Мыекъопэ къэралыгъо технологическэ университетым ипрофессорэу, социальнэ технологиехэм ыкIи шъолъыр (муниципальнэ) гъэIорышIэкIо практикэм и Академие итхьаматэу Азащыкъ Геннадий гуманитарнэ лъэныкъом ыкIи ныбжьыкIэхэр патриотизмэм фэпIугъэнхэм афэгъэхьыгъэ Iофтхьабзэхэм чанэу ахэлажьэ. Ащ научнэ IофшIэнымрэ республикэм иветеранхэм я Совет илъыхъокIо отрядэу «ШIэжь» зыфиIорэмрэ зэфэдэу адэлэжьэн елъэкIы, «Дзэ зэкъошныгъ» зыцIэ Iофыри зэрегъэзафэ, партизанскэ лъэсгъогухэр арегъэлъэгъу, экскурсиехэр ащызэхещэх, ахэм адакIоу гуманитарнэ IэпыIэгъур заор зыщыкIорэ чIыпIэхэм анегъэсы.

Зичэзыу зекIоу профессорэу Азащыкъ Геннадий зыдэкIуагъэр Донбасс, къокIыпIэ бэнакIэ лъэпкъхэмкIэ захэщэгъэ зэнэкъокъоу «Хабзэмрэ напэмрэ» зыфиIорэм ар епхыгъагъ, зэхэзыщагъэр къалэу Макеевкэм тренерэу щылажьэрэ,  спортивнэ клубэу ушу, кунг-фу ыкIи фитнесэу «Дао лун ДНР» зыцIэм япрезидентэу, каскадерэу Михаило Лисичкиныр ары. Урысыем щарагъэхьырэ ушум и Федерацие ишIэ хэлъэу ДНР-м испортсмен ныбжьыкIэхэр медальхэм афэбэнагъэх. КIэлакIэхэм агу къыIэты шIоигъоу Азащыкъ Геннадий спортивнэ Iэмэ-псымэхэр афищагъ, ахэр Адыгеим ит спортивнэ организациехэр къыхигъэлажьэхэзэ ыугъоигъэх.

Проектэу «ТекIоныгъэм и Быракъ итарихъ» зыфиIорэм къыдыхэлъытагъэу ыкIи Геннадий Хьасамбый ыкъор яIэшъхьэтетэу,  спортивнэ клубмэ защызгъасэрэмэ ежь-ежьырэу ТекIоныгъэм и Быракъ тешIыкIыгъэр агъэхьазырыгъ. Джащ фэдэу ныбжьыкIэхэр Быракъым фэгъэхьыгъэ лекцием едэIугъэх, ащ итарихъ, гъогоу къыкIугъэр, ТекIоныгъэм икъыдэхынкIэ мэхьанэу иIагъэр ащ къыщыриIотыкIыгъэх.

«Дзэ зэкъошныгъэм» хабзэу ыгъэнэфагъэм ишIуагъэкIэ лIэужхэр зэпхыгъэхэ мэхъу, неущрэ мафэр зэрэщыIэщтымкIэ гугъапIэр мэпытэ. Лисичкиным иклуб зэрэдеIэхэрэр апэрэп: ДНР-м испортсменхэр ащыIагъэх Адыгеим, Ростов ыкIи Москва, мы илъэсым имэлылъфэгъу мазэ станицэу Ханскэм щыкIощт зэнэкъокъум хэлэжьэнхэу джырэкIэ загъэхьазыры.

Азащыкъым иIофшIэн — ар спортымкIэ, патриотическэ пIугъэнымкIэ ыкIи гуманитарнэ IофтхьабзэхэмкIэ щысэтехыпI. Зэо илъэс къинхэм апае къамыгъанэу, Донбасс иныбжыкIэхэм тренировкэхэр ашIы, ыпэкIэ маплъэх ыкIи мыщ фэдэ IэпыIэгъухэм яшIуагъэкIэ яшIошъхъуныгъэ, акIуачIэ нахь лъэш мэхъух.

Нахь игъэкIотыгъоу мыщ фэгъэхьыгъэу Мыекъопэ къэбархэм шъуащеджэн шъулъэкIыщт.