ИкIыгъэ илъэсым къыкIоцI гъэсэныгъэ IофшIэнышхо шъолъырым щырагъэкIокIыгъ: ныбжьыкIэхэм тематическэ кино-къэгъэлъэгъонхэм яплъынхэ алъэкIыгъ, викторинэхэм, сэнэхьат къыхэхыным фэгъэхьыгъэ зэIукIэхэм, экспертхэр зыхэлэжьэгъэхэ зэдэгущыIэгъухэм ахэлэжьагъэх, джащ фэдэу федеральнэ ыкIи шъолъыр проектышхохэр агъэцэкIагъэх.

Адыгэ Республикэм иправительствэ яIэпIыгъоу обществэу «ШIэныгъэм» шъолъырым гъэсэныгъэ проектхэр щегъэцакIэх, ахэмэ ащыщых ШIэныгъэр.Къэралыгъор, ШIэныгъэр.ЛIыхъужъхэр, ШIэныгъэр.Карьерэр, ШIэныгъэр.Наукэр, ШIэныгъэр.Спортыр ыкIи нэмыкIыбэхэр.

Къыхэдгъэщын, гъорекIо, мэкъуогъу мазэм, Петербургскэ дунэе экономическэ форумыр зыщыкIорэ чIыпIэм ыкIи уахътэм Адыгэ Республикэм иправительствэрэ обществэу «ШIэныгъэмрэ» зэрэзэдэлэжьэщтхэ зэзэгъыныгъэм зэдыкIэтхагъэх. АIапэхэр документым кIадзэжьыгъэх АР-м и ЛIышъхьэу КъумпIыл Муратрэ обществэу «ШIэныгъэм» игенеральнэ пащэу Максим Древальрэ.

—  Тэ тилъэхъанэ хэт сабыйхэр информационнэ зэхъокIыныгъэхэм къахиубытагъэх, псынкIэу зэблэхъугъэ хъурэ дунаим, ащ гъэсэныгъэм исистемэ кIэу бэ къыхилъхьэрэр. КъыткIэхъухьэрэ лIэужхэм яакъыл псыхьэгъэным пае, хэхъоныгъэхэр ягъэшIыгъэнхэм афэшI шIэныгъэу ябгъэгъотырэм лъэныкъуабэ къызэдиубытынэу щыт. Ащ хэхьэх физическэ пIуныгъэри, шIэныгъэ ягъэгъотыгъэныри, гушъхьэ пIуныгъэри. Обществэу «ШIэныгъэр» а Iофыгъом чанэу хэлажьэ ыкIи IофшIэнышхо зэшIуехы, кIэлэцIыкIухэм ягупшысэ зыгъэIорышIэщт программакIэхэр къыхелъхьэх,— къыхигъэщыгъ гъэсэныгъэмрэ шIэныгъэмрэкIэ Адыгэ Республикэм и Министрэу Евгений Лебедевым.

Адыгеим лектори 100 хъурэ куп щызэхащагъ, ахэм ащыщых шIэныгъэхэмкIэ докторхэр, кандидатхэр, шIэныгъэлэжь ныбжьыкIэхэр, гъэсэныгъэ организациемэ япащэхэр, хэушъхьафыкIыгъэ операциемэ ялIыкIохэр, ахэр зэкIэ экспертых.

КIэлэцIыкIу зыгъэпсэфыгъо чыпIэхэм, гъэсэныгъэ учреждениехэм, техникумхэм ыкIи апшъэрэ еджапIэхэм обществэу «ШIэныгъэм» зэдэгущыIэгъухэр, мастер-классхэр ащыригъэкIокIыгъэх, ныбжьыкIэхэр ясэнэхьаткIэ зэрэлъыкIотэщтхэ шIыкIэхэр къафаIотагъ, культурэм, псауныгъэм икъэухъумэн, научнэ хъугъэ-шIагъэхэм ащытегущыIагъэх.

Адыгэ Республикэм иминистерствэ иIэпыIэгъукIэ шъолъырым икIэлэеджакIохэм апае гъэсэныгъэ программэхэр гъэмэфэ уахътэм зэхащэгъагъэх. КIэлакIэхэм интерактивнэ десэхэм ащыгъозагъэх, апэрэ IэпыIэгъур цIыфмэ зэрябгъэкIыщтыр зэрагъэшIагъ, дзэ ыкIи медицинэ сэнэхьатхэм нэIуасэ афэхъугъэх.

Проектэу ШIэныгъэр.ЛIыхъужъхэр зыфиIорэм къыдыхэлъытагъэу гражданскэ ыкIи дзэ сэнэхьатхэм я ЛIыхъужъхэм аIукIагъэх, ХэушъхьафыкIыгъэ дзэ операциер зэрэрекIокIырэр, ащ инэшанэхэр зэрагъэшIагъэх.

— ЗэкIэмкIи 2024-рэ илъэсым лекторхэм тишъолъыр гъэсэныгъэ зэIукIэ 476-рэ щырагъэкIокIыгъ, ахэмэ нэбгырэ мин 11,5-рэ ахэлэжьагъ, — къыддэгощагъ обществэу «ШIэныгъэм» ишъолъыр къутамэ ипащэу, МКъТУ-м иректорэу Къуижъ Саидэ, —  цIыфмэ ящыкIэгъэ тематикэм елъытыгъэу шапхъэри къыхэтэхы, Джырэ уахътэм анахьэу мэхьанэ зиIэр ныбжьыкIэхэм шIэныгъэу ящыкIагъэр ягъэгъотыгъэныр, ащ дакIоу материалри гъэшIэгъонэу тыгъэныр ары.

ГущыIэм пае, проектэу ШIэныгъэр. Лекториер зыфиIорэм къыдыхэлъытагъэу кIэлэеджакIохэр мэфитIум къыкIоцI тарихъ-гъэсэныгъэ Iофтхьабзэм къалэу Волгоград щыхэлэжьагъэх, Къыблэ Урысыем ихъызмэтшIэпIэ пэрытхэр къакIухьагъэх.

Студентмэ апае программэу «Лектор ныбжьыкIэм иеджапIэ» зэхащэгъагъ, ащ зещакIом иIофшIэн зыфэдэр къащафаIотагъ, зызэрэфагъэхьазырырэр, материалыр къызэрэптыщт шIыкIэр.

— Тэ типрограммэхэр кIэлэеджакIохэм ыкIи студентхэм апае къодыеу щытхэп, ахэр кIэлэегъаджэхэми, ны-тыхэми, зишIэныгъэ хэзыгъахъо зышIоигъо пстэуми афытегъэпсыхьагъэх. Инновационнэ шапхъэхэр нахьыбэу дгъэфедэхэ хъугъэ, темэ зэфэшъхьафхэу, анахьэу патриотизмагъэм къыхиубытэхэрэр, тиныбжьыкIэмэ яIэпэIэсэныгъэ хэгъэхъогъэным афэгъэхьыгъэхэр къызэIутэхых, типроектмэ къахэлажьэрэ пэпчъ ежь къышъхьэпэщт горэ къыхехы, — къыкIигъэтхъыгъ обществэу «ШIэныгъэм» ипащэу Галина Измайловам.

Ны-тыхэм ясообществэ чанэу мы Iофтхьабзэм къыхэлажьэ. Шъугу къэдгъэкIыжьын, Адыгэ Республикэм ны-тыхэм якомитетитIу зэнэкъокъоу обществэу «ШIэныгъэм» ыкIи гъэсэныгъэмкIэ УФ-м и Министерствэм зэхащэрэм текIоныгъэхэр къазэрэщыдахыгъэхэр.

Ащ фэшъхьафэу, обществэу «ШIэныгъэр» Адыгеим ныбжьыкIэхэм я Дунэе фестивалэу щызэхащэгъэм дэгъу дэдэу хэлэжьагъэх, «Фыщт» зыфиIорэ слетым игъэсэныгъэ программэ ыгъэхьазырыгъ, ТекIоныгъэм и Мафэ фэгъэхьыгъэ тематическэ зэIукIэхэри, нэмыкIхэри зэхищагъэх.