СтудентымкIэ нахь IэпыIэгъушIоу егъэджэн процессым къыдилъытэрэм стипендиер ащыщ. МКъТУ-м иректорэу Къуижъ Саидэ иунашъоу «МКъТУ-м щеджэхэрэм стипендием иинагъэу афэгъэнэфагъэхэм яхьылIагъ» зыфиIорэм елъытыгъэу 2024-2025-рэ илъэсхэм ателъытэгъэ стипендиехэр агъэуцугъэх. Ар джырэ уахътэм еджэрэ студентхэмкIи университетым кIэу къычIэхьащтхэмкIи мэхьанэшхо зиIэ хъугъэ-шIагъэу щыт.

Инфляциеу проценти 5,1-рэ хъурэм къыдыхэлъытагъэу къэралыгъо академическэ стипендиехэм ахагъэхъуагъ: студентхэу гурыт профессиональнэ гъэсэныгъэ зэзыгъэгъотыхэрэм — сомэ 858-рэ мазэм; студентхэу программэу бакалавриатым, специалитетым ыкIи магистратурэм хэтхэм — сомэ 2125-рэ мазэм.

Ащ фэшъхьафэу, апэрэ курсым къычIэхьащтхэу Зэтыгъо къэралыгъо ушэтынхэм баллыбэ къащызыхьыгъэхэм нахь стипендие инхэр аратынэу агъэнафэ:

— балли 246-рэ ыкIи нахьыбэ къэзыхьыгъэхэм мазэм сомэ 10 000 аратызэ ашIыщт;

— балли 230-м къыщегъэжьагъэу 245-м нэс къэзыхьыгъэхэм — мазэм сомэ 7 000;

— балл 210-м къыщегъэжьагъуэ 229-м нэс зиIэхэм — мазэм сомэ 5 000.

Студентхэу, гурыт ыкIи апшъэрэ гъэсэныгъэм ипрограммэкIэ еджэхэу, «тфы» щэхъу къэзымыхьыхэрэм якъэралыгъо академическэ стипендие процент 25-рэ тедзэ фашIыщт.

Студентхэу, къэралыгъо социальнэ стипендие зытефэхэрэм, къахьырэ пчъагъэми зэхъокIныгъэхэр фэхъущтых: гурыт профессиональнэ гъэсэныгъэм щеджэхэрэм — мазэм сомэ 1286-рэ; апшъэрэ гъэсэныгъэ зэзыгъэгъотыхэрэм — мазэм сомэ 3189-рэ.

Джащ фэдэу тиуниверситет истудентмэ амал яI мыщ фэдэ стипендиехэр къахьынхэу:

— Урысые Федерацием и Президент истипендиеу мазэм сомэ 30 000 зэрылъыр;

— Урысые Федерацием и Правительствэ истипендиеу мазэм сомэ 20 000 хъурэр.

Аспирантурэм ыкIи ординатурэм щеджэхэрэм аратыщтхэр:

— мазэм сомэ 8381-рэ — шIэныгъэ-кIэлэегъэджэ кадрэхэм ягъэхьазырын ипрограммэ зэзыгъашIэхэрэр;

— мазэм сомэ 14 166-рэ — естественнэ ыкIи техническэ наукэхэм афэгъэхьыгъэ программэхэмкIэ еджэхэрэм;

— мазэм сомэ 14 775-рэ — ординаторхэм ыкIи интернхэм апае.

Ректорым ыкIи факультетмэ ацIэкIэ атырэ стипендиемэ анахьэу анаIэ тырадзагъ: СПО-м истудентмэ апае — мазэм сомэ 1714-м къыщегъэжьагъэу  2572-м нэс; апшъэрэ еджапIэмэ ястудентхэм — мазэм сомэ 4251-м къыщыублагъэу 6376-м нэс; ординаторхэм — мазэм сомэ 29 550-рэ.

Стипендиехэм ятын федеральнэ мылъкум къыхэкIы, ау ректорымрэ факультетымрэ ацIэкIэ атыхэрэр федэу апшъэрэ еджапIэм къыфакIорэм къыхахы.

Мыщ фэдэу, стипендиехэм ыкIи ахъщэ IэпыIэгъухэм зэрэхагъэхъуагъэхэм, ныбжьыкIэхэр еджэным нахь фэщагъэхэ хъунымкIэ ишIуагъэ къэкIонэу щыт. Апэрэ курсым еджэныр щезыгъэжьэщтхэу баллыбэмэ яхьатыркIэ стипендие анахь инхэр къэзыхьыщтхэм сэнаущыгъэ зыхэлъ ныбжьыкIэхэр бэу зэрахэтыщтым щэч хэлъэп. Университетым щеджэрэ пэпчъ мы зэхъокIныгъэхэм ежь пае зы шIуагъэ горэ хигъотэщт. ТапэкIи университетыр студентхэм адэIэпыIэщт, ишIуагъэ аригъэкIыщт, еджэнымкIэ амалэу щыIэхэм ахигъэхъощт.