Непэ Мыекъопэ къэралыгъо технологическэ университетым къэралыгъо гражданскэ ыкIи муниципальнэ къулыкъушIэхэм апае щызэхащэгъагъэ курсхэр щызэфашIыжьыгъэх.

Iофтхьабзэр зэхэгущыIэжь-практическэ шапхъэм илъэу рагъэкIокIыгъ, Iофыгъо шъхьаIэхэм щатегущыIагъэх.

Мы мафэхэм семинарэу «ШIуагъэ зыпылъ коммуникациехэр гъэкIэжьыгъэнхэр» зыфиIорэр зэхащагъ, ар зэрищагъ психологическэ шIэныгъэхэмкIэ кандидатэу, МКъТУ-м ипсихологическэ къулыкъу ипащэу, гупшысэным и Клубэу MindFitness зыцIэм иIэшъхьэтетэу, Урысые обществэу «ШIэныгъэм» изещакIоу Людмила Красновам. ЗещакIом анахьэу ынаIэ зытыридзагъэр зэзэгъыныгъэ зэдашIы хъумэ, е зэхэгущыIэжьхэмэ психологием мэхьанэу ратырэр, ар Iофым къызэрэхахьэрэр ары. Практикэ Iахьым семинарым хэлажьэхэрэм сценарием ирольхэр къыщашIыгъэх, рабочэ чIыпIэхэр зэхафыгъэх: яIофшIэгъухэм ыкIи япащэхэм адэгущыIэнхэм къащыублагъэу цIыфхэм зызэрафагъазэрэм нэсыжьэу. Ащ фэдэ шIыкIэхэм яшIуагъэкIэ, къулыкъушIэхэм екIолакIэхэр къагъотых, зэутэкIыныгъэхэм ашIокIынхэ алъэкIы. IэпэIэсэныгъэу къулыкъушIэмэ яIэм хэгъэхъогъэнымкIэ семинарым Iофышхо ыгъэцэкIагъ, softskills зыцIэм имэхьанэ къыхэщыгъ, тапэкIэ профессиональнэ хэхъоныгъэу ашIыщтым фищагъэх.

Къэралыгъо гражданскэ ыкIи муниципальнэ къулыкъушIэхэм хэхъоныгъэхэр ягъэшIыгъэнхэм дэлэжьэрэ Гупчэу МКъТУ-м иIэм непэ семинарэу щыкIуагъэм итемагъэр: «Къэралыгъо гражданскэ ыкIи муниципальнэ къулыкъум шапхъэу пылъхэр» зыфиIорэр ары. Ар зэрищагъ кIэлэегъаджэ ыкIи психологическэ шIэныгъэхэмкIэ кандидатэу, философием, социологием ыкIи педагогикэм якафедрэ иIофышIэхэу ЛэупакIэ Фатимэрэ Пафифэ Бэлэрэ. Къэралыгъо структурэхэм профессиональнэ шапхъэхэр ащыбгъэцэкIэныр Iофыгъо шъхьаIэхэм зэращыщыр, IофшIэныр лъыкIотэнымкIэ шIуагъэу апылъыр зещакIохэм къаIотагъ. Экспертмэ къызэрэхагъэщыгъэмкIэ, шапхъэхэм уатемыкIыныр арэп шъхьаIэр, ахэр лъапсэу щытынхэр ары. Къэралыгъомрэ обществэмрэ цыхьэ зэфашIызэ зэдэлэжьэнхэр ащ къыпкъырэкIы. КъулыкъушIэмэ пшъэдэкIыжьэу ахьырэми анаIэ джащ фэдэу тырадзагъ.

Гъэсэныгъэ курсхэм яхьатыркIэ къэралыгъо гражданскэ ыкIи муниципальнэ къулыкъушIэхэм хэхъоныгъэхэр ягъэшIыгъэнхэм дэлэжьэрэ Гупчэу МКъТУ-м иIэм яшIэныгъэхэм щахагъэхъогъэ къодыеп, япрактическэ лъэныкъохэри агъэпытагъэх.

Курсхэм ахэлэжьагъэхэм профессиональнэ хэхъоныгъэ зэрашIыгъэр къэзыушыхьатрэ сертификатхэр аратыжьыщтых.