Мы мафэхэм экономикэмрэ гъэIорышIэнымрэ яфакультет истудентхэмрэ икIэлэегъаджэхэмрэ хъызмэтшIапIэу ООО «Питейный дом» зыфиIорэм щыIагъэх, ащ производствэр зэрэщызэхэщагъэр зэрагъэлъэгъугъ.

Экскурсиер зекIо гъогу шъыпкъэ хъугъэ, производствэм иедзыгъо зэкIэлъыкIуакIэм зыщагъэгъозагъ.

Iофтхьабзэр зезыщагъэ Хьащыр Джэнэт хъызмэтшIапIэм тарихъэу пылъыр къыIотагъ, ащ къыкIэлъыкIоу технологическэ процессхэр зэрэрагъэкIокIыхэрэр хьакIэмэ къаригъэлъэгъугъ, джащ фэдэу Iэмэ-псымэу агъэфедэхэрэр, инновационнэ шIыкIэ-унашъоу заводым щашIыхэрэр ышъхьэ къырихыгъэх. Студентхэм мыщ къыщыдагъэкIырэ продукциер къарагъэлъэгъугъ, ар зэрэIуагъэкIырэм, дизайнерскэ къэмланхэр зэрашIыхэрэм ягугъу къашIыгъ. А пстэури экономикэм ыкIи гъэIорышIэным зищыIэныгъэ езыпхыщт студентхэм лъэшэу ашIогъэшIэгъоныгъ.

Анахьэу студентмэ анаIэ зытырадзагъэр интерактивнэ Iахьэу экскурсием хэтыгъэр ары, нэбгырэ пэпчъ IофшIакIо папкIэу ащ хэлэжьэн ылъэкIыгъ. ЗекIо Iофтхьабзэр хъызмэтшIапIэм фэгъэхьыгъэ фильмэу къагъэлъэгъуагъэмкIэ аухыгъ. Нэужым хьакIэмэ упчIэхэр атыгъэх ыкIи джэуапхэр зэхахыгъэх.

Промышленнэ туризмэм хэхъоныгъэ егъэшIыгъэным фэгъэхьыгъэ проектым къыдыхэлъытагъэу экскурсиер зэхащагъ, ар шапхъэ лъагэхэм адиштэу рагъэкIокIыгъ. Непэрэ промышленнэ туризмэр — ар туризмэм щыщ Iахь, къэзыгъэпсырэри мыщ фэдэ хъызмэтшIапIэхэр ары. Урысыем промышленнэ туризмэм мэхьанэшхо зэрэщыратырэм ыкIи хэхъоныгъэхэр зэрэрагъэшIырэм къыхэкIэу цIыфхэр цеххэм ачIэхьанхэу амал агъотырэ къодыеп, ящыIэкIэ-псэукIи нахьышIу зышIырэ лъэныкъохэми ащэгъуазэх.

ХъызмэтшIапIэу ООО «Питейный дом» зыфиIорэм иIэшъхьэтетхэм тафэраз, зекIо гъогу шIагъо тфызэхащагъ, шъхьафэу Хьащыр Джэнэт рэзэныгъэ гущыIэхэр фэтэгъэшъуашэх, ащ икъэбар уедэIуныр гъэшIэгъон дэдэу щытыгъ.