Урысые форумэу «Пилот зэрымыс авиационнэ системэхэр: хэхъоныгъэмкIэ амалхэр» зыфиIорэм иапэрэ мафэ нэбгыришъэм нахьыбэ хэлэжьагъ — экспертхэр, хэбзэ органхэм ялIыкIохэр, кIэлэегъаджэхэр, студентхэр ыкIи ныбжьыкIэ специалистхэу зиIофшIэн пилот зэрымыс авиационнэ технологиехэм языпхыхэрэр, джащ фэдэу МКъТУ-м хэхьэрэ Дзэ егъэджэн гупчэм иIофышIэхэмрэ истудентхэмрэ, Астраханскэ къэралыгъо университетэу Татищевэм ыцIэ зыхьырэм, къэралыгъо мэкъу-мэщ университетэу Трубилинэм ыцIэ зыхьырэм, Луганскэ къэралыгъо университетэу Далым ыцIэ зыхьырэм, Къэбэртэе-Бэлъкъар къэралыгъо университетым, Бауманым ыцIэ зыхьырэ МКъТУ-м, Темыр-Кавказскэ федеральнэ университетым, Темыр-Кавказскэ къэралыгъо академием, Къыблэ федеральнэ университетым къарыкIыгъэхэр.

Апэ торжественнэ зэхахьэр рагъэкIокIыгъ, ащ къыкIэлъыкIоу Iофтхьабзэхэр зэхащагъэх. Форумым хэлажьэхэрэр къэгъэлъэгъонэу пилот зэрымыс системэхэр къызщатыгъэхэм яплъыгъэх. Ащ дакIоу МКъТУ-м и «Точка кипение» мастер-классхэр щыкIуагъэх, ащ студентхэмрэ курсантхэмрэ дронхэр зэрагъэIорышIэщт шIыкIэр щызэрагъэшIагъ.

Интерактивнэ патриотическэ площадкэу «Урысыем идзэкIолIхэр» зыфиIорэр Урысые обществэу «ШIэныгъэм» игъусэхэу зэхащагъ, ащ ишIуагъэкIэ Хэгъэгум иухъумакIохэм лIыхъужъныгъэу зэрахьагъэхэм ащыгъозагъэх. Площадкэм лекторэу къыщыгущыIагъэр «Дзэ зэшхэр» зыфиIорэ Шытхьалэ къутамэм ипащэу, отставкэм щыIэ майорэу Станислав Климашевич. МКъТУ-м гупшысэнымкIэ и Клуб тренинг гъэшIэгъон зэхищагъ оперативнэ шIэжьым фэгъэхьыгъэу, ар пилот зэрымыс авиационнэ системэмкIэ Iофыгъошхоу щыт.

Мэхьанэшхо зиIэ Iофтхьабзэу хъугъэ площадкэм МКъТУ-м иректорэу Къуижъ Саидэ къызэрекIолIагъэр. Джащ фэдэу ащ щыIагъэх АР-м и ЛIышъхьэ и Администрацие ыкIи Министрэхэм я Кабинет ипащэу Владимир Свеженец, обществэу «ШIэныгъэм» Къыблэ федеральнэ шъолъырым хэхъоныгъэ егъэшIыгъэнымкIэ игъэIорышIапIэ ипащэу Александр Шматько.

Дронхэр къызэрэзэпагъэчъагъэхэри гъэшIэгъоныгъэ. Куп нахьыкIэми нахьыжъми яIэпэIэсэныгъэ къагъэлъэгъуагъ. Анахь пилот дэгъухэр къахагъэщыгъэх, ахэр ауж къэкIыщтхэмкIэ щысэтехыпIэ хъущтых.

Форумыр мэзаем и 13-м лъагъэкIотэщт, ащ щызэхащэщт Iэнэ хъураем экспертхэр щытегущыIэщтых пилот зэрымыс авиационнэ системэхэр зэрагъэIорышIэхэрэм, ахэр дзэ егъэджэн гупчэхэм зэрэщагъэцэкIэжьыщтхэм ыкIи дзэ-патриотическэ экскурсиехэр зэрэзэхащэщтхэм.