Къэралыгъо ыкIи муниципальнэ къулыкъушIэмэ хэхъоныгъэ ягъэшIыгъэным и Гупчэу МКъТУ-м иIэм блэкIыгъэ тхьамафэм щыжъотыгъ.

Непэрэ къэралыгъо ыкIи муниципальнэ къулыкъум иIофыгъо шъхьаIэхэм егъэджэным хэлажьэхэрэр ахэплъагъэх.

Тыгъэгъазэм и 12-м егъэджэн курсхэр Адыгэ Республикэм ихэушъхьафыкIыгъэ зытет фэгъэхьыгъагъ. Iофтхьабзэр зэрищагъ къэралыгъо ыкIи муниципальнэ къулыкъушIэмэ хэхъоныгъэ ягъэшIыгъэным и Гупчэ ипащэу Къохъужъ Саидэ.

Ащ къыкIэлъыкIоу, инвестиционнэ проектхэм якъещэлIэн ыкIи хэхъоныгъэхэр ягъэшIыгъэнхэмкIэ экспертэу, шъолъырхэм инвестиционнэ хэхъоныгъэхэр ягъэшIыгъэнхэмкIэ Лъэпкъ Институтым ипащэу Алексей Бобовым семинар игъэкIотыгъэу Урысыем иинвестиционнэ политикэ фэгъэхьыгъэр зэхищагъ. Семинарым хэлажьэхэрэр щыгъозагъэх аужырэ илъэс 12-м инвесторхэм зэрадэлэжьагъэхэм, лъэныкъуибгъоу а IофымкIэ гъэхъагъэхэр зыщашIыгъэхэм ыкIи инвесторхэр къэмыкIонхэм ушъхьагъоу фэгъурэ хэукъоныгъэхэр зэхафыгъэх. Спикерым практическэ щысэхэр къыхьыгъэх: инвесторхэр къызэрепщэлIэщтхэм, япроектхэр зэрэлъыбгъэкIотэщтхэм, клиентоцентричнэ екIолIакIэ зиIэ системэр гъэпсыгъэным ахэм ащыщыгъэх. Экономикэ хэхъоныгъэмкIэ УФ-м и Министерствэ иунашъохэм язэхэфынкIэ мафэр аухыгъ, интерактивнэ стресс-тестхэр къашIыгъэх, ащ ишIуагъэкIэ муниципалитетхэр инвесторхэм якъещэлIэн фэхьазырхэмэ ауплъэкIугъ.

ЯтIонэрэ мафэм социальнэ ушэтынхэм ыкIи гъэIорышIэнымкIэ хэхъоныгъэу ашIыхэрэм нахь зафагъэзагъ. Экономикэ шIэныгъэхэмкIэ кандидатэу, доцентэу, стратегическэ инициативэхэм я Агентствэ ипроектхэм уасэ афэзышIырэ экспертэу, МКъТУ-м и «Точка кипение» ипрограммнэ пащэу Светлана Новиковам пчэдыжь занкIэ IофшIэнымкIэ егъэджэнхэм ахэлажьэхэрэр Iофым хищагъэх.

Ащ къыкIэлъыкIоу «Точка кипением» хэхъоныгъэ егъэшIыгъэнымкIэ «Платформэу НТИ-м» иотдел ипащэ игуадзэу Антон Артамкиным къыIотагъ социальнэ ушэтынхэр пащэм IэпыIэгъу зэрэфэхъухэрэ шIыкIэр. Общественнэ шIошIхэм ыкIи статистикэм яшIуагъэкIэ гъэIорышIэн унашъохэр пшIынхэ олъэкIы. Интерактивнэ Iахьэу лекцием иIагъэм хэлэжьагъэхэм Iоф дашIагъ softskills зыцIэм — коммуникацием иамалхэм, зэутэкIыныгъэхэр бгъэIорышIэнхэм ыкIи командэ зэдэлэжьэныгъэм фэкIогъэным.

Аужырэ мафэм къалэу Мыекъуапэ иадминистрацие ифинансовэ гъэIорышIапIэ ипащэу Людмила Ялинар лекцием къеджагъ. Ар бюджетированием ипрактикэ анахь дэгъухэм афэгъэхьыгъагъ, мылъкум игъэзекIон, гъэсэныгъэм имуниципальнэ бюджет зыфэдэм тегущыIагъэх. Джащ фэдэу кейсхэм язытет зэхафыгъ, практическэ джэнджэшхэр къашIыгъэх. КIэухым ушэтынхэр арагъэкIугъэх, шIэныгъэу арагъэгъотыгъэр зыфэдэр зэрагъэшIагъ.