Мыекъопэ къэралыгъо технологическэ университетым ШIэныгъэлэжьхэм ясовет изэхэсыгъо щыкIуагъ, ащ тхьаматагъор щызэрихьагъ ректорэу Къуижъ Саидэ.

УпчIэ шъхьаIэхэм анэмысхэзэ Къуижъ Саидэ апшъэрэ еджапIэм иIофышIэхэм афэгушIуагъ — Татьяна Колотийрэ Едыдж Саидэрэ, ахэмэ сэнэхьатэу «Гъомлэпхъэ системэхэр» зыфиIорэмкIэ доцентыцIэр къафагъэшъошагъ. Профессорскэ-кIэлэегъэджэ купым щыщхэм хабзэ зэрэхъугъэу ректорыр афэгушIуагъ.  

Апшъэрэ ыкIи гурыт гъэсэныгъэм ипрограммэ къыдилъытэрэ упчIэ шъхьаIэмкIэ зэхэсыгъор рагъэжьагъ, приемыр зэрэкIорэм, ыпкIэ зыхэлъ егъэджэнымкIэ зэзэгъыныгъэхэм язэхэгъэуцон, приемым иконтрольнэ цифрэхэр зыфэдэхэм ыкIи нэмыкIхэм къатегущыIагъ МКъТУ-м иприемнэ комиссие пшъэдэкIыжь зыхьырэ исекретарэу Бэрзэдж Розэ.

УпчIэу «Университетым 2024-рэ илъэсым хэхъоныгъэ егъэшIыгъэным и Программэ» зыфиIорэмкIэ къэгущыIагъ ректоратым иупчIэжьэгъоу Сергей Чефрановыр. Ащ агу къыгъэкIыжьыгъ, 2023–2032-рэ илъэсхэм МКъТУ-м хэхъоныгъэ егъэшIыгъэнымкIэ Программэу щыIэм, шIэныгъэмрэ гъэсэныгъэмрэкIэ УФ-м и Министерствэ ыштагъэм, университетым икъэгъэлъэгъон 29-рэ зэрэхахьэрэр, джыри 18 МКъТУ-м икъутамэу пос. Яблоновскэм щыIэм зэрэхэтыр. Программэм Iофтхьабзи 120-рэ къыхеубытэ, сомэ млрд. 1,8-рэ пэIохьэ.  Ащ ипшъэрылъ шъхьаIэр — профиль зэфэшъхьафыбэ хъурэ инженернэ-техническэ апшъэрэ еджапIэр проектнэ IофшIэным ыкIи технологическэ предпринимательствэм ягупчэу гъэнэфэгъэныр ары,   Адыгеим ыкIи Къыблэ-Урысыем исоциальнэ-экономикэ хэхъоныгъэ егъэшIыгъэным дэлэжьэгъэныр.  

2024-рэ илъэсым университетым гъэхъэгъэшхохэр ышIыгъэх:

— Рейтинг ин зиIэ журналхэм тхыгъабэхэр къащыхаутынхэр.

— Гъусэгъухэм япчъагъэ нахьыбэ шIыгъэныр ыкIи шъолъыр проектхэм нахьыбэрэ ахэлэжьэгъэныр.

— Материальнэ-техническэ базэм игъэкIэжьын, ащ лабораторнэ Iэмэпсымэхэри хэхьэх.

— Дзэ егъэджэн гупчэм УФ-м и УIэшыгъэ КIуачIэхэм зэзэгъыныгъэ шIыкIэмкIэ къулыкъу ащызыхьыщтхэм ягъэхьазырын епхыгъэ стратегическэ проектыр кIэухым щынэгъэсыгъэныр.  

— Научнэ-гъэсэныгъэ кластерэу агробиотехнологием фэгъэхьыгъэм хэхъоныгъэхэр егъэшIыгъэнхэр, къэкIырэ лъэпкъыкIэхэр къахэщыгъэнхэр.

2025-рэ илъэсым телъытагъэу университетым Iофтхьабзэ 20 щырахъухьэ, ахэмэ научнэ-инновационнэ амалхэр къатыщтых, дунэе зэзэгъыныгъэхэр гъэпытэгъэнхэмкIэ,  ИТ-системэхэу федеральнэ платформэмэ япхыгъэхэр лъыгъэкIотэгъэнхэмкIэ, экосистемэм, технологическэ предпринимательствэм ныбжьыкIэ инновационнэ гукъэкIхэмрэ командэхэмрэ зягъэушъомбгъугъэнымкIэ  IофыгъошIущтых. ШIэныгъэ советым университетым хэхъоныгъэхэр ышIынхэмкIэ и Программэ имэхьанэ къыщыхагъэщыгъ,   федеральнэ ыкIи лъэпкъ проектхэм зэрахэлэжьэщтхэм, грантовэ мылъкур къещэлIэгъэнымкIэ ашIэщтхэм атегущыIагъэх.  

Гъэсэныгъэ программэхэмкIэ къэралыгъо ушэтынхэм якомиссиехэм ахэхьащтхэр, ординатурэри зэрахэтэу, агъэнэфагъэх. Адыгэ Республикэм ыкIи Урысые Федерацием и Правительствэ ястипендиехэр зыфагъэшъошэщтхэ студентхэм якандидатурэхэр къыхагъэщыгъэх, джащ фэдэу комплекснэ щынэгъончъэнымкIэ планыр зэхагъэуцуагъ. Ащ къыхеубытэх видеолъыплъэным исистемэ гъэкIэжьыгъэныр, студентхэр ыкIи IофышIэхэр ошIэ-дэмышIэ Iофыгъохэр къэхъухэмэ, корпусым зэрэчIащыщтхэ шIыкIэхэр зэхафыгъэх.  

Зэхэсыгъом икIэухым еджапкIэр къегъэIыхыгъэным фэгъэхьыгъэ упчIэр зэхафыгъ.

Зэхэсыгъом купкI иIэу кIуагъэ, предложениеу къахьыгъэмэ янахьыбэрэмэ адырагъэштагъ.