Адыгеим щыпсэурэ сабыйхэм ыкIи ныбжьыкIэхэм физическэ культурэм ыкIи спортым хэхъоныгъэхэр щягъэшIыгъэнхэмкIэ Мыекъопэ къэралыгъо технологическэ университетым мэхьанэу иIэр джыри зэ къыгъэшъыпкъэжьыгъ.

Мы мафэхэм МКъТУ-м иректорэу Къуижъ Саидэ дзюдомкIэ Урысыем и Федерацие и Президентэу Сергей Соловейчикым ирэзэныгъэ тхылъ къыфагъэшъошагъ, ар къызкIыхагъэщыгъэр «ЕджапIэм джыри чIэмыхьэхэзэ дзюдом фегъэжьэгъэнхэр — Адыгеир»  ыкIи «ЕджапIэм джыри чIэмыхьэхэзэ дзюдом фегъэжьэгъэнхэр — Сириусыр» зыфиIохэрэ проектхэм ахэлажьэхэрэм зэIухыгъэ тренировкэхэр зэрарагъэшIыгъэм фэшI. МКъТУ-м ипрофессорэу, экологическэ факультетым идеканэу ыкIи проектэу «ЕджапIэм джыри чIэмыхьэхэзэ дзюдом фегъэжьэгъэнхэр — Адыгеир»  зыфиIорэм инаучнэ пащэу Галина Коноваловар джащ фэдэу физическэ культурэмкIэ ыкIи спортымкIэ Адыгеим и Комитет итхьаматэу Дэгужъые Мурат щытхъу тхылъкIэ къыхигъэщыгъ.

2022-рэ илъэсым ишэкIогъу мазэ лъэныкъуиплI къызэдэзыубытырэ зэзэгъыныгъэ зэдашIыгъагъ: МКъТУ-р, шъолъыр общественнэ организациеу «ДзюдомкIэ Адыгеим и Федерацие», (ащ ипрезидентэу Лъэустэнджэл Муратэ ыцIэкIэ), физическэ культурэмкIэ ыкIи спортымкIэ Адыгеим и Комитет (ащ итхьаматэу Дэгужъые Муратэ ыцIэкIэ) ыкIи кIэлэцIыкIу IыгъыпIэу №21-р (ащ ипащэу Лые Саидэ ыцIэкIэ). А зэзэгъыныгъэр лъапсэ фэхъугъ мы проект гъэшIэгъоныр гъэцэкIэгъэным, джыри еджапIэм пэмыхьагъэ сабыйхэм физическэ культурэу дзюдом щыщ приемхэр зыхэщагъэхэр арагъэшIэнхэм.

Программэм ипшъэрылъ шъхьаIэхэр — физическэ культурэмрэ спортымрэ кIэлэцIыкIу IыгъыпIэмэ ащыIэ сабыймэ шIу ягъэлъэгъугъэныр, япсауныгъэ игъэпытэн физическэ екIолIакIэхэмкIэ псыхьэгъэныр.

Программэм зэшIуихыщт Iофыгъохэр:

— ЗекIоным ыкIи щынэгъончъэу ебэджынхэм фэгъэсэгъэнхэр.

— Физическэ, психическэ ыкIи хэушъхьафыкIыгъэ хэхъоныгъэхэр сабыйхэм арагъэгъотыныр.

— Спортым фэщагъэхэу, ащ нэшIукIэ еплъхэу пIугъэнхэр.

— Социальнэ, интеллектуальнэ ыкIи эстетическэ нэшанэхэр сабыйхэм ахэлъхьэгъэныр.

Зэзэгъыныгъэм къыделъытэ ащ кIэтхагъэхэр зэкIэ проектым зэфэдэу къыхэлэжьэнхэр, ащ ыпкъ къикIэу Iофыр лъагъэкIотэн алъэкIы. Проектэу «ЕджапIэм джыри чIэмыхьэхэзэ дзюдом фегъэжьэгъэнхэр» зыфиIорэр джыри 2018-рэ илъэсым УФ-м и Президентэу Владимир Путиным иунашъокIэ Шъачэ щатIупщыгъагъ. 2020-рэ илъэсым къыщегъэжьагъэу Мыекъуапэ ар щагъэцакIэ. ДзюдомкIэ Урысыем и Федерацие иIэпыIэгъоу Мыекъопэ къэралыгъо технологическэ университетым урысые семинарэу «Научно-методические основы занятий с детьми дошкольного возраста физической культурой с элементами средств дзюдо» зыфиIорэр ригъэкIокIыгъ. 2022-рэ илъэсым игъэтхапэ мазэ университетым Урысыем ичIыпIэ зэфэшъхьафмэ къарыкIыгъэ тренер 63-мэ егъэджэнхэр щакIугъэх. ахэмэ ащыщэу 16-р — Адыгэ Республикэм щыщ тренерых — УрысыемкIэ ар анахь къэгъэлъэгъон ин.

Проектым инаучнэ пащэу Галина Коноваловам къызэрэхигъэщыгъэмкIэ, тренировкэмэ ягъэзекIон шапхъэу апылъхэр тэрэзэу гъэцэкIэгъэнхэм анахьэу лъэплъэх. Ащ ыпкъ къикIэу хэукъоныгъэхэр щыгъэзыягъэхэ мэхъу. Адыгеим проектыр зыкIыщыгъэшIэгъоныр, ащ спортивнэ организацие къодыехэр арэп хэщагъэхэр, медицинскэ учреждениехэри хэлажьэх. СМКъТУ-м ипедиатрическэ факультет истудентхэм врач-педиатрэхэр ягъусэхэу физическэ IофшIэнхэр сабыйхэм хэхъоныгъэ ашIынымкIэ шIуагъэу къатырэр зыфэдэр зэрагъашIэ.

Адыгеим щагъэцакIэрэ проектыр зэлъашIэрэ тренерэу Кобл Якъубэ ишIэжь фагъахьыгъ, ар лъэшэу фэягъ республикэм ис сабыйхэр яцIыкIугъом къыщегъэжьагъэу спортым хэщагъэхэу хъунхэм, олимпийскэ чемпионыбэхэр къахэкIынхэм. Ар къызыхъугъэр илъэс 85-рэ зыщыхъурэм ехъулIэу игухэлъ гъэцэкIагъэ хъугъэ, игукъэкIхэм гъэхъагъэхэр къакIэлъэкIох.

Проектэу «ЕджапIэм джыри чIэмыхьэхэзэ дзюдом фегъэжьэгъэнхэр» зыфиIорэр — спортивнэ программэ къодыеп, ар Iофтхьабзэ комплекс зэхэт, зэфещэх спортыр, медицинэр ыкIи гъэсэныгъэр. МКъТУ-р, дзюдомкIэ Адыгеим и Федерацие, физическэ культурэмкIэ ыкIи спортымкIэ Адыгеим и Комитет ыкIи нэмыкIхэу зэзэгъыныгъэм кIэтхагъэхэр зэгъусэхэу проектыр дэгъу дэдэу непэ агъэцакIэ, тапэкIи а Iофыр зэрэлъагъэкIотэщтым щэч хэлъэп.