Мыекъопэ къэралыгъо технологическэ университетым икъутамэу поселкэу Яблоновскэм дэтым ипроект федеральнэ шапхъэмкIэ анахь дэгъоу къыхагъэщыгъ.

Студенческэ предпринимательскэ командэ минищым ехъумэ апхырыкIи, тэтыер анахь командэ дэгъу 18-мэ ахэфагъ, джы ащ ипроект экспертмэ апашъхьэ ралъхьанэу щыт.

Хъугъэ-шIагъэр Iофыгъошхоу хъугъэ: зэнэкъокъум Урысыем ит университети 198-рэ, ахэм ащеджэрэ студент мин 14 хэлэжьагъэх.

МКъТУ-м икъутамэ икомандэу гъэсакIоу Дмитрий Бебкор зипащагъэр интенсивэу «ГукъэкIым къыщегъэжьагъэу пэчIынатIэм нэсыжьэу» Университет 2035-рэ зыфиIорэм идесэхэр зэкIэ дэгъу дэдэу ыгъэцэкIагъэх, джы тиуниверситетрэ Адыгэ Республикэмрэ Демо-мафэм къыщигъэлъэгъощтых. Тикъэралыгъо ишъолъыр анахь инхэм къащегъэжьагъэу зэнэкъокъум хэлажьэхэрэр: Санкт-Петербург, Самара, Казань, Тверь, Ростов-на-Дону, Удмуртиер, Новосибирск ыкIи Челябинск.

Интенсивым ипроект анахь дэгъухэмкIэ къыхахыгъэхэм джащ фэдэу МКъТУ-м икъутамэ икомандэ ахэфагъ, ащ зэкIэмкIи хэхьагъэр командэ 42-рэ ныIэп.

Ар студентхэмкIи гъэсакIохэмкIи текIоныгъэшху!

Къыхэгъэщыгъэн фае, Демо-мафэм хэлэжьэнхэу МКъТУ-м заявкиплI зэрикIыгъагъэр: фармацевтическэ, экологическэ ыкIи технологическэ факультетхэр, пос. Яблоновскэм щыIэ къутамэр. Дмитрий Бебко икомандэ гъэхъагъэу ышIыгъэр IэпэIэсэныгъэшхомкIэ щысэ, джащ студенческэ проектхэу тиуниверситет къыгъэхьазырхэрэр федеральнэ шапхъэхэм заратетхэр къегъэлъагъо.

Командэм текIоныгъэшхоу къыдихыгъэмкIэ тыфэгушIо ыкIи федеральнэ Демо-мафэм лъэтегъэуцо зэтегъэпсыхьагъэ щишIынэу тыфэлъаIо!

Шъугу къэдгъэкIыжьын, Мыекъопэ къэралыгъо технологическэ университетым иинтенсив икIэщакIор МКъТУ-м и «Точка кипение» икоманд ары.