Экологическэ факультетым сэнэхьатэу 20.05.01 «МашIо щынэгъончъэныр» зыфиIорэм щеджэрэ Дарья Гончаровам ичIэтIупщыгъо квалификационнэ IофшIагъэ дэлажьэ, ащ темэу «Икъоу зэхэзымыхыхэрэр машIо щынэгъончъэным фэгъэсэгъэнхэр ыкIи ащ фэгъэхьыгъэ къэбархэр гъэIугъэнхэр» зыцIэр «Къулыкъу ахьызэ рагъаджэх» зыфиIорэ екIолIакIэмкIэ егъэхьазыры.

Социальнэ гъусэр — Адыгэ республикэ еджэпIэ-интернатэу икъоу зэхэзымыхыхэрэр ыкIи зымылъэгъухэрэр зыщырагъаджэхэрэр ары, ащ пшъэрылъ къыгъэуцугъ мэшIогъэкIосэ къэбархэм ятехнологие ауплъэкIунэу ыкIи ащкIэ сабыйхэу макIэу зэхэзыхыхэрэр рагъэджэнхэу. Пшъэрылъыр платформэу  Добро.рф зыфиIорэм къырагъэхьагъ.

Проектым къыдыхэлъытагъэу агъэпсых ыкIи ауплъэкIух информационнэ-гъэсэныгъэ продуктхэу мэшIогъэкIосэным фэгъэхьыгъэ пропагандэхэр, егъэджэнхэр теоретическэу ыкIи практическэу рагъэкIокIых. 

Мэзаем и 19-м Дарья Гончаровам ыкIи я 9-рэ классым щеджэрэ кIэлэеджакIоу икъоу зэхэзымыхырэмрэ Iоф дашIагъ видеопамяткэу «МашIо щынэгъончъэныр» зыфиIорэм изэхэгъэуцон, ар урысыбзэ IэутIабзэм ралъхьагъ.

Социальнэ гъусэм амалхэр зэкIэ МКъТУ-м истудентмэ къапегъохы, ахэмэ общественнэ мэхьанэ зиIэ проектхэр агъэцэкIэнхэм афэшI, мэшIощынэгъончъэным ылъэныкъокIэ яIэпэIэсэныгъэ къазэраIэтыщтым дэлажьэх.  

Проектым икупкI еджэпIэ-итернатым икIэлэеджакIохэм афытегъэпсыхьагъ, ахэм яянэ-ятэхэм, джащ фэдэу Урысыем и МЧС и ГъэIорышIапIэу Адыгэ Республикэм щыIэм иIофышIэхэм, МКъТУ-м истудентхэу сэнэхьатэу 20.05.01 «МашIо щынэгъончъэныр» зыфиIорэм феджэхэрэм, къэгъэнэжьакIохэм я Урысые студенческэ корпус и Адыгэ шъолъыр къутамэ игуфакIохэм, Мыекъопэ къэралыгъо технологическэ университетым и ГуфэкIо мэшIоухъумэкIо гъэIорышIапIэ щылажьэхэрэм.