МКъТУ-м и Акселераторэу «ИнноВектор» зыцIэм иящэнэрэ едзыгъо ичIэтIупщыгъо Iофтхьабзэ Мыекъопэ къэралыгъо технологическэ университетым непэ щыкIуагъ.

Университетым иактовэ зал къыщызэрэугъоигъэх анахь креативнэ, сэнаущыгъэ зыхэлъ ыкIи гукъэкIыбэ зиIэ студентхэр, ахэмэ дэгъу дэдэу акселераторым егъэджэнхэр щакIугъэх ыкIи яинновационнэ гукъэкIхэр агъэцэкIэнхэм фэхьазырых.

ШIуфэс псалъэкIэ зэхахьэм хэлажьэрэмэ закъыфагъэзагъ егъэджэн IофшIэнымкIэ МКъТУ-м ипроректорэу Людмила Задорожнаяр ыкIи ректоратым упчIэжьэгъоу щыIэ Сергей Чефрановыр. Ахэмэ программэу «ИнноВекторым» предпринимательскэ IофхэмкIэ ыкIи студентхэм ястартапхэм адегъэштэгъэнымкIэ мэхьанэшхо зэриIэр къыхагъэщыгъ.

2024-рэ илъэсым университетым зичэзыу грантыр къыхьыгъ ыкIи сомэ миллиони 6,4-рэ къыратыгъ. Ащ фэдэ ахъщэ IэпыIэгъум ишIуагъэкIэ программэм зырагъэушъомбгъугъэ къодыеп, урысые эксперт пэрытхэу ыкIи трекерхэу Лъэпкъ технологическэ инициативэхэм ащылажьэхэрэр къырагъэблэгъэнхэ алъэкIыгъ. Ящэнэрэ едзыгъом нэбгырэ 1200-м ехъу хэлэжьагъ, ахэм ащыщэу 500-р университетым иIофышIэх ыкIи истудентых. IэкIыб специалистэу бэ дэдэ хэхьагъ — эксперт 18 ыкIи трекер 13 — командэмэ ягукъэкIхэр агъэцэкIэнхэмкIэ адэIэпыIэщтыгъэх.

Ящэнэрэ едзыгъом къыщаIэтыгъэ Iофыгъохэр непэрэ мафэм къыздихьырэ щыкIагъэу технологиехэмкIэ, биотехнологиехэмкIэ ыкIи гъомлэпхъэ технологиехэмкIэ щыIэхэр ары, тыкъэзыуцухьэрэ дунаим иэкологие ыкIи ар уплъэкIугъэныр, инженернэ ыкIи бизнес-екIолIакIэхэу къоджэ псэупIэхэм апае къаугупшысыгъэхэр. ЧIыпIэ гъэнэфагъэ щаубыты джащ фэдэу искусственнэ интеллектым, цифрэ сервисым ыкIи апхырыкIырэ технологиехэм, нейротехнологиехэм, робототехникэм ыкIи мехатроникэм.

МКъТУ-м и Акселераторэу «ИнноВекторым» ипшъэрылъ шъхьаIэр — экосистемэ гъэпсыгъэныр, ащ студентхэмрэ ныбжьыкIэ ушэтакIохэмрэ ягукъэкIхэр щагъэцэкIэнхэ алъэкIыныр, практикэм ахэр щагъэфедэжьынхэр, непэрэ инновационнэ технологиехэр къыдалъытэнхэр. Ящэнэрэ едзыгъом игъэсэныгъэ программэ къыдыхэлъытагъэу Iофтхьабзэ 36-рэ рагъэкIокIыгъ: лекциехэр, воркшопхэр, тренингхэр ыкIи стартап-баттлхэр, джащ фэдэу проектхэм ялъыгъэкIотэн.

Программэм Iофыгъо шъхьаIэу хэтыгъэр — индустриальнэ ныбджэгъумэ ыкIи инвестормэ адэлэжьэгъэныр.

Мыекъопэ къэралыгъо технологическэ университетыр Адыгэ Республикэм ит хъызмэтшIапIэмэ ыкIи организациемэ чанэу адэлажьэ ыкIи ахэмэ инновационнэ гукъэкIхэр адегъэцакIэх. Программэм елъытыгъэу адэлажьэх экономикэм хэхъоныгъэ егъэшIыгъэнымкIэ ыкIи сатыумкIэ Министерствэм, мэкъу-мэщымкIэ Министерствэм, Республикэ бизнес-инкубаторым, предпринимательствэм дэIэпыIэгъэнымкIэ Гупчэм, Урысые общественнэ организациеу «Опора России» зыфиIорэм, джащ фэдэу компание ыкIи научнэ учреждение пчъагъэхэм.

Торжественнэ зэхахьэм къалэжьыгъэ бгъэхалъхьэхэр щаратыжьыгъэх «ИнноВекторым» иэкспертнэ совет хэтхэм зэкIэм: командэм ипащэхэм, гъэсакIохэм, МКъТУ-м икIэлэегъаджэхэм, студентхэм яегъэджэн зиIахьышIу хэзылъхьагъэхэм. МэфэкI концертым студентхэм зыкъыщашIыгъ, орэдхэр къаIуагъэх ыкIи къэшъо номерхэр, сэмэркъэу зыхэлъэу агъэуцугъэ сценкэхэр къагъэлъэгъуагъэх.

МКъТУ-м и Акселераторэу «ИнноВектор» зыфиIорэр программэм шIогъэшхо къытыным дэлажьэ, ар университетым иинновационнэ екIолакIэ зэригъэпсыщтым пылъ, технологическэ предпринимательствэм ылъэныкъокIэ лъэпкъ шIоигъоныгъэхэр къыделъытэх. МКъТУ-м эксперт пэрытхэр зэрищалIэхэзэ, студентмэ хэхъоныгъэ аригъэшIызэ, Урысыем иэкономикэ зыкъыригъэIэтыным иIахьышхо хелъхьэ.