Профессиональнэ IэпэIэсэныгъэмкIэ зэнэкъокъоу «Профессионалхэр-2025-рэ» зыфиIорэм ишъолъыр едзыгъо Адыгэ Республикэм щылъагъэкIуатэ. Шъолъырым ит колледжхэм ыкIи еджапIэхэм ащеджэхэрэм яшIэныгъэрэ яIэпэIэсэныгъэрэ профессиональнэ лъэныкъуабэхэмкIэ аушэты.

Мыекъопэ къэралыгъо технологическэ университетыр зычIэт унэм лъэныкъоу «Предпринимательство» зыфиIорэмкIэ зэнэкъокъухэр щэкIох. Ащ хэлажьэрэмэ ябизнес-гукъэкIхэр къагъэлъагъох, аудиториер зэфахьысыжьы ыкIи клиентэу афэхъурэм изытет къатхыхьэ. Ахэм яIофшIэн экспертнэ комиссиер ары уасэ фэзышIырэр, япащэр МКъТУ-м идоцентэу  Надежда Продиблох.

МКъТУ-м хэхьэрэ Политехническэ колледжым истудентхэр лъэныкъоу «Мобильнэ приложениехэм язэхэгъэуцон» зыфиIорэм щызэнэкъокъух. Мэфищым къыкIоцI ахэм интерфейсхэр проект ашIыгъэх, анахьэу ищыкIагъэхэр агъэпсыгъэх, агъэцэкIагъэх, щынэгъончъагъэр ауплъэкIугъ, приложениер къыхаутынэу агъэхьазырыгъ. НыбжьыкIэхэу приложениехэм язэхэгъэуцон дэлажьэхэрэмкIэ зэнэкъокъур IэпыIэгъушIу хъугъэ.

Лъэныкъоу «Фармацевтикэм» иапэрэ мафэ студентмэ Iэзэгъу уц препаратхэу аптекэм къащэрэмэ яштэнкIэ зэнэкъокъугъэх, ахэр журналым датхагъэх, товарнэ накладнойхэр къыратхыкIыгъэх, программэу «Кросс аптека» зыфиIорэм хатхагъ. ЯтIонэрэ едзыгъом ахэмэ фармацевтическэ кружокымкIэ лъэтегъэуцо ашIыгъ, ащ Iэзэгъу уцхэр къыщагъэлъэгъуагъэх ыкIи IофышIэмэ яграфик зэхагъэуцуагъ.

Лъэныкъоу «Туризмэм» хэлэжьагъэхэр турагентствэхэм афэдэхэм ащылэжьагъэх. Ахэмэ экскурсионнэ программэхэр, туристическэ лъэсгъогухэр зэхагъэуцуагъэх ыкIи хьакIэегъэблэгъэнымкIэ шIэныгъэу яIэр къагъэлъэгъуагъ.

Лъэныкъоу «Рестораннэ сервисыр» зыфиIорэмкIэ зэнэкъокъур гъомлапхъэхэм ятехнологиехэм ыкIи шхыныгъохэм ягъэхьазырын икафедрэ щыкIуагъ. Эксперт шъхьаIэу осэшIмэ ахэтыгъэр — кафедрэм идоцентэу Мэрэтыкъо Фатим. «ПщэрыхьапIэ зэIухыгъэм» и Модуль ары апэрэ мафэм зэнэкъокъум хэлажьэрэмэ аушэтыгъэр. Ащлъэпкъ зэфэшъхьафэу хъурэ санэхэм защагъэгъозагъэх. ЯтIонэрэ десэм къыдилъытэщтыгъэр хьакIэхэр гъэрэзэгъэнхэр, ащ пае былымылым, мэлылым, тхьачэтылым ыкIи IэшIу-IушIухэм, нэмыкIхэм ахэшIыкIыгъэ шхыныгъо IэшIухэр агъэхьазырынхэр ары.  ЯтIонэрэ мафэм «Бизнес-ланч» зыфиIорэ модулым игъэцэкIэн пылъыгъэх. Ресторан Iофхэм япхыгъэ IофшIэныбэхэмкIэ заушэтыгъ.

Лъэныкъоу «Бухгалтерскэ учетыр» зыфиIорэм хэлэжьагъэмэ бухгалтерхэр мафэ къэс зэуалIэхэрэ Iофыгъохэм язэшIохын дэлэжьагъэх, финансовэ амалэу аIэкIэлъхэм ягъэзекIонкIэ нэкъокъуагъэх.

Студентхэу лъэныкъоу «Бизнесым ипрограммнэ шIыкIэхэр» зыфиIорэр къыхэзыхыгъэхэм IT-инструментхэу бизнес-процессхэм яавтоматизацие зыгъэпсыхэрэм Iоф адашIагъ. МКъТУ-м икъутамэу щыт колледжым щеджэрэ студентым IофшIэнхэр дэгъу дэдэу ыгъэцэкIагъэх.

Неущ аужырэ зэнэкъокъу мафэр къяжэ, ащ анахь лъэшхэр къыщыхэщыщтых. Нэужым, мэзаем и 28-м торжетсвеннэу текIуагъэхэр агъэшIощтых, чемпионатыр зэфашIыжьыщт. Зэнэкъокъум хэлажьэрэмэ ягухэлъхэр къадэхъунхэу, гъэхъагъэхэр ашIынхэу тафэлъаIо!