Непэ патриотическэ акциеу ЕгъэшIэрэ машIом имемориал щыкIуагъэм МКъТУ-м иIофышIэхэмрэ истудентхэмрэ хэлэжьагъэх, ар Мыекъуапэ нэмыц-фашистхэр дафыжьыхи, шъхьафит зашIыжьыгъэр илъэс 82-рэ зэрэхъугъэм фэгъэхьыгъагъ.

Мыекъуапэ шъхьафит зашIыжьыгъэр щылэ мазэм и 29-м хагъэунэфыкIы. Адыгеир зэрэпсаоу шъхьафит зыхъужьыгъагъэр мэзаем и 18-р ары. А мафэм, 1943-рэ илъэсым Краснэ армием аужырэ псэупIэхэм нэмыцхэр адифыжьыгъэх — Тэхъутэмыкъое районым ит къуаджэхэу Псэйтыкурэ Афыпсыпэрэ.

— Тэ тилIыхъужъхэм тарэпагэ, яшIэжь тэгъэлъапIэ, тятэжъ пIашъэмэ япсэемыблэжьыныгъэ къыхэтэгъэщы. ЛIыхъужъыныгъэшхо къызхагъафэзэ ахэм тикъалэхэр, тикъуаджэхэр, ти Хэгъэгу цIыкIу зэрэпсаоу шъхьафит ашIыжьын алъэкIыгъ. Заом ыуж тикъэралыгъо зэтезгъэуцожьыгъэхэми шъхьэкIэфэныгъэ афэтэшIы. Анахьэу рэзэныгъэ гущыIэхэр непэ зыпэдгъохыхэрэр Хэгъэгу зэошхом иветеранхэу джырэ уахътэм псаоу къытхэтхэр, къытфэнагъэхэр ары. Патриотизмагъэ зыхэлъ щысэхэмкIэ къыткIэхъухьэрэ лIэужхэр тпIунхэр, фашизмэм ебэныгъэнымкIэ Урысыем мэхьанэшхоу иIагъэр, тарихъ шъыпкъэу ащ пылъыр ягъэшIэгъэныр тэ типшъэрылъ. Лъэпкъ зэфэшъхьафхэм языкIныгъэ, шIулъэгъоу ти Хэгъэгу фыряIэр анахьэу непэ ХэушъхьафыкIыгъэ дзэ операцием къыгъэлъэгъуагъ. ТидзэкIолIхэм ялIыхъужъыгъэ къегъэнафэ тятэжъхэм лIэуж шIагъо къазэрэкIэлъыкIуагъэр, — къыIотагъ АР-м и ЛIышъхьэу КъумпIыл Муратэ.

Мы мафэм тыгу къегъэкIыжьых тятэжъхэм къинэу алъэгъугъэр, чIыгу гупсэм имыжъо шъхъэй пэпчъ къазэрэтырахыжьыщтыгъэр. Зэо илъэс фыртынэхэм къэлэдэсхэр партизанскэ движением хэлажьэщтыгъэх, зэрафэлъэкIэу пыим пэуцужьыщтыгъэх.

Тикъэралыгъо итарихъ текIоныгъэ зэкIэу зэрэщымытыгъэр, ар къыдахыным пае къиныгъохэм зэрапхырыкIыгъэр тщыгъупшэрэп. Ащ тыфегъасэ тиIэр къэтыухъумэным, мамырныгъэр дгъэлъэпIэным.