Непэ Мыекъопэ къэралыгъо технологическэ университетым торжественнэ шIыкIэм тетэу Урысые форумэу «Пилот зэрымыс авиационнэ системэхэр: хэхъоныгъэмкIэ амалэу щыIэхэр» зыфиIорэр къыщызэIуахыгъ. Форумыр Хэгъэгум и УхъумакIо и Илъэсэу УФ-м и Президент иунашъокIэ агъэнэфагъэм къдыхэлъытагъэу зэхащэ ыкIи ТекIоныгъэр хэгъэгу зэошхом къызщыдахыгъэр илъэс 80 зэрэхъурэм ехъулIэу рагъэкIокIы.

Мы хъугъэ-шIэгъэ иным зэрищэлIагъэх экспертхэр, хэбзэ органхэм ялIыкIохэр, кIэлэегъаджэхэр, студентхэр ыкIи ныбжьыкIэ специалистхэу зиIофшIэн пилот зэрымыс авиационнэ технологиехэм языпхыхэрэр, джащ фэдэу МКъТУ-м хэхьэрэ Дзэ егъэджэн гупчэм иIофышIэхэмрэ истудентхэмрэ.

ШIуфэс псалъэкIэ къэзэрэугъоигъэхэм закъыфигъэзагъ Мыекъопэ къэралыгъо технологическэ университетым лъапсэ фэзышIыгъэу, Адыгэ Республикэм и Къэралыгъо упчIэжьэгъоу, МКъТУ-м и Президентэу, социологие шIэныгъэхэмкIэ докторэу, профессорэу, гъэсэныгъэмкIэ Урысые академием иакадемикэу ТхьакIущынэ Аслъан. Ащ игущыIэхэм къащыхигъэщыгъ пилот зэрымыс авиацием хэгъэгум икъэухъумэнкIэ ыкIи гражданскэ секторымкIэ мэхьанэшхо зэриIэр, Урысыер дунаим итехнологическэ пэрытмэ 2030-рэ илъэсым нэс ахэуцоныр зэрипшъэрылъыр.

Джащ фэдэу, торжественнэ зэхахьэм хэлэжьагъэх ыкIи къыщыгущыIагъэх Адыгэ Республикэм и Къэралыгъо Совет-Хасэ итхьаматэ игуадзэу Цэй Эдуард, гъэсэныгъэмрэ шIэныгъэмрэкIэ АР-м и Министрэ игуадзэу Артём Журавель, цифровизациемкIэ проректорэу Дмитрий Игнатовыр; ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Мурат.

Шъолъыр зэфэшъхьафхэм къарыкIыгъэ лIыкIохэр форумым зэрэхэлэжьагъэхэм ащ имэхьанэ къаIэтыгъ. Мыекъуапэ къэкIуагъэх Дзэ егъэджэн гупчэхэм ялIыкIохэу урысые университетхэм ащеджэхэрэр: Астраханскэ къэралыгъо университетэу Татищевэм ыцIэ зыхьырэм, къэралыгъо мэкъу-мэщ университетэу Трубилинэм ыцIэ зыхьырэм, Луганскэ къэралыгъо университетэу Далым ыцIэ зыхьырэм, Къэбэртэе-Бэлъкъар къэралыгъо университетым, Бауманым ыцIэ зыхьырэ МКъТУ-м, Темыр-Кавказскэ федеральнэ университетым, Темыр-Кавказскэ къэралыгъо академием, Къыблэ федеральнэ университетым къарыкIыгъэхэр.

ИскусствэхэмкIэ еджапIэм иартист ныбжьыкIэмэ къагъэхьазырыгъэ творческэ концертым торжественнэ зэхахьэр къыгъэкIэрэкIагъ. Патриотическэ композициехэр ахэм къашIыгъэх. Программэм икIэухым вокальнэ ансамблэу «Акцентым» композициеу «ЫпэкIэ лъыкIуат, Урысыер!» зыфиIорэр къышIыгъ, джыри технологическэ хэхъоныгъэхэм афэкIонхэм ащ фиузэнкIыгъэхэм фэдэу хъугъэ.

Торжественнэ зэхахьэм ыуж тематическэ площадкэхэм IофшIэныр ащырагъэжьагъ, ахэм прграммэ игъэкIотыгъэ апэ илъ.