Мы мафэхэм онлайн-шапхъэм илъэу демо-мафэр рагъэкIокIыгъ, ащ хэлэжьагъэх проектнэ-гъэсэныгъэ интенсивэу «ГукъэкIым къыщегъэжьагъэу пэчIынатIэм нэсэу» Университет 20.35. зыфиIорэм щытекIуагъэхэр.

Суденческэ технологическэ предпринимательскэ командэ 18-у хэгъэгум ичIыпIэ зэфэшъхьафхэм къарыкIыгъэхэр Iофтхьабзэм хэлэжьагъэх. ахэм зэу ащыщыгъ МКъТУ-м икъутамэу поселкэу Яблоновскэм дэтым икомандэ.

Мыекъопэ къэралыгъо технологическэ университетым икъутамэ икомандэ ипащагъ гъэсакIоу Дмитрий Бебко, командэм хэтыгъэх Кирилл Цветноир ыкIи Владислав Богатыревыр, ахэм лъэтегъэуцо фашIыгъ проектэу «Инновационный способ очистки нефтепродуктов от серы озоном» зыфиIорэм. ЧIыдагъэм игумэкIыгъо шъхьаIэхэм ащыщыр дэгъэзыжьыгъэным проектыр фэIорышIэ — тхъомзашхъоу чIыдагъэу къыдагъэкIыжьрэм хэлъыр нахь макIэ шIыгъэныр. А пшъэрылъым игъэцэкIэн мэхьанэ зыкIиIэр, зы лъэныкъомкIэ технологическэ оборудованием ищынэгъончъагъэ егъэпсы, адрэмкIэ экологиер нахьышIу шIыгъэным фэлажьэ.

Тхъомзашхъоу (сера) чIыдагъэм хэлъыр гъэшхъуагъэ лъэшэу щыт, ащ Iэмэ-псымэхэр зэхегъэтакъох, ошIэ-дэмышIэ Iофхэр къыкIэлъэкIох. Ащ фэшъхьафэу тхъомзашхъор бэу зыхэлъ продуктхэр тыкъэзыуцухьэрэ дунаим иэкологие егуаох. Джащ пае, технологиякIэу озонэ шапхъэкIэ агъэпсырэр экологие щынэгъончъэным екIурэ зы лъэубэкъушIоу плъытэн плъэкIыщт.

— Проектнэ-гъэсэныгъэ интенсивэу «ГукъэкIым къыщегъэжьагъэу пэчIынатIэм нэсэу» Университет 20.35. зыфиIорэу тызхэлэжьагъэм лъэшэу тыгу къыIэтыгъ. ЗэкIэхэми опыт дэгъу тиIэхэ хъугъэ, проектхэм ягъэцэкIэнкIэ IэпыIэгъушIу къытфэхъугъ. ГущыIэм пае, тэ типроектэу «Инновационный способ очистки нефтепродуктов от серы озоном» зыфиIорэр. Мыщ фэдэ Iофтхьабзэмэ гукъыдэчъыкIэхэр къытфахьых, IофыгъуакIэхэм такъыфагъэущы. Сэ гъэсакIоу сыщытышъ. ЗэкIэ студентхэм сыкъяджэ мыщ фэдэ Iофтхьабзэхэм ахэлэжьэнхэу. Апшъэрэ еджэпIэ шъхьаIэм ыкIи ащ ипащэхэм тхьаегъэпсэу ясэIо къызэрэддэIэпыIагъэхэм афэшI, — къыкIигъэтхъыгъ Дмитрий Бебко.

Проектым экспертнэ сообществэм осэшхо къыфишIыгъ ыкIи инновационнэ екIолIакIэу иIэр къыхагъэщыгъ, ар практикэм зэрэщигъэфедэрэр. Лъэтегъэуцор инвесторэу хэлэжьагъэхэми къекIолIагъэхэми ашIогъэшIэгъоныгъ.

Шъугу къэдгъэкIыжьын, интенсивым изэхэщакIор Мыекъопэ къэралыгъо технологическэ университетым и «Точка кипение» икоманд ары.