ГъэсэныгъэмкIэ Урысыем и Министерствэ зэхищэрэ зэнэкъокъум илъэсищ хъугъэшъ Мыекъопэ къэралыгъо технологическэ университетыр хэлажьэ. Iофтхьабзэмэ япшъэрылъыр — сэнаущыгъэ зыхэлъ ныбжьыкIэхэр къыхэгъэщыгъэнхэр ыкIи хэхъоныгъэхэр ягъэшIыгъэнхэр, сабый пэпчъ иамалхэр ыгъэфедэшъунхэм къыфэщэгъэнхэр. А гукъэкIыр лъэпкъ проектэу «Гъэсэныгъэр» зыфиIорэмкIэ агъэцакIэ.

Мы илъэсым университетым ипрограммэ шапхъэ лъагэхэр къыухъумагъэх. Проектмэ япащэхэм амалэу яIэр зэкIэ рахьылIагъ, ахэм ягукъэкIхэр гъэсэныгъэмкIэ УФ-м и Министерствэ 2024-2025-рэ еджэгъу илъэсым телъытагъэу зэхащэрэ Iофтхьабзэхэм ахэфэнхэм пае. Ащ къыхеубытэх олимпиадэхэр, интеллектуальнэ ыкIи творческэ зэнэкъокъухэр, ахэр ныбжьыкIэхэм зызыщаушэтыщт лъэныкъуабэхэмкIэ гъэпсыгъэх: шIэныгъэм ыкIи искусствэм къащегъэжьагъэу физическэ культурэм ыкIи спортым анэсыжьэу. А Iофтхьабзэмэ ахэлажьэрэ ныбжьыкIэмэ опыт къодыеп яIэу хъурэр, ахэмэ ЗыкI къэралыгъо ушэтынэу атыщтхэм баллхэр афыхагъахъожьы.

2024/2025-рэ еджэгъу илъэсым телъытагъэу университетым ипроектищ гъэсэныгъэмкIэ УФ-м и Министерствэ иперечень хэхьагъэх. Проект пэпчъ ныбжьыкIэхэм ясанаущыгъэ зэрэхагъэхъощтым фэгъэхьыгъ.

Урысые ныбжьыкIэ проектхэм язэнэкъокъоу «Уигухэлъ факIу!».

Мы проектыр щагу зэтегъэпсыхьэгъэным, гуфэкIоныгъэм, медиам, IT-м, псауныгъэм икъэухъумэн ыкIи предпринимательствэм афэгъэхьыгъ. Ащ ипшъэрылъыр — ныбжьыкIэхэм щыIэныгъэм екIолIэкIэ тэрэз фагъотыныр, социальнэ гукъэкIхэм къафэгъэущыгъэнхэр, проектнэ командэхэм адегъэштэгъэныр, сэнэхьатэу къыхахыщтымкIэ адэIэпыIэгъэныр.

Зэнэкъокъум ипащэу агъэнэфагъэхэр маркетингым, сервисым ыкIи туризмэм якафедрэ идоцентэу, МКъТУ-м и «Точка кипение» ипрограммнэ пащэу Светлана Новиковамрэ МКъТУ-м и «Точка кипение» иадминистраторэу Мария Тамахинамрэ.

Студенческэ гукъэкIэу «Аграрий» зыфиIорэ Урысые зэнэкъокъу.

Гурыт профессиональнэ гъэсэныгъэ учреждениехэм ащеджэрэ студентхэм апае лъэныкъохэу зоотехниер, агроинженериер, экологическэ щынэгъончъэныр ыкIи инновационнэ технологиехэр агропромышленнэ комплексым зэрэщагъэфедэхэрэм афэгъэхьыгъэ зэнэкъокъоу ар гъэпсыгъэ. Анахьэу анаIэ зытырадзэрэр предпринимательскэ къулайныгъэу, пэщэныгъэ шIыкIэ-амалэу яIэхэм ахэгъэхъогъэныр, джащ фэдэу практическэ опыт зэрагъэгъотыным фытегъэпсыхьэгъэнхэр ары. Мы проектыр апэрэ илъэсэп загъэцакIэрэр, ащ ишIуагъэкIэ МКъТУ-м имэкъу-мэщ факультетым чIэхьэрэ студентхэм япчъагъэ нахьыбэ хъугъэ.

Проектым ипащэр мэкъу-мэщ продукцием икъыдэгъэкIынкIэ технологиехэм якафедрэ иапщэу, мэкъу-мэщ шIэныгъэхэмкIэ докторэу Мамсыр Нурбый.

Профильнэ классхэм ащеджэрэ кIэлэеджакIохэм япроектхэм язэнэкъокъу.

2018-рэ илъэсым къыщегъэжьагъэу а зэнэкъокъур кIэлэеджакIохэм адэIэпыIэ, яушэтын ыкIи проектнэ амалэу яIэхэр къызэIуарагъэхы. КIэлакIэхэр адэлажьэх инженернэ, химикэ-биологическэ, медикэ-фармацевтическэ ыкIи социальнэ-экономическэ десэхэм. Пшъэрылъ шъхьаIэр — кIэлэеджакIохэр наукэм хэщэгъэнхэр ыкIи прикладной дисциплинэхэр шIу ягъэлъэгъугъэнхэр ары.

Проектым ипащэр — хьисапымкIэ, физикэмкIэ ыкIи системнэ анализымкIэ кафедрэм ипащэу, физикэ-хьисап шIэныгъэхэмкIэ кандидатэу Татьяна Дёминар ары.

ГъэсэныгъэмкIэ Урысыем и Министерствэ зэхищэрэ зэнэкъокъум зэрэщытекIуагъэхэм Мыекъопэ къэралыгъо технологическэ университетыр лъэгапIэм тырегъэуцо. НыбжьыкIэхэу сэнаущыгъэ зыхэлъхэр урысые лъэгапIэхэм анагъэсынхэу амал агъоты, стратегическэ зэзэгъыныгъэ Министерствэм дашIын алъэкIы, фондэу «Талант и успех» зыфиIорэм дэлажьэх, еджапIэхэу ыкIи колледжхэу зэрэхэгъэгоу итхэм Iоф адашIэ. Сэнаущыгъэ зыхэлъхэр университетым къызэрэзэрищалIэхэрэр мы проектхэм джыри зэ къаушыхьатыгъ.