Непэ Мыекъопэ къэралыгъо технологическэ университетым шIэныгъэлэжьхэм ясовет щызэхэхьагъ, ащ тхьаматагъор щызэрихьагъ ректорэу Къуижъ Саидэ. Илъэсэу икIырэм зэфэхьысыжьхэр фашIыгъэх ыкIи къихьащтымкIэ пшъэрылъхэр агъэнэфагъэх.

Зэхэсыгъом джащ фэдэу хэлэжьагъ МКъТУ-м ипрезидентэу ТхьакIущынэ Аслъан. Повесткэм хэтыгъэх университетым хэхъоныгъэу ышIыхэрэрэр, гъэсэныгъэ проектхэм ягъэцэкIэн ыкIи зэхэщэнхэм зэхъокIыныгъэу афэхъугъэхэр.

Повесткэ шъхьаIэм къыдыхэлъытагъэу университетым иректорэу Къуижъ Саидэ доклад къышIыгъ, ащ МКъТУ-м ичIыпIэ гъэсэныгъэ ыкIи научнэ сферэхэм зэращыпытэрэр къыкIигъэтхъыгъ. Анахьэу къыхигъэщыгъэр федеральнэ грантхэм ыкIи проектхэм дэгъоу зэрахэлажьэхэрэр ары. Джащ фэдэу мы илъэсым Дзэ егъэджэн гупчэмрэ медицинскэ кластерэу «ПрофиМед» зыфиIорэмрэ къызэIуахыгъэх, ахэр гъэсэныгъэ программэу Профессионалитет зыцIэм къыдыхэлъытагъэу агъэпсыгъэх. Къихьащт 2025-рэ илъэсым гъэсэныгъэ программакIэхэр атIупщыщтых, материальнэ-техническэ базэр агъэпытэщт, урысые шапхъэхэм янэкъокъушъуным университетыр фащэщт.

Медицинскэ кластерэу «ПрофиМед» зыфиIорэу гъэсэныгъэ федеральнэ программэу Профессионалитет зыцIэм къыдыхэлъытагъэу агъэпсыгъэм къытегущыIагъ Политехническэ колледжым ипащэу ХъутIыжъ Заурбэч.

Пшъэрылъ шъхьаIэу медицинскэ кластерэу «ПрофиМед» зыфиIорэм иIэр гъэсэныгъэ технологие пэрытхэр агъэфедэхэзэ IэпэIэсэныгъэшхо зыхэлъ медицинскэ кадрэхэм ягъэхьазырын ары. Псауныгъэм икъэухъумэнкIэ Адыгэ Республикэм щыкIагъэу иIэхэр дэгъэзыжьыгъэнхэмкIэ ар лъэубэкъушIу мэхъу, апшъэрэ IэпэIэсэныгъэ пшъэрылъхэр зэшIуахыным фэхьазырыщтых.

Проектэу «Къулыкъу ахьызэ егъэджэгъэнхэр» зыфиIорэр зэрагъэцакIэрэм къытегущыIагъ егъэджэн IофшIэнымкIэ проректорэу Людмила Задорожнаяр. Ащ къыIотагъ гъэсэныгъэ процессыр апшъэрэ еджапIэм хэгъэхьэгъэнымкIэ проектэу «Къулыкъу ахьызэ егъэджэгъэнхэр» зыфиIорэм мэхьанэшхо зэриIэр, теоретическэ шIэныгъэхэмрэ социальнэ пшъэрылъхэмрэ зэголъхэу студентмэ яIэпэIэсэныгъэ хагъахъо.

Научнэ IофшIэнымкIэ ыкIи инновационнэ хэхъоныгъэмкIэ проректорэу Татьяна Овсянниковам научнэ-ушэтын IофшIэнхэр зэрагъэцэкIагъэхэмкIэ зэфэхьысыжьхэр къышIыгъэх, ахэр къэралыгъо десэу наукэм ылъэныкъокIэ 2024-рэ илъэсым къатыгъэм къыдыхэлъытэгъагъэх.

Мыекъопэ къэралыгъо технологическэ университетым чIэхьащтхэм апае шапхъэу агъэнэфагъэхэм зэхэсыгъом икIэухым атегущыIагъэх. Гъэсэныгъэ программэхэу бакалавриатым, специалитетым, магистратурэм 2025/2026-рэ илъэсхэм уащеджэным фэшI федеральнэ шапхъэу зэхъокIыныгъэ зыфэхъугъэхэм адырагъэштэжьыгъэх, шъолъыр хабзэхэри къыщыдалъытэжьыгъэх.

ЭкономикэмкIэ ыкIи гъэIорышIэнымкIэ факультетым идеканэу Ешыгоо Светланэ магистерскэ программакIэу «Искусственный интеллект в финансово-экономических системах» зыфиIоу 38.04.08 «Финансы и кредит» зыцIэм къыдыхэлъытагъэм къытегущыIагъ. Непэрэ IофшIэн бэдзэрыр специалистхэу IэпэIэсэныгъэшхо зыхэлъхэм зэращыкIэрэм мы магистерскэ программэм игъэпсын къыкIэлъыкIуагъ. Ар гъэцэкIэгъэным пае IофшIакIохэу Урысые экономическэ университетэу Г. В. Плехановым ыцIэ зыхьырэм, ПАО «Сбербанкым» ыкIи АО «Альфа-Банкым» ащылажьэхэрэр къыращалIэхэзэ ашIыщт.

Джащ фэдэу МКъТУ-м ишIэныгъэлэжьхэм ясовет пшъэрылъхэр ыгъэнэфагъэх, ахэм ащыщых магистерскэ программэу ухьазырын лъэныкъоу 40.04.01 Юриспруденциер, бакалавриатым ипрограммэу ухьазырын лъэныкъоу 08.03.01 ПсэолъэшIыныр, программэу СПО ухьазырын лъэныкъоу 08.02.01 Унэхэм яшIын ыкIи ягъэцэкIэжьын.

Университетым щеджэрэ студентмэ еджапкIэу атырэм икъегъэIыхын фэгъэхьыгъэ упчIэми зэхахьэм щытегущыIагъэх.

Зэхэсыгъом шIуагъэ къытэу кIуагъэ, къыщаIэтыгъэ Iофыгъохэр зэкIэ зэхафыгъэх.