Мыекъопэ къэралыгъо технологическэ университетым Iэнэ хъурае щыкIуагъ, ар зыфэгъэхьыгъагъэр апшъэрэ еджапIэмрэ гурыт еджапIэхэмрэ зэрэзэдэлажьэхэрэр ары.

Конституционнэ гъэпсыным ыкIи къэралыгъо ыкIи муниципальнэ гъэIорышIэным икафедрэ икIэлэегъаджэхэр, Лицееу № 34-м икIэлэегъаджэхэр, экономикэм ыкIи гъэIорышIэным ифакультет истудентхэр, Лицеим ия 10-рэ «Б» классым исхэу МКъТУ-м итехнологическэ академие ЦIыкIум щеджагъэхэр Iофтхьабзэм хэлэжьагъэх.

Iэнэ хъураем къыдыхэлъытагъэу кIэлэеджакIо проектхэм ялъэтегъэуцохэр къагъэлъэгъуагъэх, кIэлэеджакIохэм яушэтын Iофхэу апшъэрэ еджапIэм игъэсэныгъэ программэ къыдилъытэхэу зэхащэхэрэм атегущыIагъэх. А программэхэм ахэлажьэхэрэ кIэлэеджакIохэм шIэныгъэ тедзэхэр щызэрагъэгъоты, ушэтынхэм ахэлэжьэшъух. Ащ къыхэкIэу апшъэрэ еджапIэм илIыкIомэ абитуриентхэу сэнаущыгъэ зыхэлъхэр къыхагъэщын алъэкIы. Джащ фэдэу еджапIэмрэ апшъэрэ еджапIэмрэ язэдэлэжьэн шIуагъэу къытырым игугъу ашIыгъ.

Конституционнэ гъэпсыным ыкIи къэралыгъо ыкIи муниципальнэ гъэIорышIэным икафедрэ ипащэу Болэкъо Мариеттэ къызэриIуагъэмкIэ, ащ фэдэ зэдэлэжьэныгъэм опытэу къыхэкIырэр ащ хэлажьэрэмэ зэкIэмэ къашъхьапэ. КIэлэегъаджэхэм яIэпэIэсэныгъэ хагъахъо, кIэлэеджакIохэм сэнэхьатэу хахыщтыр къафэнафэ, яшэни зэрехъокIы.

Iофтхьабзэм икIэухым проектым ипащэу КIыржьынэ Светланэ кIэлэеджакIохэм упчIэжьэгъу афэхъугъ, «Къэлэ гъэIорышIэным» ылъэныкъокIэ шIэныгъу яIэм зэрэхагъэхъуагъэр кIэлэеджакIохэм къыхагъэщыгъ. Проектхэм Iоф адашIэзэ ежь-ежьырэу информацием дэлэжьэнхэ, ящыкIагъэр къыхахын ыкIи ащ елъытыгъэу пшъэрылъыкIэхэр агъэуцушъугъэх. Джащ фэдэу научнэ IофшIэныри нахь ашIогъэшIэгъон хъугъэ. КIэлэеджакIохэм ащыщыбэхэм МКъТУм экономикэм ыкIи гъэIорышIэнымкIэ ифакультет чIахьэхэ ашIоигъоу къаIуагъ.