Шъолъыр псауныгъэм, цIыфхэм ярепродуктивнэ псауныгъэ епхыгъэ упчIэхэм афэгъэхьыгъэ зэхэсыгъо ФедерациемкIэ Советым щыкIуагъ.

Ащ хэлэжьагъэхэр тегущыIагъэх диагностикэм икIун, Iэзэным ыкIи репродуктивнэ псауныгъэм икъэухъумэн афэгъэхьыгъэ Iофыгъохэм, ахэр хэгъэгум хэхъоныгъэ егъэшIыгъэнымкIэ зэрэшъхьаIэхэр къыхагъэщыгъ.

ЗещакIохэм ащыщыгъ Виктория Попандопуло — псауныгъэр къэухъумэгъэнымкIэ Урысыем иминистерствэ илIыкIоу Къыблэ федеральнэ шъолъырым щыIэм мамыкумкIэ, гинекологиемкIэ ыкIи бзылъфыгъэхэм ярепродуктивнэ псауныгъэ къызэтегъэнэжьыгъэнымкIэ штатым хэмыт испециалист шъхьаI, мамыкумрэ гинекологиемрэ якафедрэ ипащ, МКъТУ-м ипрофессор. Ащ докладэу къышIыгъэм репродуктивнэ псауныгъэм епхыгъэ гумэкIыгъохэр зэрэдагъэзыжьхэрэмкIэ Къыблэ федеральнэ шъолъырым иопыт къыщигъэлъэгъуагъ, шIыкIэ хэхыгъэу агъэфедэхэрэмкIэ предложениехэр къафихьыгъэх.

Зэхэсыгъом хэлэжьагъэх федеральнэ хабзэм иорганхэм, псауныгъэм икъэухъумэнкIэ шъолъыр министерствэхэм ялIыкIохэр, мы лъэныкъом фэгъэзэгъэ специалист пэрытхэр. Ахэмэ ащыщыгъэх — УФ-м псауныгъэр къэухъумэгъэнымкIэ и Министрэ игуадзэу Евгения Котовар, УФ-м и Минпромторг и Департамент ипащэу Ольга Кравцовар, УФ-м псауныгъэр къэухъумэгъэнымкIэ и Министерствэ испециалист шъхьаIэу Ирина Моисеевар, хъулъфыгъэхэм ярепродуктивнэ псауныгъэкIэ УФ-м псауныгъэр къэухъумэгъэнымкIэ и Министерствэ испециалист шъхьаIэу Олег Аполихиныр ыкIи нэмыкI экспертхэр.

Урысыем идемографическэ зытет нахьышIу шIыгъэнымкIэ опытэу аIэкIэлъхэмкIэ зэхъожьынхэмкIэ мы площадкэр мэхьанэшхо зиIэ чIыпIэу хъугъэ.