Сэнэхьатхэр зыщыхагъахъохэрэ Адыгэ республикэ институтым Адыгеим ишIэныгъэлэжь ныбжьыкIэхэм ыкIи испециалистхэм я Совет изэхэсыгъо щыкIуагъ. Ащ хэлэжьагъэхэр яушэтынхэмкIэ зэдэгощагъэх ыкIи шIэныгъэ проектыкIэхэм атегущыIагъэх.

Зэхэсыгъом хэлэжьагъэх апшъэрэ еджапIэхэм, колледжхэм ыкIи профессиональнэ гъэсэныгъэ тедзэм иучреждениехэм ялIыкIохэр, ахэм ащыщыгъэх Мыекъопэ къэралыгъо технологическэ университетым иIофышIэхэр: доцентэу Iэшъынэ Анжеликэ, научнэ IофышIэхэу Екатерина Колодинар ыкIи Кудайнет Саидэ, магистрантэу Тимур Макаровыр.

ШIэныгъэ темэ зэфэшъхьафхэмкIэ зэIукIэгъум докладхэр къыщашIыгъэх. Гъэсэныгъэмрэ шIэныгъэмрэкIэ АР-м и Министерствэ испециалистэу ХъуакIо Светланэ республикэм иеджапIэхэм научнэ сообществэу ащылажьэхэрэм ягугъу къышIыгъ. Технологиехэм, машинэхэм ыкIи гъомлэпхъэ производствэм иIэмэпсымэхэм якафедрэ идоцентэу, техническэ шIэныгъэхэмкIэ кандидатэу Iэшъынэ Анжеликэ къыIотагъ чIыопс детоксикантхэр шъонхэр къыдэгъэкIыгъэнхэмкIэ зиэкологие дэй шъолъырхэм зэращагъэфедэхэрэр.

Научнэ-ушэтэкIо лабораториеу «Инновационные пектиносодержащие композиции полифункционального назначения для производства импортозамещающих функциональных пищевых продуктов и средств» зыфиIорэм ишIэныгъэлэжь IофышIэу Екатерина Колодинам глютеныр ыкIи сорбционэхэр нахь макIэу зыхэлъ печеньехэм ятехнологиеу къаугупшысыгъэр къыгъэлъэгъуагъ.

Пектиныр зыхэлъ къуаехэу нахьыбэрэ мыкIодэу щагъэлъын алъэкIыхэрэм афэгъэхъьыгъэ доклад къышIыгъ МКъТУ-м и НИИСХ биотехнологиемкIэ научнэ-гъэсэныгъэ гупчэу иIэм ишIэныгъэлэжь IофышIэу Кудайнет Саидэ.

МКъТУ-м имагистрантэу Тимур Макаровым зэзым мыжъо ихъощтмэ къэзгъэнафэрэм игугъу къышIыгъ.

Научнэ гукъэкIхэмкIэ зэхъожьынхэм, лъэныкъуакIэхэр къыхагъэщынхэм зэхэсыгъор фэIорышIагъ, шъолъырым ишIэныгъэлэжь ыкIи испециалист ныбжьыкIэхэр чанэу зыщыхэлажьэхэрэ площадкэ хъугъэ.