Къэралыгъо ыкIи муниципальнэ къулыкъушIэхэм ясэнэхьат IэпэIэсэныгъэ хагъэхъоным фытегъэпсыхьэгъэ гъэсэныгъэ Iофтхьабзэхэр МКъТУ-м непэ щырагъэжьагъэх. Апэу ащ къыдыхэлъытагъэр «Развитие личной эффективности государственных гражданских служащих и муниципальных служащих. Эффективный руководитель (базовый уровень)» зыфиIорэр ары.

Iофтхьабзэр рагъэжьэным ыпэкIэ къэзэрэугъоигъэхэм шIуфэс гущыIэхэмкIэ закъыфигъэзагъ АР-м и ЛIышъхьэрэ иминистрэхэм я Кабинетрэ я Администрацие къэралыгъо къулыкъумкIэ ыкIи кадровэ политикэмкIэ игъэIорышIапIэ ипащэу Бэгугъэ Азэмат.

Апэрэ мафэр лекциеу «Современные подходы к организации государственного и муниципального управления: проектный офис и управление проектами» зыфиIорэмкIэ рагъэжьагъ. Лекциер зэхищагъ экономикэ шIэныгъэмкIэ докторэу, МКъТУ-м иректор иупчIэжьэгъоу ыкIи федеральнэ инновационнэ площадкэу «LeanSkills.lab» зыфиIорэм ипащэу Сергей Чефрановым. Ащ Iофтхьабзэм хэлажьэхэрэм къафиIотагъ проектхэм ягъэзекIонкIэ инновационнэ екIолIакIэу щыIэхэр, ащкIэ проектнэ офисхэм ягъэфедэн ишIуагъэу къэкIон ылъэкIыщтыр.   

Теоретическэ лъэныкъом ыуж Iофтхьабзэм хэлажьэхэрэм интерактивнэ егъэджэнхэм зафагъэзагъ, ахэм купит1оу загощыгъ ыкIи кейс гъэнэфагъэхэм Iоф адашIагъ. Джащ фэдэу опытэу аIэкIэлъымкIэ зэхъожьыгъэх.

Мыщ ыуж лекциеу «Оценка эффективности деятельности руководителя в системе государственного и муниципального управления» зыфиIорэр афызэхащагъ. Лекторыр   филологие шIэныгъэхэмкIэ кандидатэу, кафедрэм идоцентэу Бзэджэжъыкъо Лариса. Пащэхэм яIофшIэн уасэ фэшIыгъэным иметодикэ игъэпсынкIэ, къэралыгъо къулыкъур шIуагъэ къытэу зэхэщэгъэнымкIэ непэ амалэу щыIэхэм ар къатегущыIагъ.

Iофтхьабзэм иаужырэ едзыгъо хъугъэ кейсхэм, материалэу аугъоигъэхэм атегущыIэгъэныр. Сергей Чефрановыр, джащ фэдэу экономикэ шIэныгъэхэмкIэ кандидатэу, къэралыгъо ыкIи муниципальнэ къулыкъушIэхэм якомпетенцие хэхъоныгъэ ышIынымкIэ Гупчэм ипащэу Къохъужъ Саидэ егъэджэным зэфэхьысыжьхэр къыфашIыгъэх. Мы курсхэр тыгъэгъазэм и 14-м нэс кIощтых.