Мыекъопэ къэралыгъо технологическэ университетым хэхьэрэ Дзэ егъэджэн гупчэм Урысыем и МЧС икъутамэу Адыгэ Республикэм щыIэм и Общественнэ совет изэфэхьысыжь зэхэсыгъо щыкIуагъ.

Университетым иректорэу Къуижъ Саидэрэ Урысыем и МЧС икъутамэу Адыгэ Республикэм щыIэм ипащэу Станислав Илющенкэмрэ зэхэсыгъом тхьаматагъор щызэрахьагъ. Общественнэ IофшIэнэу 2024-рэ илъэсым рагъэкIокIыгъэм апэ зэфэхьысыжьхэр фашIыгъэх, нэужым 2025-рэ илъэсым ашIэщтхэр рахъухьагъэх.

Станислав Илющенкэм Iофтхьабзэу зэхащагъэмэ ягугъу къышIыгъ. Анахьэу ынаIэ зытыридзагъэр гъэсэныгъэ учреждениехэм ыкIи общественнэ организациехэм ящынэгъончъагъэ зэрэзэхэщагъэр ары, джащ фэдэу зэпхыныгъэхэм ягъэпытэн, ныбжьыкIэхэм щынэгъончъэнымкIэ культурэу ахэлъым зегъэушъомбгъугъэн зэрэфаер, социальнэ проектхэр агъэцакIэхэ хъумэ а Iофыгъор къыдалъытэнэу зэрэщытыр къыхигъэщыгъ. Ащ фэшъхьафэу, Илющенкэм идоклад хэтыгъ илъэсым къыкIоцI цIыфхэм закъызэрафагъэзагъэр, ахэр къызкIэлъэIущтыгъэхэр. НахьыбэрэмкIэ ошIэ-дэмышIэ Iофэу къэхъугъэхэмкIэ ахэр IэпыIэгъу лъыхъущтыгъэх. КъулыкъушIэхэм игъом ыкIи хабзэм тетэу ахэм джэуапэгъу афэхъугъэх, яIэпыIэгъу алъыIэсыгъ. Урысыем и МЧС икъутамэу Адыгэ Республикэм щыIэм чанэу дэлажьэх. Лъэныкъоу «МашIо щынэгъончъэным» щеджэрэ студентмэ апае игъэкIотыгъэ программэ агъэнэфагъ. Джащ фэдэу Урысые студенческэ къэгъэнэжьын отрядым ыкIи ГуфэкIо мэшIогъэкIосэ къулыкъум зэпхыныгъэ дэгъу адыряI. КIэлэеджакIохэм ыкIи сэкъатныгъэ зиIэ сабыймэ адэлэжьэнхэр, ахэм мэшIо щынэгъончъэным идесэхэр, джащ фэдэу апэрэ IэпыIэгъур ягъэкIыгъэным афэгъэхьыгъэ Iофтхьабзэхэр ягъэшIэгъэнхэм дэлажьэх.

Урысыем и МЧС икъутамэу Адыгэ Республикэм щыIэм ипащэ иапэрэ гуадзэу Арарат Авакяным Общественнэ советым 2024-рэ илъэсым иятIонэрэ кIэлъэныкъо Iофэу ышIагъэм къытегущыIагъ. Зэхэт Iофтхьабзэхэр гъэсэныгъэ учреждениехэм зэрадашIыгъэхэр, патриотическэ акциехэм ыкIи информационнэ проектхэм зэрахэлэжьагъэхэр къыIуагъ. 2025-рэ илъэсым зэрылэжьэщтхэ планыр зэхагъэуцуагъ ыкIи аштагъ, ащ хэхьагъэх къэгъэнэжьакIо сэнэхьатыр цIыфхэм ягъэшIэгъэнымкIэ нахь Iофыгъуабэ зэхащэныр, ныбжьыкIэхэм адэлэжьэгъэнымкIэ шэпхъакIэхэр къыхэхыгъэнхэр. Хэгъэгу зэошхом ТекIоныгъэ къызщыдахыгъэр илъэс 80 зэрэхъурэм ихэгъэунэфыкIын хэушъхьафыкIыгъэу тегущыIагъэх.

Дзэ ухьазырыныгъэ зиIэ специалистхэм зэрадэлажьэхэрэм ыкIи дзэ-патриотическэ IофшIэнэу Мыекъопэ къэралыгъо технологическэ университетым хэхьэрэ Дзэ егъэджэн гупчэм щагъэцакIэрэм къытегущыIагъ ащ ипащэу Нурлан Самадьяновыр. Непэрэ мафэм ехъулIэу студентмэ ухьазырыныгъэу яIэр зыфэдэр, ахэр зэреджэхэрэр ащ къыIотагъэх. ЕгъэджэнымкIэ шIыкIакIэу къагъотыгъэхэм, техническэ амалхэм, патриотическэ акциехэм зэрахэлажьэхэрэр пащэм къыхигъэщыгъэх.

Зэхэсыгъом икIэухым советым хэтхэм Дзэ егъэджэн гупчэр къаплъыхьагъ, ащ иматериальнэ-техническэ базэ зыфэдэр зэрагъэлъэгъугъ, гъэсэныгъэ амалэу гупчэм IэкIэлъхэр зэрагъэшIагъ.

Мыекъопэ къэралыгъо технологическэ университетымрэ Урысыем и МЧС икъутамэу Адыгэ Республикэм щыIэмрэ язэдэлэжьэныгъэ лъагъэкIуатэ, ар щынэгъончъэным, ныбжьыкIэхэм ягукъэкIхэм адегъэштэгъэным ыкIи патриотическэ пIуныгъэм зегъэушъомбгъугъэным фэгъэзагъ.