Непэ Мыекъопэ къэралыгъо технологическэ университетым и Дзэ егъэджэн гупчэ иплац торжественнэу дзэкIолIхэр къыщагъэуцугъэх, ар гупчэр зыщыIэр илъэс зэрэхъугъэм ыкIи удостоверениехэр курсантхэм ятыгъэнхэм афэгъэхьыгъагъ. Мы хъугъэ-шIагъэр Дзэ егъэджэн гупчэм итарихъкIэ апэрэ фэдэ Iофтхьабзэу ыкIи курсантхэм ацIэ къагъэшъыпкъэжьынымкIэ хабзэм икъежьапIэу щыт.

Iофтхьабзэр патриотическэ орэдымкIэ къызэIуахыгъ. Творческэ вокальнэ объединениеу «ЕгъэшIэрэ машIу» зыфиIорэм мы мафэм пае ыгъэхьазырыгъэу ыкIи ытхыгъэу Дзэ егъэджэн гупчэм игимныр къырагъэIуагъ. Ащ ыуж гупчэм ипащэу, полковникэу Нурлан Самадьяновым яухьазырыныгъэ зыфэдэмкIэ доклад фишIыгъ МКъТУ-м иректорэу Къуижъ Саидэ. Преображенскэм имарш имэкъамэхэр кIэлъхэу быракъзехьэхэм Урысые Федерацием ыкIи Адыгэ Республикэм ябыракъхэр къычIахьагъэх.

Къалэу Мыекъуапэ иадминистрацие ипащэу Геннадий Митрофановым мы хъугъэ-шIагъэм имэхьанэ къыIотагъ: «Непэ тэлъэгъу Хэгъэгум иухъумакIохэм ялIэужыкIэ Урысыем щыгъэпсыгъэ зэрэхъурэр — кIуачIэхэу, къэралыгъом фэшъыпкъэхэу, ятэжъ пIашъэхэм яхабзэхэр лъагъэкIуатэхэу ахэр щытых. МКъТУ-м икурсантхэм ар къаушыхьаты. Илъэсэу гупчэр зылажьэрэм къыкIоцI Iофышхо шъушIагъэ, ныбжьыкIэхэр патриотическэу пIугъэнхэм, IэпэIэсэныгъэшхо зыхэлъ кадрэхэр Урысыем и УIэшыгъэ КIуачIэхэм апае гъэхьазырыгъэным фэгъэхьыгъагъ. Сицыхьэ телъ, Дзэ егъэджэн гупчэм игуетныгъэ ишIуагъэкIэ тихэгъэгу фэшI къулыкъур курсантмэ дэгъоу зэрахьыщтым!»

Адыгэ Республикэм иветеранхэм я Совет итхьаматэу, полковникэу Къуаджэ Аслъан къыкIигъэтхъыгъ: «Дзэ егъэджэн гупчэм апэрэ илъэс IофшIагъэу хигъэунэфыкIырэр лIэужхэм язэкIэлъыкIуакIэ имафэу плъытэмэ хъущт. ДзэкIолIэу ущытыныр — ар сэнэхьат къодыеп, ар щыIэныгъ, уинарод къулыкъу фэпхьыным, гу пытэ уиIэным афэгъэхьыгъ. Лъэшэу сырэпагэ мыщ фэдэ Дзэ егъэджэн гупчэ Мыекъуапэ дэтэу зэрэхъугъэм, дзэ элитэр ащ зэрэщагъэхьазырырэм!»

— Дзэ егъэджэн гупчэр тиуниверситет игъэсэныгъэ программэ щыщ шъыпкъэ мыгъэ хъугъэ. Тэ программэу дгъэцакIэрэм къыделъытэх запасым щыIэ сержантхэм ыкIи солдатхэм ягъэхьазырын, тистудентмэ амал ятэты апшъэрэ гъэсэныгъэмрэ дзэ зыгъэхьазырынымрэ зэдагъэцэкIэшъунэу. Тикурсантмэ пшъэдэкIыжьышхо ахэлъ, ащ дакIоу шIэныгъэхэм зафакъудыи. ТапэкIэ джыри пшъэрылъыбэ тиI: гъэсэныгъэ процессым зедгъэушъомбгъущт, материальнэ-техническэ базэр дгъэкIэжьыщт, дзэ организациехэм зэпхыныгъэхэр адэтшIыщтых, а зэкIэри зыфэIорышIэщтыр тикурсантхэм Хэгъэгум иухъумакIо цIэр лъагэу зэрахьаным фэшI, — къыIуагъ МКъТУ-м иректорэу Къуижъ Саидэ.

Курсантхэм удостоверениехэр ятыгъэнхэр зы Iахь шIагъоу Iофтхьабзэм хэтыгъ, ащ статусыкIэ ахэм къафешIы. А Iофтхьабзэм епхыгъэ церемонием хэлэжьагъэх АР-м иветеранхэм я Совет итхьаматэу Къуаджэ Аслъан, полкэу РХБ-м ибатальон иштаб ипащэу, старшэ лейтенантэу Филипп Шелаговыр, полкэу РХБ-м икомандир игуадзэу Магомед Курбаналиевыр.

Удостоверениехэр заратыхэ ужым, Дзэ егъэджэн гупчэм ипащэ Iофтхьабзэр зэраухыгъэмкIэ ректорым доклад фишIыгъ ыкIи щэгъогогъо «Ура» аIуагъ, курсантхэр джащ тетэу гупчэм щыщ Iахь хъугъэх. Торжественнэ маршкIэ непэрэ Iофхэр аухыгъэх.

А пстэумэ къакIэлъыкIоу курсантмэ яянэ-ятэхэр къырагъэблэгъагъэх, ахэм экскурсие афызэхащагъ, аудиториехэр арагъэлъэгъугъэх ыкIи зэхэтхэу сурэт зытырахыгъ.

ЗэкIэ курсантхэм мы хъугъэ-шIагъэмкIэ тафэгушIо! Хэгъэгум къулыкъу фэшъухьынымкIэ мафэр лъэубэкъушIу шъуфэрэхъух!