Мы мафэхэм студенческэ щыIакIэу университетым чIэлъым гуфэбагъэрэ гукIэгъуныгъэрэ хэлъэу хъугъагъэ. ИлъэсыкIэ мэфэкIым зипсауныгъэ зэщыкъуагъэхэмрэ гъэсакIо-тьюторхэмрэ зэрипхыгъэх, ащкIэ сэкъатныгъэ зиIэхэм я Урысые обществэ идевизэу «Тызэгъусэу нахьыбэ тшIэщт» зыфиIорэр къаушыхьатыжьыгъ. Ахэр гущыIэхэ къодыехэп, щыIэныгъэм ифилософиех.

Гу кIочIэ лъэш зиIэхэр, зигушъхьэ байхэр къэзэрэугъоигъэх. Iофтхьабзэр мэфэкIыр хэгъэунэфыкIыгъэнымкIэ агъэуцугъэп, гумэкIыгъоу щыIэхэми щатегущыIагъэх. Семестрэу рекIокIыгъэм изэфэхьысыжьхэмкIи зэдэгощагъэх, егъэджэн процессыр нахьышIу шIыгъэнымкIи гукъэкIэу яIэхэр къыраIотыкIыгъэх, пшъэрылъыкIэхэр агъэнэфагъэх.

Хэлэжьагъэ пэпчъ исэнаущыгъэ елъытыгъэу зыкъыгъэлъэгъуагъ. ГущыIэм пае, лечебнэ факультетым истудентэу Шахые Амир массажист хъунэу фай, инеущрэ сэнэхьат чаныгъэ къызхигъафэзэ зыфегъэхьазыры. Андрей Жаровыр апэрэ курсым, экологическэ факультетым щеджэ, пхъэм хэшIыкIыгъэ пкъыгъохэр ешIых, ахэр джэгуалъэх, пазлэу щытых, нэмыкIых. ИIофшIагъэмэ фэбагъэр къахэщы.

Марк Романченкэм ищыIэныгъэ мэз хъызмэтым рипхынэу рихъухьагъ, ащ экологическэ факультетым феджэ. Руслан Коржиныр а факультет дэдэм щеджэ, гукъыдэчъэу иIэр, 3D-проектэу щытэу ландшафтнэ дизайныр ыгъэпсынэу ары, ащ фэгъэзагъэ лъэныкъом еджэнэу чIэхьагъ.

Информационнэ технологием пылъхэри Iофым чанэу хэлажьэх. Вероника Монисовар контент-менеджментэу Хэгъэгу зэошхом исайт фэгъэхьыгъэм ыкIи факультетым инэкIубгъохэм апылъ. Бжьэц Салбый мультфильмэхэм макъэ акIэлъхьэгъэныр зэрегъашIэ ыкIи Черкесскэ медиаплатформэм чанэу дэлажьэ, инеущрэ мафэ ицыхьэ пытэ телъэу егъэпсы.

Студентхэм афэгушIонхэу зэхахьэм къеблэгъагъэх егъэджэн IофшIэнымкIэ проректорэу Людмила Задорожнаяр ыкIи экологическэ факультетым идеканэу Галина Коноваловар. Ахэр ныбжьыкIэмэ къафэлъэIуагъэх псауныгъэ пытэ яIэнэу, 2025-рэ илъэсым сэнаущыгъэу ахэлъыр къызэIуахынэу ыкIи гъэхъагъэхэр ашIынхэу.