Мы мафэхэм Дунэе форумэу «#МЫВМЕСТЕ» зыфиIорэр Москва щыкIуагъ. Социальнэ проектхэм япэрытхэр, шIушIэ фондхэм япащэхэр, гуфитхэр ыкIи гъэсакIохэр, волонтер движением изэхэщакIохэр, хэушъхьафыкIыгъэ дзэ операцием хэлажьэхэрэр Iофтхьабзэм зэфищагъэх.

Дунэе форумэу «#МЫВМЕСТЕ — 2024» зыфиIорэм къыдыхэлъытагъэу программэу «Обучение служением» зыфиIорэм ипэрытхэр агъэшIуагъэх. Обществэр нахьышIу хъуным фытегъэпсыхьэгъэ программэм хэлэжьэгъэ пстэуми ясэнэхьат хэшIыкIышхо фыряIэу зэрэщытыр джыри зэ къагъэшъыпкъэжьыгъ.

Мыекъопэ къэралыгъо технологическэ университетым икIэлэегъаджэу, экологиемкIэ ыкIи тыкъэзыуцухьэрэ дунаимкIэ кафедрэм идоцентэу Къыздэрмыш Сулиетэ ятIонэрэ чIыпIэр къыдихыгъ, ар къэзыушыхьатырэ дипломыр къыфагъэшъошагъ.  Тын лъапIэр ащ къыритыжьыгъ  Урысые Федерацием шIэныгъэмкIэ ыкIи апшъэрэ гъэсэныгъэмкIэ иминистрэ игуадзэу Ольга Петровам.

— Программэу «Обучение служением» зыфиIорэм ипэрытхэм ягъэхъагъэхэр къыхэдгъэщынхэ амал непэ тиI. Ахэм яIофшIэн екIолIакIэу фыряIэм студентхэм щысэ тырахы, апшъэрэ гъэсэныгъэм исистемэ хэхъоныгъэ ышIыным яIахьышIу халъхьэ. Лъэшэу сигуапэ мы программэр ныбжьыкIабэмэ IэпыIэгъу зэрафэхъурэр, социальнэ пшъэдэкIыжьэу ахьырэр къызэрагурыIорэр, — къыхигъэщыгъ Ольга Петровам.

Мэфищым къыкIоцI трекэу «Обучение служением» зыфиIорэм хэлажьэхэрэм опыт ыкIи шIэныгъэ гъэнэфагъэхэр зэрагъэгъотыгъэх, ащкIэ федеральнэ экспертхэр IэпыIэгъу къафэхъугъэх.  

Анахьэу анаIэ зытырагъэтыгъэр научнэ ушэтынхэр ары. А лъэныкъом къыдыхэлъытагъэу мэхьанэшхо зиIэ социальнэ ушэтынэу 2023 – 2024-рэ илъэс еджэгъум рагъэкIокIыгъэм изэфэхьысыжьхэр къаIотагъэх. Мы Iофтхьабзэм къэралыгъом ит апшъэрэ еджапIэхэм ястудентхэр ыкIи якIэлэегъаджэхэр хэлэжьагъэх, зэкIэмкIи нэбгырэ мин 11-м ехъу.    

Программэу «Обучение служением» зыфиIорэм IэпыIэгъу узэфэхъужьыным, социальнэ пшъэдэкIыжь пхьыным мэхьанэшхо зэряIэр къегъэнафэ, ары Урысыем играждан обществэ хэхъоныгъэ ышIыным ылъапсэхэр.