Мы илъэсым Мыекъопэ къэралыгъо технологическэ университетым ия 31-рэ илъэс хегъэунэфыкIы. Мэхьанэшхо зиIэ хъугъэ-шIагъэм узэрегъэплъэкIыжьы, зэфэхьысыжьхэр уегъэшIых, гъэхъагъэхэр угу къегъэкIыжьых.

МэфэкIым ихэгъэунэфыкIын къыдыхэлъытагъэу сэнэхьатхэу «Экономика и управление туризмом и гостиничным хозяйством», «Землеустройство» зыфиIохэрэм афеджэрэ апэрэ курсым ис студентхэм зэIукIэгъу адашIыгъ.  Илъэс 25-рэ узэкIэIэбэжьмэ апшъэрэ еджапIэр къэзыухыгъэхэм яуниверситет къагъэзэжьыгъ, ахэм студенческэ илъэсхэр агу къагъэкIыжьыгъ,  гъэхъагъэу ашIыгъэхэмкIэ, ащ университетым иIахьэу хэлъымкIэ ныбжьыкIэхэм адэгощагъэх.

КIэм Аслъан Мухьамэд ыкъор: студеннтым щегъэжьагъэу пащэм нэс

Аграрнэ факультетым исэнэхьатэу «Землеустройство» зыфиIорэм феджэгъэ КIэм Аслъан непэ ООО-у «Бюро инвентаризации объектов недвижимости» зыфиIорэм ипащ ыкIи кадастрэ IофшIэным фэгъэзагъ. Ащ къызэриIуагъэмкIэ,  апшъэрэ еджапIэм къыритыгъэ шIэныгъэхэр щыIэныгъэм дэгъоу щигъэфедагъ.  Зэригъэгъотыгъэ сэнэхьатымкIэ IофшIапIэ Iухьагъ «Университетым епхыгъ непэ шIэныгъэу сIэкIэлъыр зэкIэ», — еIо ащ. Аслъан игуапэу студенческэ илъэсхэр ыгу къэкIыжьых.

Къохъужъ (Л1ыф) Саида Ибрахьим ыпхъур: сервисым иеджапIэ игъэпсын

Къохъужъ Саидэ экономическэ факультетым щеджагъ, сэнэхьатэу «Гостиничное хозяйство и туризм» зыфиIорэр зэригъэгъотыгъ, ежь иунэе сервисымкIэ еджапIэ ыгъэпсыгъ. ХьакIэщ ыкIи ресторан  бизнесым испециалистхэр егъэхьазырых. Саида Ибрахьим ыпхъум къызэриIуагъэмкIэ, сэнэхьатэу къыхихыгъэр зыщыпсэурэ къалэу Шъачэ епхыгъ. Мыщ зекIоным мэхьанэшхо щыраты.  МКъТУ-м икIэлэегъаджэхэм ар инэу афэраз. «Тэ тыапэрыгъ, тэркIэ зэкIэ ауплъэкIущтыгъ. Ау мы уахътэр егъашIэм сыгу илъыщт» - еIо ащ.

Хорьков Андрей Анатолий ыкъор: предпринимательствэр университетым ишIэныгъэхэм къакIэлъыкIоу

Андрей Хорьковыр лъэныкъоу «Туризм и гостиничное хозяйство» зыфиIорэм феджагъ, бизнесым чIыпIэ гъэнэфагъэ щиубытыгъ.  ПсэолъэшIыным щагъэфедэрэ материалхэм ящэн ар пылъ. Андрей Анатолий ыкъом зэрилъытэрэмкIэ, университетым щызэригъэгъотыгъэ экономическэ шIэныгъэхэр щыIэныгъэм лъэшэу къыщышъхьэпагъэх. «Студенчесскэ илъэсхэр  гъэшIэгъоныгъэх, шIэныгъэу зэдгъэгъотыгъэхэр нэужым къытшъхьэпэжьыгъэх», — еIо ащ.

НэмытIэкъо (Цэй) Сусанна Аскэр ыпхъур:  универсальнэ шIэныгъэхэр щыIэныгъэм къыщыпшъхьэпэжьынхэр

Сусаннэ МКъТУ-м щеджагъ, сэнэхьатэу «Экономика и управление туризмом в гостиничном хозяйстве» зыфиIорэр зэригъэгъотыгъ, непэ Социальнэ фондым щэлажьэ.  Непэ зэрылэжьэрэ сэнэхьатыр егъэджэным емыпхыгъэми, университетым шIэныгъэу къыритыгъэхэм осэшхо зэряIэр хегъэунэфыкIы. 

Ляшенко Наталья Николай ыпхъур: узэкъотыныр гъэхъагъэм иIункIыбз

Наталья Ляшенкэр лъэныкъоу «Гостиничное хозяйство и туризм» зыфиIорэм феджагъ, непэ дзэ комиссариатым Iут. Университетым шIэныгъэу къыритыгъэхэр щыIэныгъэм лъэшэу къызэрэщышъхьэпагъэхэр ащ хегъэунэфык1ы. «Студенческэ илъэсхэр гъэш1эгъоныгъэх, тызэрысыгъэ купым ныбджэгъуныгъэр ылъэпсагъ. Еджэным дакIоу университетым щызэхащэрэ Iофтхьабзэхэм ыкIи мэфэкIхэм тахэлажьэщтыгъ», — къыддэгуащэ ар.

Мыекъопэ къэралыгъо технологическэ университетыр къэзыухыгъэу непэ зигугъу къэтшIыгъэхэм щысэ къагъэлъагъо шэпхъэшIухэм адиштэрэ гъэсэныгъэм ишIуагъэк1э уисэнэхьаткIэ гъэхъэгъэшIухэр пшIынхэ зэрэплъэкIыщтыр. Университетыр къэзыухыгъэ пстэуми апшъэрэ еджапIэр арэгушхо.