ къэралыгъо технологическэ университетым мэкъу-мэщ технологиехэмкIэ ифакультет гъомлапхъэхэм ятехнологие ыкIи шхыныгъохэм ягъэхьазырын икафедрэ студентхэм ямагистерскэ диссертациехэр къыщаухъумагъэх. Илъэс пчъагъэхэм зэреджагъэхэм язэфэхьысыжьэу ыкIи гъомлэпхъэ отраслэм щылэжьэщтхэм яIэпэIэсэныгъэ иуцунэу ар хъугъэ.

Отраслэм иэксперт пэрытхэр ары IофшIагъэхэм уасэ афэзышIыгъэхэр. Къэралыгъо ушэтын комиссием хэхьагъэх  гъомлапхъэхэм ятехнологие ыкIи шхыныгъохэм ягъэхьазырын икафедрэ ипащэу Хьаткъо Зурет, ООО «Флорин» зыфиIорэм ипащэу Хъот Мариет, шхыныгъохэр зыщагъэхьазырырэ хъызмэтшIапIэу «Производство кулинарной продукции» зыфиIорэм игенеральнэ пащэу (Магаданскэ хэку) Марина Басовар, джащ фэдэу УФ-м и Банк Гупчэ хэхьэрэ Урысыем и Банк ишхапIэ ипащэу Шаймет Авесовнэр.

Ушэтын IофшIэнхэм темэу бэ къызэлъаубытыгъэр, ахэмэ ащыщыгъ инновационнэ производствэр ыкIи псауныгъэм епхыгъэ шхыныгъохэр.

ГущыIэм пае, Наталья Мягкаям ушэтынэу «Влияние видов молока и их комбинаций на показатели качества сыра «Моцарелла» зыфиIорэр къытыгъ. Щэр зэфэшъхьафэу зэрэзэтекIырэр, ар къуаем иIэшIугъэ зэфэшъхьафыным фэшI зэрагъэфедэрэ шIыкIэр иIофшIагъэ къыщыхигъэщыгъ. Дунам анахь щызэлъашIэрэ къуаем ишIыкIэ нахьышIу шIыгъэнымкIэ IофшIагъэр агъэфедэшъущт.

Людмила Мартынкэм функциональнэ шхыныгъохэм нахь зафигъэзагъ. Ащ ипроектэу «Разработка рецептуры и технологии овсяного киселя функционального назначения» зыфиIорэр цIыфхэу хэушъхьафыкIыгъэу шхэнхэу щытхэм къашъхьэпэщт. Псауныгъэм епхыгъэ шхыныгъохэмкIэ лъэныкъуакIэхэр къызэIуехых, диетологхэм къашъхьэпэщт, жъугъэу къыдагъэкIын ылъэкIыщт.

Ушэтын комиссием хэтхэм студентхэм яухьазырыныгъэ осэшхо къыфашIыгъ, ахэм якуугъэ, шIэныгъэу ахэлъыр къыхагъэщыгъ. КъычIатIупщырэ пэпчъ иIэпэIэсэныгъэ зыщигъэфедэщт лъэныкъохэр гъэнэфагъэхэ хъугъэ.