Профессиональнэ IэпэIэсэныгъэу «Профессионалхэр 2025-рэ» зыфиIорэм и Чемпионат ишъолъыр едзыгъо Адыгэ Республикэм щырагъэжьагъ. Федеральнэ проектэу «Профессионалитетым» ыкIи лъэпкъ проектэу «Гъэсэныгъэм» къадыхэлъытагъэу Iофтхьабзэр рагъэкIокIы.

Гъэ къэс анахь студент дэгъухэу гурыт профессиональнэ гъэсэныгъэ учреждениехэм ащеджэхэрэр ыкIи кIэлэеджакIохэр Iофтхьабзэм зэрещалIэх, ахэр яшIэныгъэхэмкIэ ыкIи яамалхэмкIэ зэнэкъокъух.

Торжественнэ зэхахьэм хэлэжьагъэх гъэсэныгъэмрэ шIэныгъэмрэкIэ Адыгэ Республикэм и Министрэ игуадзэу Алексей Журавель, гъэсэныгъэ учреждениехэм япащэхэр.

Мыекъопэ къэралыгъо технологическэ университетым и Политехническэ колледжым ыкIи МКъТУ-м икъутамэу поселкэу Яблоновскэм дэтым икъутамэ иколледжым ястудентхэр чемпионатым чанэу хэлажьэх.

Мыгъэ зэрэзэнэкъокъурэ лъэныкъохэр:

— Финансхэр

— Осетин хьалыжъохэм ягъэжъэн

— Медицинскэ ыкIи социальнэ фэIо-фашIэхэр

— Бизнесым епхыгъэ программнэ хэкIыпIэхэр

— Мобильнэ приложениехэм язэхэгъэуцон

Ащ фэшъхьафэу, федеральнэ проектэу «Профессионалитетым» иамбассадорхэм студентхэр ягъусэхэу мыщ фэдэ лъэныкъохэмкIэ заушэты:

— Фармациер

— Рестораннэ сервисыр

— Пщэрыхьан Iофыр

— Хъытыу ыкIи системнэ администрированиер

— Мобильнэ джэгукIэхэм язэхэгъэуцон

— Автомобиль псынкIэхэм ягъэцэкIэжьын

— Электромонтажыр

Чемпионатым хэлажьэрэмэ яIэпэIэсэныгъэ зынэсрэр, яшIэныгъэхэр ыкIи яамалхэр къагъэлъэгъонхэм фэхьазырых. Анахь шъхьаIэр — специалист ныбжьыкIэхэр Iофышхохэм зэрафэхьазырхэр къагъэшъыпкъэжьыныр ары. Зэнэкъокъухэрэм ягухэлъхэр къадэхъунхэу, текIоныгъэм фэкIонхэу тафэлъаIо!