Непэ Мыекъопэ къэралыгъо технологическэ университетым торжественнэ зэхахьэ щыкIуагъ, ар урысые наукэм и Мафэ фэгъэхьыгъагъ. Университетым ишIэныгъэлэжь пэрытхэр, ныбжьыкIэ ушэтакIохэр, студентхэр ыкIи хьакIэхэр Iофтхьабзэм хэлэжьагъэх.

Торжественнэ зэхахьэм къыщыгущыIагъ Адыгэ Республикэм и Къэралыгъо Совет-Хасэ итхьаматэу Владимир Нарожнэр, ар залым чIэсмэ къафэгушIуагъ ыкIи Рэзэныгъэ тхылъхэу МКъТУ-м  иректорэу Къуижъ Саидэ ыкIи апшъэрэ еджапIэм ишIэныгъэлэжь купхэм афагъэшъошагъэхэр аритыжьыгъэх ыкIи шъолъырым хэхъоныгъэхэр ышIынхэм фытегъэпсыхьэгъэ IофшIэнышхо ахэм зэрэзэшIуахырэр къыкIигъэтхъыгъ.

Саидэ Казбек ыпхъур къызэгущыIэм къыхигъэщыгъ, урысые наукэм и Мафэ шIэныгъэлэжьхэмкIэ хъугъэ-шIэгъэ инэу зэрэщытыр. Наукэм хэхъоныгъэхэр ышIынхэмкIэ университетым мэхьанэшхо зэриIэр, инновационнэ проектыкIэхэр хагъахьэхэзэ зэфэшъхьаф лъэныкъохэм —  медицинэм къыщегъэжьагъэу мэкъу-мэщ технологиехэм анэсыжьэу зарэдэлажьэхэрэр ащ къыкIигъэтхъыгъ.

БлэкIыгъэ илъэсыр МКъТУ-м инаучнэ сообществэкIэ къахэщыгъ. Университетым дэгъу дэдэкIэ 1 докторскэ ыкIи кандидатскэ диссертациеу 8 къыщаухъумагъ, ахэр сэнэхьат лъэныкъо зэфэшъхьафхэм афэгъэзэгъагъэх. Ащ фэшъхьафэу, Урысые Федерацием апшъэрэ гъэсэныгъэмрэ шIэныгъэмрэкIэ и Министерствэ икъэралыгъо пшъэрылъым къыдыхэлъытагъэу (2024-2026) университетым научнэ-ушэтэкIо проект инищ щагъэцакIэ, зэкIэмкIи ахэм сомэ млн 52-рэ мин 961-рэ 600-рэ апаIуагъахьэ. 2024-рэ илъэсым интеллектуальнэ унаекIэ объект 20 атхыгъ, ахэм патент 11 къаугупшысыгъэхэм афытегъэпсыхьагъэу ыкIи свидетельствэу 9 ЭВМ-м апае программэхэр зэратхыгъэмкIэ ащыщыгъэх.

ШIэныгъэлэжь-ушэтэкIо ныбжьыкIэмэ Iоф адашIэным анахьэу университетым анаIэ щытырагъэты. Ректорым игрантхэр зэрылъыгъэ зэнэкъокъур научнэ хъугъэ-шIэгъэ шъхьаIэ студентхэмкIэ хъугъэ. 2024-рэ илъэсым зэнэкъокъум IофшIэгъэ 22-рэ къатыгъ, проекти 6-мэ  текIоныгъэр къыдахыгъ. Ахэм ащыщыгъэх:

— Техническэ шIэныгъэхэр: Анастасия Коваленко, Офелия Назарян ыкIи Кристина Николина;

— Естественнэ шIэныгъэхэр: Екатерина Кузьмина, Кирилл Басацкий, Цэй Анетта, Данил Деркачев, Марина Суслова;

— Медицинскэ шIэныгъэхэр: Анастасия Сулешко.

Научнэ пащэхэм ыкIи текIоныгъэ къыдэзыхыгъэхэм ахъщэ сертификатхэр, дипломхэр, рэзэныгъэ тхылъхэр аратыгъэх.

Ащ къыкIэлъыкIоу, наукэм чанэу зэрэщылажьэхэрэм ыкIи научнэ гъэсакIоу зэрэщытхэм, МКъТУ-м ибренд зэрэлъагъэкIуатэрэм афэшI къыхагъэщыгъэх — Хьаткъо Зурет, Валерий Акатовыр, Мамсыр Нурбый, Сихъу Нафсэт, Сергей Лысенковыр.

Iофтхьабзэм чIыпIэ шIагъо щаубытыгъ Даутэхэм яунагъо щыщхэу МКъТУ-м имедицинэ наукэ хэхъоныгъэхэр ышIынхэм зиIахьышхо хэзылъхьагъэхэм. Ахэм анахьыжъыр — профессорэу, медицинэ шIэныгъэхэмкIэ докторэу,  кафедрэм ипащэу Даутэ Юр. Ащ ипшъашъэу Уракъэ Тамарэ ятэ игъогу рыкIуагъ, иIоф лъигъэкIотагъ, ари медицинэ шIэныгъэхэмкIэ доктор хъугъэ, факультетскэ терапием икафедрэ ипащ. Къорэлъфыхэу ТхьакIущынэ Рустэмрэ Ибрахьимэрэ — медицинэ шIэныгъэхэмкIэ кандидатых, кафедрэм икIэлэегъаджэх. Юрэ Юныс ыкъом университетым ирэзэныгъэ тхылъэу фагъэшъошагъэр ратыжьыгъ.

Научнэ купхэу шIэныгъэ-ушэтын IофшIэныр зыгъэцакIэхэрэм университетыр IэпыIэгъу афэхъу. Ащ фэдэ проектхэмкIэ пшъэдэкIыжь зыхьырэ научнэ IофышIэхэр: Ешыгоо Светлан, КъумпIыл Анжелик, Шъуаджэ Зар, Юрий Сухоруких, Мамсыр Нурбий, Татьяна Щербатовар, Людмила Пригода, Iэшъынэ Юныс, (проектыр зыгъэцакIэрэр Лъэцэрыкъо Ирин), мыхэм ахъщэ сертификатхэр аратыгъэх.

Мыекъопэ къэралыгъо технологическэ университетым шIэныгъэ-ушэтын зэнэкъокъур гъэ къэс щызэхащэныр хабзэ хъугъэ. Ар зигукъэкIыгъэр ректорэу Къуижъ Саид ары.

2025-рэ илъэсым заявкэ 13 атыгъагъ, ахэм ащыщэу проекти 6-мэ адырагъэштагъ.

Лъэныкъоу «Техническэ шIэныгъэхэр»:

— научнэ купэу техническэ шIэныгъэхэмкIэ докторэу, доцентэу Сихъу Хьазрэт зипащэр, проектэу «Экологические и технологические аспекты производства мучных полуфабрикатов с высоким содержанием питательных веществ на основе вторичных отходов пищевых производств» зыфиIорэр.

— научнэ купэу техническэ шIэныгъэхэмкIэ кандидатэу, доцентэу Тазэ Заретэ зипащэр, проектэу «Разработка ресурсосберегающих технологий производства снековой продукции функционального назначения для коррекции пищевого статуса» зыфиIорэр.

Лъэныкъоу «Мэкъу-мэщ шIэныгъэхэр»:

— научнэ купэу мэкъу-мэщ шIэныгъэхэмкIэ докторэу, профессорэу Ирина Бандурко зипащэр, проектэу «Изучение продуктивности и адаптивных свойств сортов и видов груши в условиях Юга России для использования в производстве и селекции» зыфиIорэр (проектыр зыгъэцакIэрэр Дэгужъые Зар).

Лъэныкъоу «Медицинэр ыкIи псауныгъэм икъэухъумэн»:

— научнэ купэу фармацевтическэ шIэныгъэхэмкIэ докторэу, профессорэу Ифрат Зилфикаровыр зипащэр, проектэу «Разработка и обоснование состава, технология и стандартизация фитопрепаратов и биологически активных добавок ангиопротективного, противовоспалительного, противомикробного и диуретического действия» зыфиIорэр.

Лъэныкъоу «Междисциплинарнэ ушэтынхэр»:

— научнэ купэу техническэ шIэныгъэхэмкIэ докторэу, профессорэу Николай Лябахыр зипащэр, проектэу «Природоподобные технологии синтеза систем искусственного интеллекта» зыфиIорэр.

Социальнэ-гуманитарнэ лъэныкъор:

— научнэ купэу экономикэ шIэныгъэхэмкIэ кандидатэу, доцентэу Ешыгоо Светланэ зипащэр, проектэу «Экономический механизм устойчивого развития регионального АПК в условиях цифровизации» зыфиIорэр.

Тыгу къыддеIэу тафэгушIо шIэныгъэлэжьхэм, ушэтакIохэм, академикхэм, докторхэм ыкIи шIэныгъэхэмкIэ кандидатхэм, аспирантхэм, урысые наукэм зиIахь хэзылъхьэрэмэ зэкIэмэ. Джыри ушэтыныкIэхэр шъушIынхэу, лъэгэпIапкIэхэм шъуанэсынхэу тышъуфэлъаIо!