Мыекъопэ къэралыгъо технологическэ университетыр ыкIи Белорусскэ къэралыгъо технологическэ университетыр зэрэзэдэлэжьэщтхэм фэгъэхьыгъэ зэзэгъыныгъэм кIэтхагъэх. Ащ зыIапэ кIэзыдзагъэхэр МКъТУ-м иректорэу Къуижъ Саидэрэ БКъТУ-м иректорэу Игорь Войтовымрэ. Научнэ ыкIи гъэсэныгъэ лъэныкъохэмкIэ Iоф зэдашIэныр ары зэзэгъыныгъэм кIэу къыздихьыщтхэр.

Гъэсэныгъэмрэ шIэныгъэмрэкIэ аIэ зэкIэдзагъэу зэдэлэжьэнхэу апшъэрэ еджэпIитIумэ зэдаштэ. Ар инновационнэ программэхэм ягъыпсэн, технологиякIэхэм язэхэгъэуцон ыкIи яушэтын афэгъэхьыгъэщт. Джащ фэдэу кIэлэегъаджэхэмкIэ, студентхэмкIэ ыкIи аспирантхэмкIэ зэхъожьыхэзэ ашIыщт, стажировкэхэр акIущтых, семинархэр, конференциехэр, симпозиумхэр зэхащэщтых.

Лъэныкъо шъхьаIэхэу зэрэзэдэлэжьэщтхэр:

— Непэрэ гъэсэныгъэ технологиехэм хэхъоныгъэ ягъэшIыгъэныр ыкIи егъэджэн процессым егугъыгъэныр.

— Научнэ-техническэ лъэныкъомкIэ опытэу яIэмкIэ зэхъожьынхэр ыкIи зэхэт ушэтынхэр ашIынхэр.

— Апшъэрэ тедзапIэмэ научнэ IофшIагъэхэр къащыхэутыгъэныр.

— Дунэе проектхэм ыкIи грантхэм ягъэцэкIэн.

— КIэлэегъаджэмэ ыкIи студентмэ стажировкэхэр, ушэтынхэр афызэхэщэгъэныр.

— Профессиональнэ гъэсэныгъэ тедзэм пае модельхэр гъэпсыгъэнхэр.

— Научнэ гъэхъагъэхэр дунаим щызэлъягъэшIэгъэнхэр.

Зэдэлэжьэныгъэм иIофыгъо шъхьаIэхэм ащыщэу щытыщт прикладной ушэтынхэр, технологиехэм ятрансфер ыкIи патентнэ IофшIэныр. Дунэе научнэ-гъэсэныгъэ хъоум хэщагъэхэ зэрэхъущтыми апшъэрэ еджапIэхэр дэлэжьэщтых.

Мыекъопэ къэралыгъо технологическэ университетыр зэзэгъыныгъэу зыкIэтхагъэхэр дунэе шапхъэхэм атехьэгъэнымкIэ лъэубэкъушIу хъущт. Зэгъусэхэу гъэхъагъэхэр зэрашIышъущтхэр бгъуитIуми къагурыIуагъ, инновационнэ шIыкIэхэр къагъотыщтых, IэпэIэсэныгъэшхо зыхэлъ кадрэхэр агъэхьазырыщтых.