Мыекъопэ къэралыгъо технологическэ университетым иректор игрантхэм якъыдэхын фэгъэхьыгъэ зэнэкъокъоу чъэпыогъум рагъэжьэгъагъэм изэфэхьысыжьхэр тыгъэгъазэм ашIыгъэх.

Экспертнэ комиссиеу университетым ишIэныгъэлэжь пэрытхэр зыхэхьагъэхэм ыкIи ащ пэщэныгъэ дызезыхьэгъэ проректорэу, философие шIэныгъэхэмкIэ докторэу, профессорэу Татьяна Овсянниковам зэфэхьысыжьхэр ышIыгъэх, анахь дэгъухэр къыхигъэщыгъэх. Мы зэнэкъокъум студентхэм ыкIи шIэныгъэлэжь ныбжьыкIэхэм амал къареты ягухэлъхэр щыIэныгъэм щыпхыращынхэу ыкIи ащкIэ университетыр IэпыIэгъу къафэхъунэу. Iофтхьабзэр илъэс къэс зэхащэ, МКъТУ-м щеджэхэрэм научнэ-ушэтын IофшIэныр зэрифэшъуашэу зэхащэн амал яIэным фэIорышIэ, джащ фэдэу IофшIэгъэ анахь дэгъухэм ахъщэкIэ IэпыIэгъу афэхъух.

2024-рэ илъэсым зэнэкъокъум IофшIэгъэ 22-рэ къырахьылIагъ: техническэ шIэныгъэхэмкIэ — 9; медицинэмкIэ — 5; естественнэ шIэныгъэхэмкIэ — 6; гуманитарнэхэмкIэ — 2.

Экспертнэ комиссием къыхихыгъэ IофшIэгъэ анахь дэгъухэр МКъТУ-м иректорэу Къуижъ Саидэ рахьылIагъэх, ащ унашъо ышIыгъ проекти 6-мэ финанс IэпыIэгъу арагъэгъотынэу.

Лъэныкъоу «Техническэ наукэр» зыфиIорэм текIоныгъэр къыщыдахыгъ аграрнэ технологиехэмкIэ факультетым истуденткэхэу Офелия Назарянрэ Кристина Николинамрэ (ТД-41). Ахэм къагъэхьазырыгъ проектэу «Разработка творожного фитопродукта для профилактики йододефицита с использованием местного растительного сырья» зыфиIорэр (научнэ пащэр техническэ шIэныгъэхэмкIэ кандидатэу Людмила Лунинар). Анастасия Коваленкэм (ТД-51) ипроектэу «Ресурсосберегающая технология производства мягких сыров» зыфиIорэм текIоныгъэр къыдихыгъ (научнэ пащэр техническэ шIэныгъэхэмкIэ кандидатэу Таз Зарет).

Лъэныкъоу «Естественнэ наукэр» зыфиIорэм ащытекIуагъ университетым экологиемкIэ ифакультет истудентхэу Екатерина Кузьминам, Кирилл Басацкэм ыкIи Цэй Анеттэ (ТБ-31) къагъэхьазырыгъэ проектэу «Изучение различных способов деструкции органического вторсырья для его вовлечения в рециклинг» зыфиIорэм (научнэ пащэр биологие шIэныгъэхэмкIэ кандидатэу Любовь Вавиловар); аграрнэ технологиехэмкIэ факультетым щеджэрэ Данила Деркачевым (АГ-21) ипроектэу «Научно-практическое обоснование применения кормушек для скармливания грубых и концентрированных кормов в овцеводстве» зыфиIорэм (научнэ пащэр мэкъумэщ шIэныгъэхэмкIэ кандидатэу Хьаткъо Марят); аграрнэ технологиехэмкIэ факультетым истуденткэу Марина Сусловам (АГ-21) ипроектэу «Особенности роста и развития монарды в условиях черноземной зоны Республики Адыгея» (научнэ пащэр биологие шIэныгъэхэмкIэ кандидатэу Шъаокъо Жанна ).

Лъэныкъоу «Медицинэ наукэр» зыфиIорэм щатекIуагъ Анастасии Сулешко (Ф-31) иIофшIагъэу «Разработка состава и технологии биологически активной добавки к пище с антиоксидантным действием на основе высококверцетинового лекарственного растительного сырья Республики Адыгея» зыфиIорэр (научнэ пащэр Вера Артемьевар).

Зэнэкъокъум текIоныгъэр къыщыдэзыхыгъэхэм зэкIэми ахъщэ тынхэр афагъэшъошэщтых. МКъТУ-м иректор ифинанс IэпыIэгъу ишIуагъэкIэ авторхэм тапэкIи ушэтынхэр зэхащэнхэ алъэкIыщт. Ахэм язэфэхьысыжьхэр 2025-рэ илъэсым мэлылъфэгъум университетым щыкIощт студенческэ научнэ-практическэ конференцием щызэфахьысыжьыщтых.

ТекIоныгъэр къыдэзыхыгъэхэм тафэгушIо, тапэкIи гъэхъэгъэшIухэр ашIынхэу афэтэIо!