Непэ Мыекъопэ къэралыгъо технологическэ университетым щымэфэкIышхуагъ — мыщ студентмэ я Мафэ тефэу Iофтхьабзэмэ чанэу ахэлажьэхэрэр ыкIи текIоныгъэ къыдэзыхыхэрэр щагъэшIуагъэх.

Торжественнэ зэхахьэм хэлажьэрэмэ шIуфэс къарихыгъ ныбжьыкIэ политикэмкIэ ыкIи гъэсэкIо IофшIэнымкIэ МКъТУ-м ипроректорэу БрантIэ Муратэ. Ар студентмэ къафэгушIуагъ ыкIи къыхигъэщыгъ устудент чанэу ущытыныр зэрэшIагъор, джащ фэдэу гукъыдэчъхэр, щыIэныгъэ лъэгъуакIэхэр къыхэпхынхэм уафэкIоныр зэрэIофыгъошIур. Торжественнэ Iахьым къызэрэдыхэлъытагъэу, БрантIэ Муратэ щытхъу тамыгъэхэр анахь чанхэу зыфагъэшъошагъэхэм, ныбжьыкIэ политикэу университетым зэрихьэрэм чанэу хэлажьэхэрэм аритыжьыгъэх. Ащ фэшъхьафэу, МКъТУ-м игъусэгъу ишIухьафтыни анахь хъупхъэхэм аратыжьыгъ. ПАО «Сбербанкым» и Адыгэ къутамэ игъэIорышIапIэ ипащэу Ащыбэкъо Юрэ а Iоф шIагъор ыгъэцэкIагъ.

Я 2-рэ Универсиадэу Хэгъэгу зэошхом ТекIоныгъэ къызщыдахыгъэм ия 80-рэ илъэс фэгъэхьыгъэм щытекIуагъэхэм якъыхэгъэщын анахь IофыгъошIоу зэхахьэм хэтыгъ. Гъэсэныгъэ тедзэм икIэлэегъаджэу Александр Кановаловым бгъэхалъхьэхэр аритыжьыгъэх.

Универсиадэм щытекIуагъэхэр:     

а 1-рэ чIыпIэр — лечебнэ факультетыр;

я 2-рэ чIыпIэр — инженернэ факультетыр;

я 3-рэ чIыпIэр — экологическэ факультетыр.

Ащ фэшъхьафэу, ныбжьыкIэ политикэмкIэ ыкIи гъэсэкIо IофшIэнымкIэ гъэIорышIапIэм ипащэу Ирина Ширинам бгъэхалъхьэхэр аритыжьыгъэх патриотическэ Iофтхьабзэхэм чанэу ахэлэжьагъэхэм.

Мыекъопэ къэралыгъо технологическэ университетым иректорэу Къуижъ Саидэ ыцIэкIэ мэфэкI торт ныбжьыкIэмэ аратыгъ. Iофтхьабзэр щае ешъонымкIэ аухыгъ.

Студенчествэр еджэным епхыгъэ къодыеу зэрэщымытыр мы мэфэкI мафэм къыгъэлъэгъуагъ. Студентхэр чанэу университетым щыкIорэ Iофтхьабзэмэ ахэлажьэх, ащ иунагъо щыщ Iахьэу залъытэжьы, шъхьэкIафэ зэфашIы, ары зэрэщытыр. МКъТУ-р зэкIэ студентхэм афэраз, ягуетныгъэ уасэ фешIы, джащ фэдэу игъусэгъухэм яIэпыIэгъуи зэхешIэ. ТапэкIэ джыри тылъыкIотэщт, текIоныгъакIэхэр къыдэтхыщтых!

Бэ темышIэу торжественнэ зэхахьэм фэгъэхьыгъэ альбомым мыщ ВКонтакте зыфиIорэм шъущеплъын шъулъэIкыщт. КIэу тиIофшIэн хэхъухьэхэрэмэ шъуалъыплъ!