Апшъэрэ еджапIэм чIэхьащтхэм сэнэхьатэу къыхахыщтхэр гъэнэфэгъэнхэм афэгъэхьыгъэ IофшIэныр Мыекъопэ къэралыгъо технологическэ университетым щызэшIуахы, кIэлэеджакIохэмрэ студентхэмрэ ащ фагъэхьазырых.

Шъолъырым иинновационнэ гъэсэныгъэ игупчэу университетыр зэрэхъугъэр къэзыушыхьатырэ Iофтхьабзэ пчъагъэхэр рагъэкIокIых, ахэм гъэсэныгъэ программэ зэфэшъхьафхэр къызэлъаубытых.

2023–2024-рэ еджэгъу илъэсхэм сэнэхьатхэм якъыхэхынкIэ университетым исистемэ студент-амбассадорхэм ыкIи пшъэдэкIыжь зыхьыщтхэр факультетхэм ащыгъэнэфэгъэнхэмкIэ егъэджэнхэр зэхащагъэх, ащ ишIуагъэкIэ кIэлэеджакIохэм зэдэлэжьэныгъэу адыряIэм хагъэхъуагъ. Мэхьанэшхо зиIэ Iофтхьабзэхэм ащыщых пчъэ зэIухыгъэхэм я Мафэхэу МКъТУ-м, МКъТУ-м икъутамэу поселкэу Яблоновскэм щыIэм, Политехническэ колледжым ащызэхащагъэхэр, джащ фэдэу хэушъхьафыкIыгъэ Iофтхьабзэхэу магистерскэ программэхэм я Мафэу рагъэкIокIыгъэр. Программэ пэпчъ профессиональнэ екIолIакIэхэр къыдилъытэщтыгъэх, интерактивнэ къэгъэлъэгъонхэр, апшъэрэ еджапIэм зэрэчIэхьащтхэм фэгъэхьыгъэ къэбархэр. Ахэм зэкIэмкIи нэбгырэ 2000-м ехъу ахэлэжьагъ, ны-тыхэри зэрахэтхэу, пэIудзыгъэ шIыкIэмкIи заявкэхэр къэзытыхэрэр щыIагъэх.

Университетым иамбассадорхэм дэкIыгъо агитационнэ зэхахьэ 28-рэ еджапIэхэм ыкIи колледжхэм ащызэхащагъэх, ахэм Адыгэ Республикэм ыкIи Краснодар краимкIэ къытпэблэгъэ районхэм ащыщ кIэлэеджэкIо 950-рэ ахэлэжьагъ. Ащ ишIуагъэкIэ гъэсэныгъэ организациемрэ районхэмрэ азыфагу зэпхыныгъэу илъхэр пытагъэх, МКъТУ-м узэрэчIэхьащт шIыкIэм нахь щыгъозагъэх.

Сэнэхьат къыхэхыным фэгъэхьыгъэ экскурсиехэм ауж колледжхэм къычIатIупщыгъэхэм янеущрэ мафэ университетым рапхыгъ: МКъТУ-м и Политехническэ колледж къычIэкIыгъэ 248-м щыщэу нэбгыри 109-р университетым истудент хъугъэх. МКъТУ-м икъутамэу Яблоновскэм дэтым къычIитIупщыгъэ 270-м щыщэу нэбгырэ 55-мэ яеджэн лъагъэкIотагъ. Ыпэрэ илъэсым елъытыгъэмэ, а пчъагъэхэр процент 40-кIэ нахьыбэх.

Неущрэ мафэм иIэпэIасэхэм апае университетым Iофтхьабзэхэр зэхещэх: медицинскэ зэнэкъокъоу «Медицинскэ эволюциер» ыкIи инженернэ джэгукIэхэу «ПсэолъэшIмэ я Лигэ», ахэм ахэлэжьэгъэ кIэлэеджакIохэм ясэнаущыгъэ къащылъэгъуагъ ыкIи сэнэхьатым нахь хэшIыкI фыряIэ хъугъэ. «Неущрэ мафэм ибилет» зыфиIорэ проектым ишIуагъэкIэ университетым профессиональнэ екIолIакIэхэр кIэлэеджэкIо 244-мэ щакIугъ, ар сыхьат 60-рэ кIуагъэ, лъэныкъуи 9 зэлъиубытыгъ.

Проектэу «Профильнэ классхэр» зыфиIорэр технологическэ академие ЦIыкIум зигъэцакIэрэр 2016-рэ илъэсым къыщегъэжьагъ. Ащ кIэлэеджэкIо 355-у Адыгэ Республикэм иеджэпIэ 22-мэ ащеджэхэрэр пхырыкIыгъэх. Элективнэ курсхэм япрограммэ инженернэ-технологическэ, медикэ-фармацевтическэ, социальнэ-экономическэ, экологэ-биологическэ ыкIи агротехнологическэ лъэныкъохэр хэхьэх. 2024-рэ илъэсым а проектым хэлэжьэгъэ нэбгырэ 84-р Мыекъопэ къэралыгъо технологическэ университетым истудент хъугъэх. Ары пакIошъ, кIэлэеджэкIо 31-мэ IэпэIэсэныгъэ егъэджэнхэр мыщ фэдэ программэхэмкIэ акIугъэх: «Младшая медицинская сестра по уходу за больными», «Консультант в области развития цифровой грамотности населения (цифровой куратор)», «Пчеловод», ыкIи свидетельствэхэр сэнэхьат зэрэзэрагъэгъотыгъэмкIэ къыдахыгъэх.

Мыекъопэ къэралыгъо технологическэ университетыр шIэныгъэ ушэтынхэм кIэлэеджакIохэр къыхегъэлажьэх, нахьыбэрэмкIэ ахэр олимпиадэхэмкIэ ыкIи зэнэкъокъухэмкIэ агъэцакIэх. Шъолъыр зэнэкъокъоу «ШУСТРИК» зыцIэм бэ ныбжьыкIэу зэрищэлIагъэр, гъэсэныгъэ инициативэу «Сириус.Гъэмафэр» зыфиIорэм Адыгэ Республикэр Урысыем ишъолъыр ТОП-12-м хигъэхьагъ. Университетскэ олимпиадэхэм нэбгырэ 275-рэ ахэлэжьагъ, ахэр еджэпIэ 31-мэ ащеджэх, нэбгыриблыр студент хъугъахэх.

Къуаджэм щыпсэухэрэм афэгъэхьыгъэ проектхэри кIэлэеджакIохэм апагъохых. Проектэу «Агрокласс» зыфиIорэр лъэныкъохэу «Агротехнологиер» ыкIи «Агрохимиер» зыцIэхэм афытегъэпсыхьагъ.

2024-рэ илъэсым МКъТУ-м къычIахьэ зышIоигъоу зидокументхэр къэзытыгъэхэр процент 14,5-кIэ нахьыбэ хъугъэх ыкIи нэбгырэ 3535-м нэсыгъ. Апшъэрэ еджапIэм фэгъэхьыгъэ къэбарым зыщызгъэгъуазэрэр цифрэ каналхэр агъэфедэхэзэ процент 26-м мы илъэсым нэсыгъ, 2022-м ар проценти 3,5-рэ зэрэхъущтыгъэр. Iофтхьабзэу зэхащэхэрэм шIуагъэу къатырэр, упчIэжьэгъу ашIыгъэхэм къызэраIуагъэмкIэ, процент 71-рэ мэхъу, сэнэхьатыр къыхахынымкIэ зыдеIагъэхэр процент 57-м нэсыгъ.

Мыекъопэ къэралыгъо технологическэ университетым сэнэхьат къыхэхыным ылъэныкъокIэ Iофыр дэгъоу зэригъэцакIэрэр къэлъагъо, кIэлэеджакIохэми студентхэми профессиональнэ хэхъоныгъэхэр ашIынхэмкIэ амалхэр ареты, системнэ екIолIакIэм ар къыхэкIы. Iофтхьабзэ зэфэшъхьафэу университетым зэхищэхэрэр, екIолIакIэу къыгъотыхэрэр зыфытегъэпсыхьагъэхэр Адыгэ Республикэм IэпэIэсэныгъэшхо зыхэлъ кадрэрхэр фэгъэхьазырыгъэнхэр ары.