Къэралыгъо граждан ыкIи муниципальнэ къулыкъушIэхэм ясэнэхьат IэпэIэсэныгъэ хагъэхъоным фытегъэпсыхьэгъэ курсхэр Мыекъопэ къэралыгъо технологическэ университетым щылъагъэкIуатэх.

Iофтхьабзэм зэрипхыгъэх гъэIорышIэным ылъэныкъокIэ Iоф зышIэрэ экспертхэр. Курсхэм ахэлажьэхэрэм амал яI пэрыт екIолIакIэхэр ыкIи практикхэр зэрагъэшIэнхэр, ахэр нэужым щыIэныгъэм щагъэфедэжьынхэр.

Гъэсэныгъэ интенсивым иятIонэрэ мафэ цIыф ресурсхэм ягъэIорышIэн игъэкIотыгъэу зэгъэшIэгъэным фэгъэхьыгъагъ. Стратегическэ гухэлъхэмкIэ Агентствэм ипроектхэм уасэ афэшIыгъэнымкIэ экспертэу, МКъТУ-м и «Точка кипения» зыфиIорэм ипрограммнэ директорэу, ныбжьыкIэ проектхэм я Урысые зэнэкъокъоу «Воплоти свою мечту!» зыфиIорэм ипащэу, НТИ-м иэкспертэу Светлана Новиковам лекциеу «Управление человеческими ресурсами в системе государственного и муниципального управления» зыфиIорэр зэхищагъ. Лекциер тIоу гощыгъагъ.

Нэужым Iофтхьабзэм хэлажьэхэрэр практическэ лъэныкъом зыфагъэзагъ, ащ пэщэныгъэ дызезыхьагъэр  экономикэ шIэныгъэхэмкIэ докторэу, инновационнэ площадкэу LeanSkills.lab-м ипащэу Сергея Чефрановыр ары. ГъэIорышIэныр шIуагъэ къытэу зэхэщэгъэнымкIэ амалэу щыIэхэм, кейс гъэнэфагъэхэм ар къатегущыIагъ.

Джащ фэдэу материалэу зэрагъэшIагъэм къэзэрэугъоигъэхэр тегущыIагъэх, зэфэхьысыжьхэр ашIыгъэх, егъэджэным иедзыгъоу къыкIэлъыкIощтым зыфагъэхьазырын алъэкIыгъ.

БлэкIыгъэ егъэджэн мафэхэм Iофыгъоу къаIэтыгъагъэхэм курсхэм ахэлажьэхэрэр  атегущыIагъэх. Сергей Чефрановым «мозговой штурм» зэхищагъ, кIэугъоен производствэм ар фэгъэхьыгъагъ.

МКъТУ-м ипсихологическэ къулыкъу ипащэу, психологие шIэныгъэхэмкIэ кандидатэу  Людмила Красновар лекциеу «Стратегическое лидерство в государственном и муниципальном управлении: разработка персональной матрицы личностной эффективности лидера» зыфиIорэм къеджагъ.  Клубэу «Mindfitness» зыфиШорэм щагъэфедэрэ шIыкIэхэм лекторыр къатегущыIагъ.

Мы мафэм иаужырэ едзыгъо зэфэхьысыжьхэр ашIыгъэх. Программэм ишIуагъэкIэ ащ хэлажьэхэрэм пшъэрылъэу апашъхьэ щытхэр шIуагъэ къытэу зэшIуахынхэ ыкIи Iоф зыщашIэрэ организациехэм ащагъэфедэнхэ алъэкIыщт.