2024-рэ илъэсым ищылэ мазэ Урысые обществэу «ШIэныгъэм» и Координационнэ совет иунашъокIэ Адыгэ Республикэм ЛъыплъэкIо советым ишъолъыр къутамэ щызэхащагъ, ащ тхьаматагъор щызэрехьэ АР-м и ЛIышъхьэу КъумпIыл Муратэ. Непэ республикэм иправительствэ апэрэ зэхэсыгъор щырагъэкIокIыгъ, ар зэрищагъ советым итхьаматэ игуадзэу, АР-м и ЛIышъхьэ ыкIи Министрэхэм я Кабинет и Администрацие ипащэу Владимир Свеженец.

Гъэсэныгъэ IофшIэныр шъолъырым зэрэщызэхэщагъэм зэхэсыгъом щытегущыIагъэх. ПроектыкIэхэу ТекIоныгъэм ия 80-рэ илъэс фэгъэхьыгъэщтхэр ары зигугъу ашIыгъэхэр.

ЗэхэгущыIэжьым хэлэжьагъэх обществэу «ШIэныгъэм» ишъолъыр къутамэ итхьаматэу, Мыекъопэ къэралыгъо технологическэ университетым иректорэу Къуижъ Саидэ, Къыблэ федеральнэ шъолъырым щыIэ обществэу «ШIэныгъэм» хэхъоныгъэ егъэшIыгъэнымкIэ игъэIорышIапIэ ипащэу Александр Шматько, ЛъыплъэкIо советым хэтхэр, гъэсэныгъэ организациехэм, шIэныгъэ сообществэм ялIыкIохэр.

Владимир Свеженец рэзэныгъэ гущыIэхэр Урысые обществэу «ШIэныгъэм» хэтхэм апигъохыгъэх, чанэу Iоф зэрашIэрэр къыхигъэщыгъ.

— IофшIэпIэ купхэу шъузхэхьагъэхэм яшIошIхэр сэ зэхэсэхых. Непэрэ общественнэ-политическэ гумэкIыгъохэу щыIэхэм ашъхьэ къишъохы, шъолъыр ыкIи федеральнэ хабзэм илIыкIохэм шъуадэлажьэ. ГущыIэ къызэрыкIохэмкIэ Урысые Федерацием и Президент, и Правительствэ, къулыкъушIапIэхэм Iофэу ашIэрэр цIыфхэм алъышъогъэIэсы. Шъолъырым хэхъоныгъэу ышIыхэрэр икъу фэдизэу къишъоIотыкIых, — къыIуагъ Владимир Свеженец.

Урысые обществэу «ШIэныгъэм» икъутамэ 2024-рэ илъэсым Iофэу ышIагъэм зэфэхьысыжьхэр къафишIыгъ шъолъыр къутамэм ипащэу Галина Измайловам.

— 2024-рэ илъэсым къыкIоцI республикэм гъэсэныгъэ Iофтхьабзэ 500-м ехъу ныбжьыкIэмэ ащыфызэхащагъ, къэралыгъо ыкIи  муниципальнэ къулыкъушIэхэм апае 100-м ехъу рагъэкIокIыгъ. ахэмэ зэкIэмэ нэбгырэ 15 000-м ехъу ядэIугъ, яшIэныгъэхэр хагъэхъуагъэх. Зэпымыоу лажьэрэ лектормэ япчъагъэ нэбгыришъэм нагъэсыгъ. Ахэм ахэхьэх шIэныгъэ зэфэшъхьафхэмкIэ докторхэр, кандидатхэр, шIэныгъэлэжь ныбжьыкIэхэр, республикэм игъэсэныгъэ организациехэм япащэхэр, ХэушъхьафыкIыгъэ дзэ операцием хэлэжьагъэхэр, къэралыгъо къулыкъушIэхэр, заохэм яветеранхэр ыкIи нэмыкIыбэхэр, — къыIотагъ Галина Измайловам.

Джащ фэдэу къыхагъэщыгъ, 2024-рэ илъэсым лектор цIэрыIохэр шъолъыр къутамэм къызэрэращэлIагъэхэр. ГущыIэм пае, ныбжьыкIэхэр зыхэлэжьагъэхэ слетэу «Фыщт» зыфиIорэм къырагъэблэгъагъ Урысые шIэныгъэ обществэм изещакIоу, гъэIорышIэн IофшIэнымкIэ экспертэу, мастерскоеу «Сенеж» зыфиIорэм итренерэу, компетенциехэм я Гупчэ иэкспертэу Олег Лебедевыр. Проектэу «Знание.Наука» зыфиIорэм къыдыхэлъытагъэу МКъТУ-м къэкIогъагъ Курчатовскэ комплексым ипащэ игуадзэу Вячеслав Деминыр. Шъолъыр ыкIи муниципальнэ къулыкъушIэхэм апае лекцие къеджэнэу къеблэгъэгъагъ экономикэ шIэныгъэхэмкIэ кандидатэу, проектэу «Мастерская новых медиа», АНО «РСВ» и АНО «Диалог» (Москва) зыфиIорэм ипащэу Михаил Канавцевыр, ар темэу «Информационная гигиена. Противодействие пропаганде противника» зыфиIорэм къеджагъ. Ащ фэшъхьафэу, гъэсэныгъэ проектэу «Новые горизонты» зыфиIорэмкIэ Херсон хэкум икIэлэеджакIохэм лекцие къафеджагъ спикер ныбжьыкIэу, МКъТУ-м къычIитIупщыгъэмэ ащыщэу  Анастасия Нетребинар.

МКъТУ-м Дзэ егъэджэн гупчэ къызэрэщызэIуахыгъэм ишIугъэкIэ дзэ тематикэм фэгъэзэгъэ лекторхэр Iофтхьабзэхэм къахагъэлэжьагъэх, егъэджэн гупчэм экскурсиехэр ащызэхащагъэх.

Урысые обществэу «ШIэныгъэм» ишъолъыр къутамэ итхьаматэу, Мыекъопэ къэралыгъо технологическэ университетым иректорэу Къуижъ Саидэ 2025-рэ илъэсымкIэ пшъэрылъэу агъэуцухэрэм, зыдэлэжьэщтхэм къатегущыIагъ. Гъэсэныгъэ IофшIэнымкIэ къэралыгъо заказэу щыIэм елъытыгъэу мыгъэ проектыкIэхэр агъэцэкIэщтых, ахэмэ республикэм щыпсэурэ цIыф зэфэшъхьафыбэхэр къахагъэлэжьэщтых: кIэлэеджакIохэр, студентхэр, хъызмэтшIэпIэ инхэм яIофышIэхэр, ны-тыхэр.

Муниципальнэ къулыкъушIэхэм апае IофшIэнэу зэхащэщтыр IэкIоцI ыкIи IэкIыб политикэмкIэ упчIэу къэуцухэрэм афэгъэхьыгъэщт, ар Урысые обществэу «ШIэныгъэм» игъусэхэу зэрагъэзэфэщт. ХъызмэтшIэпIэ инхэм апае гъэсэныгъэ Iофтхьабзэу зэхащэщтхэр зыфытегъэпсыхьэгъэщтхэр шъолъырым ипэрыт организациехэр къещэлIэгъэнхэр ары. Гъэсэныгъэ учреждениехэм патриотическэ пIуныгъэр къызэбэкIырэ проектхэр ащыпхыращыщтых. Джащ фэдэу, Адыгеим имуниципалитетхэмэ гъэсэныгъэ зэхэгущыIэжьхэр ащызэхащэщтых, ХэушъхьафыкIыгъэ дзэ операцием хэлэжьагъэмэ зэIукIэхэр адашIыщтых, урысые тарихъым къыхиубытэрэ хэгъэунэфыкIыгъэ мафэхэм афэгъэхьыгъэ кинофильмэхэр къагъэлъэгъощтых.

Зэхэсыгъом икIэухым анахь чанэу Iоф зышIагъэхэр къыхагъэщыгъэх, Адыгэ Республикэм и ЛIышъхьэ ирэзэныгъэ тхылъхэр щытхъу зыпылъ лекторхэм аратыгъэх, джащ фэдэу Урысые обществэу «ШIэныгъэм» игенеральнэ пащэу Максим Древалым ыIапэ зыкIэдзэжьыгъэ щытхъу тхылъхэри аратыжьыгъэх.