Мыекъопэ къэралыгъо технологическэ университетым апшъэрэ гъэсэныгъэ программэр лицензирование шIыгъэныр дэгъу дэдэу екIу — ординатурэм апшъэрэ квалификацие къязытырэ лъэныкъоу 31.08.01 «Мамыкур ыкIи гинекологиер».

Гъэсэныгъэ программэ шъхьаIэу ординатурэм иIэ «Мамыкур ыкIи гинекологиер» зыфиIорэр медицинэм ылъэныкъокIэ специалистхэм ягъэхьазырын дэлажьэ, ахэмэ непэрэ мафэм агъэфедэрэ инновационнэ технологиехэу диагностикэмкIэ къашъхьапэхэрэр зэрагъашIэ, бзылъфыгъэхэм мы лъэныкъомкIэ IэпыIэгъу зищыкIагъэхэм ягъэхъужьын, лъэрмыхьэмэ уазэрэлъыплъэщтыр, нэмыкI Iофыгъохэм защагъэгъуазэ. Джащ фэдэу научнэ ушэтынхэр ахэм акIу, ащ ихьатыркIэ МКъТУ-м щырагъаджэхэрэм амалэу аIэкIэлъым хэхъоныгъэхэр фэхъух, лъэныкъоу зыфэгъэзагъэхэм нахь ахашIыкIы.

ХэушъхьафыкIыгъэ тренажерхэмкIэ ыкIи манекенхэмкIэ, джащ фэдэу клиническэ моделированиеу ашIыхэрэмкIэ практическэ егъэджэнхэр рагъэкIокIых, ахэр симуляционнэ гупчэу МКъТУ-м иIэм щэкIох, мамыку отделениеу Мыекъопэ къэлэ клиническэ сымэджэщым практическэ Iофхэр щызэхащэх.

Сэнэхьатэу 31.08.01 «Мамыкур ыкIи гинекологиер» зыфиIорэр псауныгъэм икъэухъумэнкIэ Адыгэ Республикэм и Министерствэ яIэпыIэгъоу къызэIуахыгъ. Ащ изещакIохэр Урысыем ыкIи Адыгеим щызэлъашIэрэ врачхэр ары: МамыкумкIэ ыкIи гинекологиемкIэ УФ-м псауныгъэр къэухъумэгъэнымкIэ и Министерствэ испециалист шъхьаIэу, апшъэрэ категорие зиIэ врач-мамыку-гинекологэу, мамыкумкIэ ыкIи гинекологиемкIэ МКъТУ-м икафедрэ ипащэу, медицинэ шIэныгъэхэмкIэ докторэу, профессорэу Виктория Попандопуло; мамыкумкIэ ыкIи гинекологиемкIэ МКъТУ-м икафедрэ идоцентэу, медицинэ шIэныгъэхэмкIэ кандидатэу, УФ-м изаслуженнэ врачэу Алла Шеховар; мамыкумкIэ ыкIи гинекологиемкIэ МКъТУ-м икафедрэ идоцентэу, ГБУЗ РА «МГКБ-м» перинатальнэ IэпыIэгъумкIэ иврач шъхьаIэ игуадзэу, Перинатальнэ гупчэм ипащэу МатIыжъ Жаннэ; мамыкумкIэ ыкIи гинекологиемкIэ МКъТУ-м икафедрэ идоцентэу, гинекологиемкIэ ГБУЗ РА «МГКБ-м» иотделение ипащэу Аулъэ Сусаннэ; МКъТУ-м илечебнэ факультет идеканэу, доцентэу, медицинэ шIэныгъэхэмкIэ кандидатэу, мамыку-гинеколог врачэу Беслъангъур Заремэ.