АР-м и ЛIышъхьэ и Координационнэ гупчэ ТекIоныгъэр къызщыдахыгъэр илъэс 80 зэрэхъурэм изыфэгъэхьазырынрэ изэхэщэнрэ афэгъэзэгъэ комитетым изэхэсыгъо щыкIуагъ, ар зэрищагъ АР-м и ЛIышъхьэу КъумпIыл Мурат.

Зэхэсыгъом хэлэжьагъэх министрэхэм я Кабинет щыщхэр, Iэшъхьэтетхэр, уIэшыгъэ кIуачIэхэм япхыгъэ къылыкъушIапIэмэ япащэхэр, Мыекъопэ гарнизоным, ветеранхэм яреспубликэ Совет, фондэу «Хэгъэгум иухъумакIохэм», бзылъфыгъэхэм я Союз, культурэм иучреждениехэм, ныбжьыкIэ объединениехэм ялIыкIохэр, муниципалитетмэ япащэхэр ыкIи нэмыкIхэр.

Мыекъопэ къэралыгъо технологическэ университетым ыцIэкIэ зэхэщэкIо комитетым иIофшIэн хэлэжьагъэх ректорэу Къуижъ Саидэ, МКъТУ-м хэхьэрэ Дзэ егъэджэн гупчэм ипащэу Нурлан Самадьяновыр, ныбжьыкIэ политикэмкIэ ыкIи гъэсэкIо IофшIэнымкIэ проректорэу БрантIэ Муратэ.

Адыгеим и ЛIышъхьэ псалъэ къызешIым къыхигъэщыгъ Урысыем и Президентэу Владимир Путиным Хэгъэгум и УхъумакIоу илъэсыр къызэригъэнэфагъэр, мыгъэ Хэгъэгу зэошхом ТекIоныгъэ къызщыдэтхыгъэм ия 80-рэ илъэс зэрэхэдгъэунэфыкIырэр.

Зэхэсыгъом ЛIышъхьэм къыщыкIигъэтхъыгъ республикэм федеральнэ программэу «ЛIыхъужъхэм яуахът» зыфиIорэр зэрэщатIупщыгъэр. ХэушъхьафыкIыгъэ дзэ операцием хэлэжьагъэхэр мы программэм елъытыгъэу МКъТУ-м дэжь щыIэ шъолъыр гупчэу къэралыгъо ыкIи муниципальнэ къылыкъушIэхэр зыщагъэхьазырхэрэм щырагъэджэщтых ыкIи кадровэ гъэIорышIэн IэпэчIэгъанэм ахэр хагъэхьащтых. ЛIышъхьэм къыIуагъ, Хэгъэгу зэошхом илъэхъан лIыхъужъыныгъэу тятэжъхэм щызэрахьагъэр джы ХэушъхьафыкIыгъэ дзэ операцием хэлажьэрэмэ лъагъэкIуатэ. 

Мыекъопэ къэралыгъо технологическэ университетым ТекIоныгъэм ия 80-рэ илъэс фэгъэхьыгъэ Iофтхьабзэхэр ыгъэхьазырыгъэх, ахэр студентхэм патриотическэ пIуныгъэ ягъэгъотыгъэным, хэгъэгум итарихъ кIэн шъхьэкIафэ фашIыным фытегъэпсыхьагъэх. Анахьэу а Iофтхьабзэмэ къахэлэжьэщтхэр Дзэ егъэджэн гупчэм икурсантхэр ары.

МэфэкI мафэм ехъулIэу зэхащэщт акциехэр программэ зэфэшъхьафхэмкIэ баищтых. Ахэмэ тематическэ проектхэр къябэкIхэу щытыщтых, гущыIэм пае, «КъызэкIэмыкIорэ гур», «ДзэкIолIым фатхырэ письмэр», «Георгиевскэ шэкIыр», тематическэ къэгъэлъэгъонхэу «КIэлэцIыкIухэр — заом илIыхъужъых», «БлэкIыгъэр тыгу къэкIыжьыфэ — неущрэ мафэр тиIэщт», иллюстрированнэ лекциехэр ыкIи тхылъ къэгъэлъэгъонэу «Зэошхом ибзылъфыгъэ нэгу», акъылыгъэ зыхэлъ джэгукIэхэр, тарихъ десэхэу Хэгъэгу зэошхом илъэхъан фэгъэхьыгъэхэр. «Лыхъужъхэм адашIырэ зэдэгущыIэгъухэр» зыфиIорэ Урысые проектым къыдыхэлъытагъэу ХэушъхьафыкIыгъэ дзэ операцием хэлэжьагъэмэ студентхэр аIукIэщтых.

Мыекъопэ гарнизонным игъусэхэу МКъТУ-м хэхьэрэ Дзэ егъэджэн гупчэм икурсантхэр жъоныгъакIэм и 9-м торжественнэ парадым хэлэжьэщтых, егъэшIэрэ машIор зыщыблэрэ мемориал гупчэм къэгъагъэхэр кIэралъхьащтых.